Join with Health.com.kh on Telegram

បញ្ហាខ្លាញ់រុំថ្លើម គឺជាមូលហេតុចម្បងបំផុតមួយនៃជំងឺខ្សោយថ្លើម ហើយអាចវិវត្តន៍ទៅជាជំងឺក្រិនថ្លើម ឬជំងឺរលាកថ្លើម។ ( អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ប៉ុន្តែមិនថាអ្នកកំពុងជួបប្រទះបញ្ហាខ្លាញ់រុំថ្លើមប្រភេទណានោះទេអ្នកអាចទប់ស្កាត់ស្ថានភាពមុននឹងឈានដល់ដំណាក់កាលធ្ងន់ធ្ងរបាន ដោយគ្រាន់តែជ្រើសរើសនិងរក្សាអោយបាននូវរបបអាហារមួយដែលត្រឹមត្រូវ។ ថាតើអាហារដែលអ្នកជំងឺខ្លាញ់រុំថ្លើមគួរទទួលទានឲ្យបានច្រើនមានអ្វីខ្លះទៅ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីអាហារទាំងនោះ ៖

១. ប្រូតេអ៊ីន

អាហារសម្បូរប្រូតេអ៊ីន គឺចាំបាច់គួររួមបញ្ចូលក្នុងរបបអាហារប្រចាំថ្ងៃសម្រាប់អ្នកដែលមានបញ្ហាខ្លាញ់រុំថ្លើម។ ប្រូតេអ៊ីន គឺល្អសម្រាប់ការលូតលាស់នៃសាច់ដុំ, ធ្វើឱ្យសុខភាពបេះដូងកាន់តែល្អប្រសើរឡើង និងសូម្បីតែមុខងារផ្សេងទៀតនៃរាងកាយ។ កង្វះប្រូតេអ៊ីនអាចបណ្ដាលឱ្យបាត់បង់ម៉ាសនៃសាច់ដុំ និងបង្កើនហានិភ័យនៃបញ្ហាសុខភាពផ្សេងទៀត។

២. ជាតិខ្លាញ់សុខភាពល្អ

អ្នកគួររួមបញ្ចូលជាតិខ្លាញ់សុខភាពល្អក្នុងរបបអាហារសម្រាប់ខ្លាញ់រុំថ្លើមក៏ព្រោះវាមានផ្ទុកសម្បូរទៅដោយអាស៊ីតខ្លាញ់អូមេហ្កា ៣។ អាស៊ីតខ្លាញ់សុខភាពល្អនេះអាចជួយកាត់បន្ថយការរលាកផ្សេងៗក្នុងរាងកាយ។

៣. បន្លែបៃតង

ក្រៅពីមានផ្ទុកសម្បូរទៅដោយសារធាតុចិញ្ចឹម វីតាមីន និងជាតិរ៉ែសំខាន់ៗហើយនោះបន្លែបៃតងក៏ជាប្រភពដ៏ប្រសើរនៃសារធាតុប្រឆាំងអុកស៊ីតកម្មដែលជួយជម្រុញពង្រឹងប្រព័ន្ធភាពស៊ាំនៃរាងកាយប្រយុទ្ធប្រឆាំងនឹងមេរោគបាក់តេរីដែលបង្កឱ្យថ្លើមទទួលរងការរលាក។ បន្លែបៃតងមិនត្រឹមតែប្រសើរជួយដោះស្រាយបញ្ហាខ្លាញ់រុំថ្លើមប៉ុណ្ណោះទេ ប៉ុន្តែល្អសម្រាប់សុខភាពរាងកាយទាំងមូលតែម្ដង។ ដូច្នេះចូរព្យាយាមទទួលទានបន្លែបៃតងឱ្យបានច្រើន។

៤. ផ្លែឈើ

ជាប្រភពដ៏ប្រសើរបំផុតនៃសារធាតុចិញ្ចឹមសំខាន់ៗដែលអ្នកគួររួមបញ្ចូលក្នុងរបបអាហារប្រចាំថ្ងៃ។ សារធាតុប្រឆាំងអុកស៊ីតកម្ម វីតាមីន និងជាតិរ៉ែក្នុងផ្លែឈើជួយពង្រឹងប្រព័ន្ធភាពស៊ាំរាងកាយប្រយុទ្ធប្រឆាំងបាក់តេរីទប់ស្កាត់ការរលាកក្នុងថ្លើម។

៥. សាច់គ្មានខ្លាញ់

ប្រភេទនៃអាហារដទៃទៀតដែលអ្នកជំងឺខ្លាញ់រុំថ្លើមគួរដាក់បញ្ចូលក្នុងរបបអាហារប្រចាំថ្ងៃ​ គឺប្រូតេអ៊ីន។ ហើយសាច់ជាប្រភពដ៏ប្រសើរនៃប្រូតេអ៊ីន ប៉ុន្តែទោះជាយ៉ាងណាប្រសិនបើអ្នកកំពុងជួបប្រទះបញ្ហាខ្លាញ់រុំថ្លើម ចូរជៀសវាងការទទួលទានសាច់ខ្លាញ់ និងស្បែក។ ដើម្បីទទួលទានជាតិប្រូតេអ៊ីនគ្រប់គ្រាន់ ការជ្រើសរើសទទួលទានសាច់គ្មានខ្លាញ់ គឺប្រសើរបំផុតសម្រាប់អ្នកជំងឺខ្លាញ់ក្នុងថ្លើម។

