ចេកគឺជាផ្លែឈើម្យ៉ាងដែលអាចផ្តល់អត្ថប្រយោជន៍ច្រើនណាស់ដល់អ្នក វាអាចជួយបំបាត់អាការៈទល់លាមក ស្រកទម្ងន់ ធ្វើឲ្យស្បែកទន់ បង្កើនប្រាជ្ញារបស់អ្នក បញ្ចុះសម្ពាធឈាម និងអាចជួយការពារអ្នកមិនឲ្យមានជំងឺខ្វះឈាមឡើយ ដូចនេះតើមានបង្អែមអ្វីខ្លះដែលអាចយកចេកមកធ្វើនោះ?
នំចេក
គ្រឿងផ្សំ ៖ ចេក ពងមាន់ ម្សៅមី ទឹកដោះគោ ស្ករស។
របៀបធ្វើ ៖ ដំបូងអ្នកត្រូវតែយកចេកមកកិនឲ្យម៉ត់ជាមុនសិន រីឯពងមាន់វិញ អ្នកយកតែផ្នែកលឿងបានហើយ បន្ទាប់មកអ្នកអាចយកគ្រឿងផ្សំទាំងអស់លាយបញ្ចូលគ្នាដូចជា ៖ ចេក ពងមាន់ផ្នែកលឿង ម្សៅមី និងទឹកដោះគោស្រស់លាយបញ្ចូលគ្នា ចុងក្រោយទើបចាក់ប្រេងចូលទៅក្នុងខ្ទះបន្តិច ហើយចាក់គ្រឿងផ្សំដែលអ្នកលាយរួចហើយចូលទៅចៀនជាការស្រេច នោះអ្នកនឹងអាចទទួលបាននំដែលឆ្ងាញ់ជាមិនខានឡើយ។
នំចេកចំហុយ
គ្រឿងផ្សំ ៖ ពងមាន់ផ្នែកលឿង ទឹកដោះគោ និងផ្លែចេក។
របៀបចម្អិន ៖ ដំបូងអ្នកត្រូវតែចាក់ពងមាន់ផ្នែកលឿងចូលទៅក្នុងចាន រួចវ៉ៃវាឲ្យសព្វ បន្ទាប់មកទើបចាក់ទឹកដោះគោចូល រួចទើបដាក់ចេកដែលកិនរួចចូលទៅលាយជាមួយ ហើយកូរវាឲ្យសព្វ ទើបយកវាទៅចំហុយចំនួនពី១០ទៅ១៥នាទីជាការស្រេច អ្នកនឹងអាចភ្លក់រសជាតិថ្មីជាមិនខានឡើយ៕