ការមានគភ៌ ក្នុងរយៈពេល ៤០សប្តាហ៍គឺជា ការជំនះនឹងភាពពិបាកនៃរាងកាយរបស់អ្នក។ កាលបើអ្នកចាប់ផ្តើមមានរូបរាងកាយកាន់តែសមសួន នោះអ្នកនឹងកាន់តែមានភាពល្អប្រសើរ ប៉ុន្តែវាមិនដែលយឺតពេលសំរាប់អ្នកក្នុងការចាប់ផ្តើមធ្វើវានោះទេ។
ការមានកាយសម្បទាមាំមួន នឹងជួយធ្វើអោយការមានគភ៌របស់អ្នក កាន់តែមានភាពរីករាយ, ជួយអ្នកកំឡុងពេលនៃការសម្រាល និង ជួយធ្វើអោយអ្នកដោះស្រាយនឹងតំរូវការរបស់ទារកបានកាន់តែល្អជាងមុន។ តែទោះជាយ៉ាងណាក៏ដោយ វាពិតជាល្អបំផុតសំរាប់អ្នក ក្នុងការនិយាយជា មួយវេជ្ជបណ្ឌិត ឬ ឆ្មបនៅពេលដំបូងនៃការចាប់មានគភ៌របស់អ្នក ដើម្បីធ្វើការពិភាក្សាពីលំហាត់ប្រាណប្រភេទណា ដែលសាកសមសំរាប់អ្នក ។
តើលំហាត់ប្រាណប្រភេទណាដែលសាកសមនឹងរយៈពេលនៃការមានគភ៌?
ច្បាប់ជាមូលដ្ឋានគ្រឹះនោះគឺ អ្នកត្រូវស្តាប់រាងកាយរបស់អ្នក និង មិនត្រូវអនុវត្តវាអោយជ្រុលនោះទេ។
• សកម្មភាពដែលសាកសមជាពិសេស ក្នុងរយៈពេលនៃការមានគភ៌រួមមានដូចជា ការដើរដោយប្រើកំលាំងក្នុងកំរិតមធ្យម, ការហែលទឹក, ការរាំ, ការធាក់កង់នៅនឹងកន្លែង និង ការទាញសន្ធឹងសាច់ដុំថ្នមៗ ដូចជាការហាត់យូហ្គាមុនពេលសម្រាល។
• ការអភិវឌ្ឍន៍កំលាំងសាច់ដុំថ្នមៗនឹងជួយគ្រប់គ្រងការផ្លាស់ប្តូរនៃរាងកាយរបស់អ្នកកំឡុងពេល នៃការមាន គភ៌ និងភាពមិនសុកស្រួលមួយចំនួនដូចជា ការឈឺចង្កេះ, សន្លាក់ និង ការយារធ្លាក់នៃឆ្អឹងអាងត្រគាក ។
ការមានអារម្មណ៍មាំមួននៅក្នុងរាងកាយរបស់អ្នក នឹងជួយអោយអ្នកមានអារម្មណ៍ល្អចំពោះខ្លួនឯងផងដែរ
• ប្រសិនបើអ្នកធ្លាប់បានធ្វើលំហាត់ប្រាណមុនពេលមានគភ៌ពីមុនមក អ្នកប្រហែលជាអាចត្រូវផ្លាស់ប្តូររបៀបហាត់ប្រាណមួយចំនួន ។
• វាមិនមែនជាគំនិតដ៏ល្អសំរាប់អ្នក ក្នុងការចាប់យកកីឡាដែលត្រូវប្រើកំលាំងខ្លាំងនោះទេ ដូចជាការធាក់កង់នៅខាងក្រៅផ្ទះ, ការលេងតេនីស ឬ រត់ត្រេះៗ ជាពិសេសប្រសិនបើអ្នកមិនធ្លាប់ធ្វើវាពីមុនមកនោះ។
ប្រសិនបើអ្នកធ្លាប់ធ្វើសកម្មភាព ទាំងនេះមុនពេលអ្នកមានគភ៌ សូមធ្វើការពិភាក្សាជាមួយវេជ្ជបណ្ឌិតឬ ឆ្មបថាតើអ្នកគួរបន្តការធ្វើកីឡាទាំងនេះ ក្នុងរយៈពេលប៉ុន្មាន និង ក្នុងភាពស្វាហាប់កំរិតណា?
គិតអំពីពេលវេលាបច្ចុប្បន្ននេះថាជាឱកាសដ៏ល្អ ជំនួសអោយភាពមិនសុខស្រួល
បច្ចេកវិទ្យាទំនើបទាន់សម័យជាច្រើន បានកាត់បន្ថយនូវតំរូវការសកម្មភាពរាងកាយបន្តិចបន្តួចរបស់ពួកយើងនៅក្នុងជីវិតប្រចាំថ្ងៃ។ ប៉ុន្តែខ្លួនប្រាណរបស់មនុស្សត្រូវបានរៀបចំឡើង ដើម្បីធ្វើចលនា។ កាលបើយើងក្លាយទៅជាមិនសូវមានចលនា នោះយើងនឹងមានការកើនទំងន់ និង ជួបនូវបញ្ហាសុខភាពបន្ថែមទៀត។ ចូរគិតអំពីប្រភេទនៃការធ្វើចលនាណាមួយ ដើម្បីជាវិធីមួយដែលអាចអោយអ្នកអភិវឌ្ឍសុខភាពរបស់អ្នក ។
ធ្វើខ្លូនអោយសកម្មជារៀងរាល់ថ្ងៃ នៅក្នុងវិធីណាក៏ដោយតាមដែលអ្នកអាចធ្វើបាន
• ការធ្វើខ្លួនអោយសកម្មនៅក្នុងស្ថានភាពសាមញ្ញណាមួយ គឺហាក់ដូចជាផ្តល់អោយស្ទើរតែរាល់គ្នា នូវគុណ
សម្បត្តិផ្នែកសុខភាព មិនថាពួកគេមានអាយុ, ទម្ងន់ប៉ុន្មាន,ស្ថានភាពសុខភាពយ៉ាងណា ឬ មានពិការភាពក៏ដោយ ។
• អនុវត្តវាអោយបានយ៉ាងហោចណាស់ ៣០នាទីនៃសកម្មភាពរាងកាយជាមធ្យម អោយបានជាច្រើនថ្ងៃ។
• ធ្វើសកម្មភាពក្នុងកម្រិតសមល្មម រួមមានដូចជា ការដើរញាប់ៗ ឬ ការហែលទឹកក្នុងចំងាយជាមធ្យម។
អ្នកអាចប្រើវិធីនិយាយ។ អ្នកគួរតែអាចធ្វើការសន្ទនាខណៈពេលដែលអ្នកកំពុងធ្វើលំហាត់ប្រាណ។
• អ្នកអាចធ្វើការរួមបញ្ចូលនូវសកម្មភាពខ្លីផ្សេងៗគ្នា ដែលមានរយៈពេលនីមួយៗប្រហែលជា ១០ ទៅ ១៥នាទី សរុបមកត្រឹម ៣០នាទី ឬ ច្រើនជាងនេះ។
• ប្រសិនបើអ្នកធ្លាប់ពិនិត្យសុខភាពជាមួយវេជ្ជបណ្ឌិត ឬ គ្រូពេទ្យជំនាញផ្នែកសម្ភព អ្នកប្រហែលជាអាចរីករាយនឹងការធ្វើលំហាត់ប្រាណបានយ៉ាងស្វាហាប់ និងទៀតទាត់ សំរាប់ការទទួលបានសុខភាព និង កាយសម្បទាមាំមួនបន្ថែមទៀត ៕