សក់ក្បាលពុំគ្រាន់តែតំណាងឲ្យចរិតរបស់មនុស្សគ្រប់រូបប៉ុណ្ណោះទេ តែវាក៏អាចឆ្លុះបញ្ចាំង ពីស្ថានភាពសុខភាពរាងកាយ ល្អ និង អាក្រក់ផងដែរ។ រីឯសភាពសក់ក្បាលវិញ តាមធម្មតា មានសសៃតូចឆ្មារ និង មានជាតិសើម ទើបល្អប្រសើរ ប៉ុន្តែគេអាចបែងចែកជាច្រើនប្រភេទដូចខាងក្រោម :
• សរសៃសក់ភ្លឺរលោង : ជាមនុស្សមានសុខភាពល្អ រីឯជោគវាសនាក៏មិនធម្មតាដែរ។
• សរសៃសក់ស្ងួត : ជាមនុស្សមានសុខភាពមិនល្អឡើយ រីឯជោគវាសនា ក៏ធ្លាក់ចុះខ្លាំងដែរ។
• សរសៃសក់ទន់ល្មើយ : ជាមនុស្សមានគំនិតប្រាជ្ញាឈ្លាសវៃ និង ចេះអត់ឱនឲ្យអ្នកដទៃ។ ម្យ៉ាងទៀត ដោយសារតែមានមនោសញ្ចេតនាច្រើន ទើបរាងកាយមិនសូវជារឹងប៉ឹងឡើយ។
• សរសៃសក់គគ្រាត និង រឹង : ជាមនុស្សមានចិត្តពុះកញ្ជ្រោលខ្លាំងបន្តិច រីឯអត្តចរិត គឺចចេសរឹងរូស តែមានកម្លាំងចិត្តមុះមុត ហើយជួនពេលខ្លះអាចបញ្ចេញកាយវិការព្រៃផ្សៃទៀតផង។ ចំពោះជីវភាពរស់នៅមានការនឿយហត់បន្តិច ប៉ុន្តែសុខភាពហាក់ដូចជារឹងប៉ឹង។
• សរសៃសក់រួញទឹករលក ឬ រួញខ្លាំង : អ្នកមានសក់រួញទឹករលក ឬ រួញខ្លាំងពីកំណើត តែងមានអត្តចរិតខុសប្លែកពីគេឯងបន្តិច ដោយប្រកបកិច្ចការងារហាក់ដូចជាមានកម្លាំងរស់រវើកតែម្ដង ប៉ុន្តែអាចលម្អៀងទៅរបៀបភ្លើតភ្លើនបន្តិច៕