ធ្លាប់ដឹងទេថារបបអាហារក៏មានឥទ្ធិពលគួរឱ្យកត់សម្គាល់លើកម្រិតនៃភាពស្ត្រេស ឬតានតឹងក្នុងអារម្មណ៍។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ថាតើអាហារអ្វីខ្លះដែលអ្នកគួរទទួលទានដើម្បីអាចគ្រប់គ្រងភាពស្ត្រេស? កុំបារម្ភ! ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីអាហារ ព្រមទាំងភេសជ្ជៈមួយចំនួនដែលអ្នកចាំបាច់ទទួលទាននៅពេលស្ត្រេស ៖

១. អាហារសម្បូរសារធាតុប្រឆាំងអុកស៊ីតកម្ម

អាហារប្រភេទនេះជួយជួសជុលរាងកាយនិងកម្ចាត់ចោលរាល់រ៉ាឌីកាល់សេរីក្នុងប្រព័ន្ធរាងកាយ។ វាក៏អាចកម្ចាត់ជាតិពុលផ្សេងៗក្នុងរាងកាយ និងគ្រប់គ្រងរាល់អាការៈនៃភាពស្ត្រេសផងដែរ។ ការទទួលទានបន្លែបៃតងអាចផ្ដល់ឱ្យអ្នកនូវសារធាតុប្រឆាំងអុកស៊ីតដែលរាងកាយត្រូវការ។

២. ទឹក

ជាភេសជ្ជៈដែលងាយនឹងរកបានបំផុត។ ការទទួលទានទឹកឱ្យបានគ្រប់គ្រាន់ គឺចាំបាច់ណាស់ដើម្បីបន្ថយឥទ្ធិពលនៃភាពស្ត្រេសលើសុខភាពរាងកាយនិងផ្លួវចិត្ត។ គួរបញ្ជាក់ផងដែរថាកង្វះជាតិទឹកក្នុងរាងកាយក៏ជាមូលហេតុទូទៅបំផុតមួយនៃបញ្ហាស្ត្រេសផងដែរ។

៣. ទឹកដូង

ចូរទទួលទានទឹកដូងមួយកែវពេលអ្នកមានអារម្មណ៍ស្ត្រេស។ ភេសជ្ជៈធម្មជាតិនេះនឹងផ្ដល់អារម្មណ៍ស្រស់ស្រាយដល់អ្នកភ្លាមៗ ព្រមទាំងមានរសជាតិឆ្ងាញ់ថែមទៀតដោយវាមានផ្ទុកវីតាមីន B។

៤​. តែបៃតង

ភេសជ្ជៈនេះមានផ្ទុកកាហ្វេអ៊ីនតិចជាងកាហ្វេ ប៉ុន្តែជាប្រភពដ៏ប្រសើរនៃសារធាតុដែលជួយសម្រួលដល់អារម្មណ៍។ ការទទួលទានតែបៃតងមួយពែងអាចជួយឱ្យអ្នកមានអារម្មណ៍ស្វាងនិងធូរស្រាលបានយ៉ាងឆាប់រហ័ស។

៥. តែផ្កា Chamomile

ប្រសិនបើអ្នកទទួលទានភេសជ្ជៈមានផ្ទុកជាតិកាហ្វេអ៊ីនមិនបាន អ្នកអាចប្ដូរមកជាតែរុក្ខជាតិជំនួសវិញ។ ឧទាហរណ៍តែផ្កា Chamomile! ក្រៅពីជួយបំបាត់បញ្ហាព័ន្ធព័ន្ធនឹងប្រព័ន្ធរំលាយអាហារហើយនោះ តែរុក្ខជាតិនេះក៏មានប្រសិទ្ធភាពទប់ទល់ស្ត្រេសគួរឱ្យកត់សម្គាល់ផងដែរ។ អ្នកអាចទទួលទានតែផ្កា Chamomile នៅមុនពេលចូលគេងដើម្បីឆាប់គេងលក់បានស្កប់។

