មនុស្សមួយចំនួនមានពណ៌ស្បែកស្លេកស្លាំងពីកំណើតតែម្ដងកាត់តាមឪពុកម្ដាយពួកគេ ប៉ុន្តែប្រសិនបើអ្នកមិនមែនម្នាក់ក្នុងចំណោមនោះទេ ស្បែកប្រែជាស្លេកស្លាំងអាចបណ្ដាលមកពីបញ្ហាគួរឱ្យព្រួយបារម្ភចំពោះសុខភាពហើយ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ហើយអ្នកគួរប្រញាប់ទៅជួបពិនិត្យជាមួយគ្រូពេទ្យជំនាញភ្លាម ប្រសិនបើអាការៈនៃស្បែកស្លេកស្លាំងអមមកជាមួយនឹងអត្រាចង្វាក់បេះដូងលោតញាប់ខុសប្រក្រតី សម្ពាធឈាមចុះទាប ពិបាកដកដង្ហើម ឈឺទ្រូង និងរកកលចង់សន្លប់។ ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីមូលហេតុទូទៅបំផុតមួយចំនួនដែលបណ្ដាលឱ្យស្បែកប្រែជាស្លេកស្លាំង ៖
១. ជំងឺខ្វះគ្រាប់ឈាមក្រហម
មួយក្នុងចំណោមមូលហេតុទូទៅបំផុតដែលបណ្ដាលឱ្យស្បែកប្រែជាស្លេកស្លាំង គឺជំងឺខ្វះគ្រាប់ឈាមក្រហម ឬកង្វះជាតិដែកក្នុងរាងកាយ។ ជំងឺខ្វះគ្រាប់ឈាមក្រហម ជាស្ថានភាពសុខភាពមួយដែលបរិមាណនៃកោសិកាឈាមក្រហមដឹកនាំអុកស៊ីសែនទៅចិញ្ចឹមគ្រប់កោសិកាមានកម្រិតទាបមិនធម្មតា។ រាងកាយត្រូវការជាតិដែកដើម្បីផលិតអេម៉ូក្លូប៊ីន ដែលជាប្រូតេអ៊ីននៅក្នុងកោសិកាឈាមក្រហម។ ទោះជាយ៉ាងណាក្រៅពីភាពស្លេកស្លាំង ជំងឺខ្វះគ្រាប់ឈាមក្រហមតែងមានអមមកជាមួយនូវអាការៈផ្សេងទៀតដូចជាស្រេកទឹកមិនឈប់, អស់កម្លាំងឆាប់ហត់ខុសធម្មតា, ភាពខ្លីនៃដង្ហើម, បេះដូងលោតញាប់ខុសធម្មតា, ឈឺក្បាលខ្លាំងញឹកញាប់ និងបញ្ហាពាក់ព័ន្ធនឹងការផ្ដោតប្រមូលផ្ដុំអារម្មណ៍។
២. កង្វះវីតាមីន B12
ក្រៅពីជាតិដែក វីតាមីនផ្សេងទៀតដែលរាងកាយត្រូវការសម្រាប់ការសំយោគកោសិកាឈាមក្រហមបានត្រឹមត្រូវនោះ គឺវីតាមីន B12។ ទោះជាយ៉ាងណាក្រៅពីភាពស្លេកស្លាំង កង្វះវីតាមីន b12 អាចអមមកជាមួយនូវអាការៈមួយចំនួនដូចជាអស់កម្លាំង, អារម្មណ៍ឆាប់ប្រែប្រួល, មានអារម្មណ៍ស្ពឹកៗដូចម្ជុលចាក់នៅដៃនិងជើង, ដំបៅក្នុងមាត់, ភាពខ្លីនៃដង្ហើម។
៣. ជំងឹមហារីកឈាម
មានជំងឺមហារីកច្រើនប្រភេទណាស់ដែលបណ្ដាលឱ្យស្បែកប្រែជាស្លេកស្លាំង ហើយជំងឺមហារីកឈាមជាប្រភេទមួយក្នុងចំណោមនោះ។
