អ្នកប្រើប្រាស់រថយន្តមួយចំនួនតែងលើកឡើងថារថយន្តរបស់ពួកគេស៊ីសាំងជាងរថយន្តអ្នកដទៃដែលមានម៉ាស៊ីនទំហំប៉ុនគ្នា។ តែពួកគេប្រហែលជាមិនបានចាប់អារម្មណ៍ទៅលើការប្រើប្រាស់និងការថែទាំចំពោះរថយន្តរបស់ពួកគេនោះទេ។ ដូចនេះ Sabay សូមធ្វើការណែនាំនូវវិធីសាស្ត្រមួយចំនួនដែលអាចជួយធ្វើឲ្យរថយន្តរបស់អ្នកមិនសូវស៊ីសាំងបាន៖
១. ជាន់ហ្គ៊ែថ្នមៗចៀសវាងការជាន់បង្ខំ
ធ្វើដូចនេះម៉ាស៊ីនអាចដំណើរការតាមសម្រួល ដែលវាមិនសូវប្រើសាំងច្រើន ហើយបើអ្នកចង់បង្កើនល្បឿនអ្នកអាចជាន់សង្កាត់ហ្គ៊ែថ្នមៗបន្តិចម្តងៗបាន។
២. កាត់បន្ថយការប្រើហ្វ្រាំង
ប្រសិនអ្នកចង់ឲ្យរថយន្តបន្ថយល្បឿន អ្នកគួរបន្ថយហ្គ៊ែពីចម្ងាយ ប្រសើរជាងការប្រើហ្វ្រាំង។ តែគួរប្រើហ្រ្វាំងបើចាំបាច់។
៣. ប្រើប្រាស់មុខងារ Cruise Control
សម្រាប់ការបើកបរក្នុងស្ថានភាពផ្លូវឆ្ងាយហើយមិនសូវមានចរាចរណ៍អ្នកត្រូវប្រើមុខងារ Cruise Control ដែលជាមុខងារសម្រាប់កំណត់នូវល្បឿនថេរក្នុងកម្រិតណាមួយរបស់រថយន្ត។
៤. មិនគួរបើកកញ្ចក់ពេលបើកបរ
ប្រសិនអ្នកបើកកញ្ចក់ពេលបើកបរវាហាក់បីដូចជាការបន្ថែមសម្ពាធដល់រថយន្តផងដែរ។
៥. ចតឡានក្រោមម្លប់
ការធ្វើដូចនេះវាអាចជួយធ្វើឲ្យសាំងក្នុងរថយន្តរបស់អ្នកមិនហើរចេញមក។ សូមចាំថាសាំងជាសារធាតុរាវ ដែលអាចហើររលាយដោយសារកម្ដៅ។
៦. បិទគ្រឿងអេឡិចត្រូនិកឲ្យអស់មុនពន្លត់ម៉ាស៊ីន
អ្នកគួរបិទគ្រឿងអេឡិចត្រូនិកដូចជាម៉ាញ៉េ និងម៉ាស៊ីនត្រជាក់មុនពេលអ្នកពន្លត់ម៉ាស៊ីនរថយន្ត។ ព្រោះថាម៉ាស៊ីននឹងមិនប្រឹងខ្លាំងពេលបញ្ឆេះម៉ាស៊ីនសាជាថ្មី។