៦. ទឹកដោះគោក្ដៅឧណ្ហៗ

ទឹកដោះគោត្រឹមតែ ១កែវមានផ្ទុកបរិមាណខ្ពស់នៃវីតាមីន ជាតិរ៉ែ ប្រូតេអ៊ីន កាល់ស្យូម និងសារធាតុប្រឆាំងអុកស៊ីតកម្ម។ ហើយសារធាតុទាំងអស់នេះមានប្រសិទ្ធិភាពកម្ចាត់រាល់រ៉ាឌីកាល់សេរីដែលបញ្ចេញដោយភាពតានតឹង ឬស្ត្រេស។

៧. ត្រីសម្បូរខ្លាញ់

ជាប្រភពដ៏ប្រសើរនៃប្រូតេអ៊ីននិងអាស៊ីតខ្លាញ់អូមេហ្គា ៣ ដែលល្អសម្រាប់សុខភាពរាងកាយ រួមទាំងអារម្មណ៍។ ត្រីសម្បូរខ្លាញ់ក៏អាចបង្កើនកម្រិតអ័រម៉ូនរីករាយ serotonin នៃខួរក្បាល​​​ដែលប្រយុទ្ធប្រឆាំងនឹងភាពស្ត្រេស។

៨. សូកូឡាខ្មៅ

សូកូឡាខ្មៅ គឺមានឥទ្ធិពលល្អបំផុតក្នុងការបង្កើននូវសារធាតុគីមីផ្សេងៗក្នុងខួរក្បាលដែលជួយលើកកម្ពស់អារម្មណ៍ល្អប្រសើរ។ គ្រាន់តែប្រាកដថា អ្នកបានជ្រើសរើសនូវសូកូឡាដែលផ្សំឡើងពីកាកាវយ៉ាងហោចណាស់ ៧០ ភាគរយ ប្រសិនបើអ្នកចង់ជៀសឆ្ងាយពីបញ្ហាឆាប់ខឹងឆេវឆាវ និងតានតឹងក្នុងអារម្មណ៍បានយ៉ាងឆាប់រហ័សប្រកបដោយប្រសិទ្ធិភាពខ្ពស់។

 ៩. ផ្លែចេក

ក្រៅពីមានផ្ទុកសម្បូរទៅដោយជាតិប៉ូតាស្យូមហើយនោះ ផ្លែចេកក៏ជាប្រភពដ៏ប្រសើរនៃវីតាមីន B រួមទាំងសារធាតុ folate និងវីតាមីន B6 ដែលជួយក្នុងការផលិតអ័រម៉ូន serotonin បង្កើនអារម្មណ៍ល្អប្រសើរកាត់បន្ថយភាពតានតឹង។

សម្គាល់៖ អ្នកចាំបាច់គួរព្យាយាមចំណាយពេលធ្វើលំហាត់ប្រាណ ឬសមាធិផង ដើម្បីអាចបន្ថយភាពស្ត្រេសបានកាន់តែប្រសើរ។ លំហាត់ប្រាណ និងការចំណាយពេលតាំងអារម្មណ៍សមាធិជាវិធីសាស្ត្រដ៏ល្អដើម្បីទប់ទល់ភាពស្ត្រេសនិងជំងឺធ្លាក់ទឹកចិត្ត។ ប្រសិនបើអ្នកមិនធ្វើលំហាត់ប្រាណជាប្រចាំខួរក្បាលមិនអាចបញ្ចេញនូវអ័រម៉ូនរីករាយគ្រប់គ្រាន់ឡើយ៕