៦. អាហារមានផ្ទុកសម្បូរទៅដោយប្រូតេអ៊ីន

អាហារមួយប្រភេទទៀតដែលអ្នកគួររួមបញ្ចូលក្នុងរបបអាហារប្រចាំថ្ងៃ គឺអាហារមានផ្ទុកសម្បូរទៅដោយប្រូតេអ៊ីន ក៏ព្រោះវាជួយដល់ម៉ាសសាច់ដុំនិងធ្វើឱ្យឆ្អែតបានយូរម៉ោង។

៧. ផ្លែបឺរ

អ្នកក៏គួររួមបញ្ចូលផ្លែបឺរក្នុងរបបអាហារប្រចាំថ្ងៃផងដែរ ក៏ព្រោះវាជាប្រភពដ៏ប្រសើរបំផុតមួយនៃខ្លាញ់ល្អ។ ផ្លែបឺរក៏មានផ្ទុកសម្បូរទៅដោយជាតិសសៃនិងលក្ខណៈសម្បត្តិប្រឆាំងការរលាកដែលជួយបញ្ចុះជាតិស្ករក្នុងឈាមផងដែរ។

៨. ក្រូចឆ្មារ

ការទទួលទានក្រូចឆា្មរ ឬទឹកក្រូចឆ្មារ គឺជាគន្លឹះដ៏ងាយ ប៉ុន្តែមានប្រសិទ្ធភាពខ្ពស់បំផុតមួយជួយទប់ស្កាត់ហានិភ័យនៃបញ្ហាខ្លាញ់រុំថ្លើម។ នោះក៏ព្រោះតែផ្លែឈើនេះមានផ្ទុកសម្បូរទៅដោយវីតាមីន C ជម្រុញការផលិត glutathione របស់ថ្លើមដើម្បីសម្រួលដល់ដំណើរការមុខងារកាន់តែល្អប្រសើរ។

៩. គ្រាប់ធញ្ញជាតិ

ប្រសិនបើអ្នកកំពុងស្វែងរកអាហារសម្រន់ដែលអាចបន្ថែមក្នុងរបបអាហារសម្រាប់អ្នកជំងឺខ្លាញ៉រុំថ្លើមនោះ គឺកុំភ្លេចគ្រាប់ធញ្ញជាតិ។

១០. ខ្ទឹមស

ក៏មានប្រសិទ្ធភាពជួយទប់ស្កាត់ជាតិខ្លាញ់មិនអោយប្រមូលផ្ដុំក្នុងថ្លើមបានយ៉ាងប្រសើរផងដែរ។ ដូច្នេះកុំភ្លេចរួមបញ្ចូលគ្រឿងទេសនេះក្នុងរបបអាហារ។

១១. ប៉េងប៉ោះ

មានផ្ទុកសារធាតុ glutathione ដែលជួយសម្អាតថ្លើម។ លើសពីនេះទៅទៀត ប៉េងប៉ោះក៏ជាប្រភពដ៏ប្រសើរនៃសារធាតុ lycopene ដែលជួយទប់ស្កាត់ជំងឺផ្សេងៗ រួមទាំងជំងឺខ្លាញ់រុំថ្លើម មហារីកថ្លើម មហារីកស្បែក មហារីកសុដន់ និងមហារីកសួតផងដែរ។

១២. បន្លែឆ្អិន

បើទោះជាអ្នកចូលចិត្តទទួលទានតែបន្លែឆៅយ៉ាងណាក៏ដោយ ក៏គួរតែបន្ថែមបន្លែឆ្អិនក្នុងរបបអាហារប្រចាំថ្ងៃផង ដើម្បីរក្សាបាននូវកម្រិតត្រឹមត្រូវនៃជាតិកាបូអ៊ីដ្រាតក្នុងប្រព័ន្ធរាងកាយ។ អ្នកអាចបំពេញជាតិស្ករ ឬកាបូអ៊ីដ្រាតដែលបាត់តាមរយៈការទទួលទានបន្លែឆ្អិននានាលើកលែងតែដំឡូងបារាំង។

សម្គាល់៖ ក្រៅពីរក្សាបាននូវរបបអាហារល្អហើយនោះ ដើម្បីរក្សាបាននូវសុខភាពថ្លើមប្រសើរអ្នកក៏គួរព្យាយាមធ្វើលំហាត់ប្រាណ ឈប់ជក់បារី រក្សាទម្ងន់ត្រឹមត្រូវ គេងឱ្យបានគ្រប់គ្រាន់ មិនទប់នោមយូរនិងកាត់បន្ថយ ឬផ្អាកការទទួលទានគ្រឿងស្រវឹងផងដែរ៕