Join with Health.com.kh on Telegram

អ្នកមិនចាំបាច់ត្រូវតែទិញម៉ាសបិតមុខដែលមានដាក់លក់ជាច្រើននៅតាមបណ្ដាទីផ្សារមកប្រើប្រាស់ទើបអាចដោះស្រាយបញ្ហាស្បែកមុខផ្សេងៗឡើយ។(អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ធ្លាប់ដឹងទេថាអ្នកអាចប្រើប្រាស់គ្រឿងផ្សំធម្មជាតិដើម្បីផលិតជាម៉ាសបិតមុខដោយខ្លួនឯងបាននៅផ្ទះបាន? ងាយណាស់! ខាងក្រោមវេបសាយសុខភាព  Health.com.kh នឹងបង្ហាញពីម៉ាសបិតមុខបែបធម្មជាតិដោះស្រាយបញ្ហាស្បែកមុខបានជាច្រើន ៖

១. រូបមន្តម៉ាសបិតមុខជួយឱ្យស្បែកមុខភ្លឹរលោង

អ្វីដែលអ្នកត្រូវធ្វើ គឺគ្រាន់តែកិនត្រសក់ ១ផ្លែ និងបន្ថែមរមៀត ១ស្លាបព្រាកាហ្វេចូល។ កូរឱ្យសព្វ សឹមលាបល្បាយលើស្បែក និងរងចាំសម្រាប់រយៈពេលពី ១០ ទៅ ១៥នាទី។ លាងសម្អាតចេញជាមួយទឹកធម្មតា។ អ្នកក៏អាចប្រើប្រាស់រូបមន្តផ្លែបឺរនិងទឹកឃ្មុំ ដោយអ្វីដែលអ្នកត្រូវធ្វើ គឺគ្រាន់តែកិនផ្លែបឺរ ១ផ្លែឱ្យម៉ដ្ឋ បន្ទាប់មកបន្ថែមទឹកឃ្មុំ ១ស្លាបព្រាចូល។ កូរឱ្យសព្វ សឹមលាបល្បាយលើស្បែកមុខ និងរងចាំសម្រាប់រយៈពេល ១៥នាទី។ លាងសម្អាតចេញជាមួយទឹកធម្មតាជាការស្រេច។

២. រូបមន្តម៉ាសបិតមុខសម្រាប់ស្បែកងាយឡើងមុន ឬស្បែកមុខខ្លាញ់

អ្វីដែលអ្នកត្រូវការ គឺគ្រាន់តែផ្នែកពណ៌សនៃស៊ុត ១គ្រាប់ជាមួយទឹកក្រូចឆ្មារស្រស់ ១ស្លាបព្រាកាហ្វេ។ អ្វីដែលអ្នកត្រូវធ្វើ គឺជាដំបូងត្រូវកូរវឹកផ្នែកពណ៌នៃស៊ុតឱ្យសព្វសិន បន្ទាប់មកសឹមបន្ថែមទឹកក្រូចឆ្មារចូល។ កូរឱ្យសព្វចូលគ្នា រួចលាបម៉ាស្សាល្បាយលើស្បែកមុខ។ រងចាំសម្រាប់រយៈពេលពី ១០ ទៅ ១៥នាទី ឬរហូតដល់ស្ងួត។ លាងសម្អាតចេញជាមួយទឹកក្ដៅឧណ្ហៗ។

៣. រូបមន្តម៉ាសបិតមុខសម្រាប់កម្ចាត់ស្នាមអ៊ុចខ្មៅលើស្បែក ឬស្នាមមុន

អ្វីដែលអ្នកត្រូវធ្វើ គឺលាយទឹកឃ្មុំ ១ស្លាបព្រាបាយជាមួយទឹកក្រូចឆ្មារស្រស់ ១ស្លាបព្រាកាហ្វេ រួចកូរឱ្យសព្វ សឹមលាបល្បាយលើស្បែក។ រងចាំរហូតដល់ម៉ាសស្ងួតសឹមលាងសម្អាតចេញ។

៤. រូបមន្តម៉ាសបិតមុខសម្រាប់កម្ចាត់កោសិកាស្បែកងាប់ៗ និងភាពកខ្វក់

អ្វីដែលអ្នកត្រូវធ្វើ គឺគ្រាន់តែលាយទឹកដោះគោស្រស់ ១ ស្លាបព្រាបាយជាមួយកាហ្វេដែលកិនម៉ដ្ឋ ១ ស្លាបព្រាបាយ។ កូរឱ្យសព្វ សឹមលាបម៉ាស្សាល្បាយលើស្បែកមុខ។ ទុកចោលសម្រាប់រយៈពេលយ៉ាងហោចណាស់ពី ១៥ ទៅ ២០ នាទីសិន មុននឹងលាងសម្អាតចេញជាមួយទឹកត្រជាក់។ អ្នកអាចប្រើប្រាស់ម៉ាសបិតមុខនេះពី ២ ទៅ ៣ ដងក្នុងមួយសប្តាហ៍។

៥. រូបមន្តម៉ាសបិតមុខសម្រាប់បំបាត់ស្នាមជ្រីវជ្រួញ

អ្វីដែលអ្នកត្រូវការ គឹការ៉ុត ១មើម និងទឹកឃ្មុំ ២ស្លាបព្រាកាហ្វេ។ អ្វីដែលអ្នកត្រូវធ្វើ គឺដំបូងលាងសម្អាតការ៉ុតជាមុនសិន សឹមកាត់ជាដុំតូចៗ។ បន្ទាប់មកចាក់ការ៉ុតចូលក្នុងម៉ាស៊ីនកិនក្រឡុក។ កិនការ៉ុតឱ្យម៉ដ្ឋ រួចសឹមបន្ថែមទឹកឃ្មុំចូល និងកូរឱ្យសព្វ។ បន្ទាប់មកគ្រាន់តែលាបម៉ាស្សាល្បាយលើមុខ និងរងចាំសម្រាប់រយៈពេល ២០នាទី សឹមលាងសម្អាតចេញជាមួយទឹកធម្មតាជាការស្រេច។ ចូរអនុវត្តឱ្យបាន ២ដងក្នុងមួយសប្តាហ៍ជាការស្រេច។