  • ស្ត្រេសអាចជះផលប៉ះពាល់មួយចំនួនដូចខាងក្រោមដល់សុខភាពរាងកាយ

១. សម្ពាធឈាមឡើងខ្ពស់

ធ្លាប់ដឹងទេថាស្ត្រេស ឬភាពតានតឹងក្នុងអារម្មណ៍ខ្លាំងជាប្រចាំក៏អាចបណ្ដាលឱ្យសម្ពាធឈាមឡើងខ្ពស់ផងដែរ? នេះក៏ព្រោះតែនៅពេលស្ត្រេស រាងកាយនឹងបង្កើនការផលិតអ័រម៉ូនមួយចំនួនដែលជះឥទ្ធិពលលើកម្រិតនៃសម្ពាធឈាមនាំឱ្យឡើងខុសប្រក្រតីដោយបង្កបញ្ហាចង្វាក់បេះដូងលោតញាប់ ហើយសម្ពាធឈាមរួមតូច។ ដូច្នេះដើម្បីជាការប្រសើរចូរព្យាយាមគ្រប់គ្រង ឬកាត់បន្ថយភាពស្ត្រេសរបស់អ្នក។

២. ប្រព័ន្ធភាពស៊ាំចុះខ្សោយ

ភាពតានតឹងក្នុងអារម្មណ៍ ឬស្ត្រេសពេកក៏ជះផលប៉ះពាល់ដល់ប្រព័ន្ធភាពស៊ាំរាងកាយដែលធ្វើឱ្យអ្នកងាយឆ្លងជំងឺផ្សេងៗផងដែរ។ នៅពេលតានតឹងក្នុងអារម្មណ៍ខ្លាំងខួរក្បាលនឹងផលិតអ័រម៉ូនស្ត្រេស cortisol កាន់តែច្រើនឡើងដែលជះឥទ្ធិពលដល់មុខងាយនៃកោសិកា T ចាំបាច់សម្រាប់ប្រយុទ្ធ​ប្រឆាំងរោគឆ្លង។

៣. សុខភាពស្បែក

ភាពតានតឹងក្នុងអារម្មណ៍អាចជះឥទ្ធិពលលើសុខភាពរាងកាយទាំងមូលរួមទាំងស្បែក! នៅពេលស្ត្រេសអ្នកងាយនឹងកើតរោគមុន ស្នាមដក់ខ្មៅក្រោមភ្នែក ព្រមទាំងបញ្ហាស្បែកស្រអាប់។ ដូច្នេះប្រសិនបើចង់រក្សាបាននូវសុខភាពស្បែកល្អប្រសើរ ចូរព្យាយាមគ្រប់គ្រងភាពស្ត្រេស។

៤. កូឡេស្តេរ៉ូលមិនល្អឡើងខ្ពស់

ភាពតានតឹងក្នុងអារម្មណ៍ ឬស្ត្រេសគ្រប់ពេលសឹងតែរាល់ថ្ងៃអាចនឹងបង្កបញ្ហាសុខភាពជាច្រើន។ នោះក៏ព្រោះតែស្ត្រេសកាត់បន្ថយភាពរឹងមាំនៃប្រព័ន្ធភាពស៊ាំរាងកាយ ហើយថែមទាំងបណ្ដាលឱ្យរាងកាយបង្កើនការផលិតអ័រម៉ូន  cortisol និង epinephrine ដែលបង្កបញ្ហាកូឡេស្តេរ៉ូលមិនល្អឡើងខ្ពស់។

៥. អារម្មណ៍ប្រែប្រួលឆាប់រហ័ស

ភាគច្រើននៃពួកយើងប្រហែលជាមិនធ្លាប់ដឹងទេថា ភាពតានតឹងក្នុងអារម្មណ៍ ឬស្ត្រេសជាប់ជាប្រចាំជះឥទ្ធិពលគួរឱ្យកត់សម្គាល់លើអារម្មណ៍ដោយអាចនឹងប្រែប្រួលឆាប់រហ័ស។

៦. ជំងឺបេះដូង

នេះក៏ព្រោះតែអ័រម៉ូន cortisol ដែលរាងកាយបញ្ចេញពេលស្ត្រេសបណ្ដាលឱ្យកម្រិតនៃកូឡេស្តេរ៉ូលមិនល្អ ជាតិខ្លាញ់ទ្រីគ្លីសេរី និងសម្ពាធឈាមឡើងខ្ពស់ដែលបង្កើនហានិភ័យនៃជំងឺបេះដូងគួរឱ្យបារម្ភ៕