ការរោលរលាកក្រោយកោររោមរួចជាញឹកញយច្រើនកើតមានចំពោះបុរស ប៉ុន្តែក៏មិនមែនមានន័យថាស្ត្រីមិនដែលជួបប្រទះនោះឡើយ។ មនុស្សអាចជួបបញ្ហានេះក្រោយពេលពួកគេកោររោមជើង រោមក្លៀក ឬសូម្បីតែរោមមុខដែលមិនចង់មាន។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ការរោលរលាកនេះអាចបណ្ដាលមកពីកត្តាជាច្រើនរួមបញ្ចូលទាំងផ្លែឡាមមិនមុត ការកោររោមទាំងស្បែកស្ងួត និងបញ្ហាស្បែកឆាប់ប្រតិកម្មជាដើម។ ប៉ុន្តែកុំបារម្ភពេក! ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីរូបមន្តបែបធម្មជាតិដើម្បីព្យាបាលការរោលរលាកនេះ ព្រមទាំងគន្លឹះទប់ស្កាត់ ៖
- រូបមន្តព្យាបាល
១. ការស្អំត្រជាក់
រូបមន្តនេះមិនត្រឹមតែជួយបន្ថយការរលាកប៉ុណ្ណោះទេ ប៉ុន្តែក៏បំបាត់អាការៈរមាស់និងការឡើងក្រហមនៃស្បែកផងដែរ។ អ្វីដែលអ្នកត្រូវធ្វើ គឺគ្រាន់តែប្រើប្រាស់ដុំទឹកកកខ្ចប់ ឬរុំក្នុងកូនកន្សែងស្អាតមួយបន្ទាប់មកដាក់ស្អំលើតំបន់ស្បែកដែលមានបញ្ហា។ រងចាំរហូតដល់ប្រែជាក្ដៅឧណ្ហៗ ឬពី ២ ទៅ ៣នាទី។ អនុវត្តសារឡើងវិញច្រើនដងក្នុងមួយថ្ងៃដើម្បីឆាប់ជាសះស្បើយ។
២. ទឹកខ្មេះផ្លែប៉ោម
អ្វីដែលអ្នកត្រូវធ្វើ គឺគ្រាន់តែលាយទឹកខ្មេះផ្លែប៉ោមក្នុងបរិមាណស្មើគ្នាជាមួយទឹកធម្មតា បន្ទាប់មកប្រើប្រាស់ដុំសំឡីជ្រលក់ក្នុងទឹកល្បាយ រួចលាបលើតំបន់ស្បែកដែលទទួលរងផលប៉ះពាល់។ រងចាំរហូតដល់ស្ងួត សឹមលាងសម្អាតចេញជាមួយទឹកក្ដៅឧណ្ហៗ។
៣. ថ្នាំគ្រាប់អាស្ពីរីន
រូបមន្តនេះក៏ជួយបន្ថយការឈឺចាប់ផងដែរ។ អ្វីដែលអ្នកត្រូវធ្វើ គឺគ្រាន់តែដាក់ថ្នាំគ្រាប់អាស្ពីរីន ២គ្រាប់ក្នុងពែងតូចមួយ រួចបន្ថែមទឹកក្ដៅ ១ស្លាបព្រាកាហ្វេចូល។ រំលាយថ្នាំគ្រាប់អាស្ពីរីនរហូតដល់ក្លាយជាល្បាយខាប់ៗ។ បន្ទាប់មកប្រើប្រាស់ល្បាយនេះលាបលើតំបន់ស្បែកដែលទទួលរងផលប៉ះពាល់និងរងចាំសម្រាប់រយៈពេល ១០នាទី។ លាងសម្អាតចេញជាមួយទឹកក្ដៅឧណ្ហៗ។ អនុវត្តឱ្យបាន ២ដងក្នុងមួយថ្ងៃ។
៤. ប្រទាលកន្ទុយក្រពើ
អ្វីដែលអ្នកត្រូវធ្វើ គឺគ្រាន់តែលាបជែលប្រទាលកន្ទុយក្រពើស្រស់ៗ ឬផលិតផលផ្ដល់សំណើមដល់ស្បែកដែលមានផ្ទុកប្រទាលកន្ទុយក្រពើសុទ្ធលើតំបន់ស្បែកដែលមានបញ្ហា។ លាយជែលប្រទាលកន្ទុយក្រពើ និងរងចាំរហូតដល់ស្ងួត។ លាងជម្រះចេញជាមួយទឹកត្រជាក់ រួចអនុវត្តសារឡើងវិញពី ២ ទៅ ៣ដងក្នុងមួយថ្ងៃ។
- គន្លឹះទប់ស្កាត់បញ្ហា
– ប្រើប្រាស់ផ្លែឡាមដែលមុតនិងកុំភ្លេចគ្រីមសម្រាប់លាបពេលកោររោម។
– កម្រិតការប្រើប្រាស់កម្លាំង ឬសម្ពាធនៅពេលកោររោម៕