៤. ត្រូវកម្ដៅថ្ងៃមិនបានគ្រប់គ្រាន់
ក៏ព្រោះតែស្បែកមិនផលិតជាតិមេឡានីនគ្រប់គ្រាន់ នោះមិនមែនមានន័យថាកោសិកាពិសេសដែលផលិតវាមិនដំណើរការដែរ។ ហើយការពិតនោះ គឺស្បែកនឹងផលិតជាតិមេឡានីនកាន់តែច្រើនដើម្បីឆ្លើយតបទៅនឹងកាំរស្មីយូវីក្នុងទម្រង់ការពារស្បែក។
៥. របបអាហារគ្មានសុខភាពល្អ
ការទទួលទានអាហារកែច្នៃ អាហារគ្មានជីវជាតិ និងអាហារប្រភេទ fast food បណ្ដាលឱ្យស្បែកមើលទៅគ្មានក្រៀមក្រោះគ្មានជីវិតដោយសារកង្វះសារធាតុចិញ្ចឹមចាំបាច់ដូចជា ជាតិវីតាមីន និងជាតិរ៉ែផ្សេងៗ។
៦. បញ្ហាស្ត្រេស និងថប់បារម្ភ
យោងតាមវេជ្ជបណ្ឌិតជាច្រើនបានឱ្យដឹងថាស្ត្រេសអាចបណ្ដាលឱ្យមានភាពប្រែប្រួលក្នុងចរន្តឈាមហូរ។ លើសពីនេះទៅទៀតស្ត្រេសអាចបង្កើនអត្រានៃកោសិកាស្បែកដែលងាប់ៗដែលធ្វើឱ្យស្បែកមើលទៅដូចគ្មានជីវិត។ រីឯបញ្ហាថប់បារម្ភវិញ អាចបណ្ដាលឱ្យការផ្គត់ផ្គង់ឈាមត្រូវបានបង្វែរទៅសរីរាង្គខាងក្នុងដែលបណ្ដាលឱ្យស្បែកប្រែជាមើលទៅស្លេកស្លាំង។
៧. ជំងឺមហារីក
ជំងឺមហារីកប៉ុន្មានប្រភេទអាចបណ្ដាលឱ្យស្បែកមានភាពស្លេកស្លាំង។ ជាឧទាហរណ៍ ជំងឺមហារីកសួតដែលអាចធ្វើឱ្យអ្នកជំងឺពិបាកក្នុងការដកដង្ហើមបានស្រួល ឬត្រឹមត្រូវ។ ជាលទ្ធផលសរីរាង្គផ្សេងៗក្នុងរាងកាយ រួមទាំងស្បែក គឺខ្វះអុកស៊ីសែន។
- ពេលណាគួរទៅជួបពិនិត្យជាមួយគ្រូពេទ្យជំនាញ?
ប្រសិនបើភាពស្លេកស្លាំងជារោគសញ្ញាតែមួយគត់ អ្នកមិនចាំបាច់ព្រួយខ្លាំងទៅជួបពិនិត្យជាមួយគ្រូពេទ្យភ្លាមឡើយ។ ទោះជាយ៉ាងណាប្រសិនបើពណ៌នៃស្បែកហាក់ដូចជាមិនត្រឡប់មកធម្មតាវិញ ឬប្រែជាធ្ងន់ធ្ងរជាងមុន ចូរកុំស្ទាក់ស្ទើនឹងទៅជួបពិគ្រោះជាមួយគ្រូពេទ្យជំនាញជាពិសេសប្រសិនបើអមមកជាមួយនូវអាការៈក្ដៅខ្លួនខ្លាំង, រោគសញ្ញាណាមួយនៃការឆ្លងមេរោគដូចជាហើមកូនកណ្ដុរ ឬហើមរបួស, ឈឺចាប់ក្នុងពោះ ស្បែក ឬភ្នែកប្រែជាពណ៌លឿង។ ក្នុងករណីមានហូរឈាម ពិបាកដកដង្ហើម ភាពខ្លីនៃដង្ហើម ឬភាពស្លេកស្លាំងកើតមានលើទារកទើបនឹងកើតដែលមានឆ្លងរោគផ្លូវដង្ហើម ត្រូវប្រញាប់ទៅជួបគ្រូពេទ្យជាបន្ទាន់៕