Join with Health.com.kh on Telegram

​កុមារ​អាច​កើត​ជំងឺ​ទឹកនោមផ្អែម​ប្រភេទ​១ និង​ប្រភេទ​២​។ ការគ្រប់គ្រង​ជាតិ​ស្ករ​ក្នុង​ឈាម គឺមាន​សារៈសំខាន់​ជាពិសេស​ចំពោះ​មនុស្ស​វ័យក្មេង ព្រោះ​ជំងឺ​នេះ​អាច​បំផ្លាញ​សរីរាង្គ​សំខាន់ៗ ដូចជា បេះដូង និង​តម្រងនោម​។

-​ជំងឺ​ទឹកនោមផ្អែម​ប្រភេទ ១
​ទំរង់​ស្វ័យ​ស៊ាំ​នៃ​ជំងឺ​ទឹកនោមផ្អែម ច្រើនតែ​ចាប់ផ្តើម​ក្នុង​វ័យ​កុមារភាព​។ រោគសញ្ញា​សំខាន់​មួយ គឺ​ការ​នោម​ញឹក​។ កុមារ​ដែលមាន​ជំងឺ​ទឹកនោមផ្អែម​ប្រភេទ​ទី​១ អាច​ចាប់ផ្តើម​គេង​នោម ទោះបី​ពួកគេ​បានដឹង​ការ​ទៅ​បង្គន់​ដោយ​ខ្លួនឯង​ហើយ​ក្តី​។​

​ការ​ស្រេកទឹក​ខ្លាំង អស់កម្លាំង និង​ឃ្លាន ក៏​ជា​រោគសញ្ញា​នៃ​ស្ថានភាព​នេះដែរ​។ វា​សំខាន់​ណាស់ ដែល​កុមារ​ដែលមាន​ជំងឺ​ទឹកនោមផ្អែម​ប្រភេទ​១ ត្រូវបាន​ព្យាបាល​ភ្លាមៗ​។ ជំងឺ​នេះ អាច​បណ្តាលឱ្យមាន​ជាតិ​ស្ករ​ក្នុង​ឈាម​ខ្ពស់ និង​ខ្វះ​ជាតិ​ទឹក ដែល​អាចជា​ការសង្គ្រោះ​បន្ទាន់​ខាង​វេជ្ជសាស្ត្រ​។

-​ជំងឺ​ទឹកនោមផ្អែម​ប្រភេទ​ទី​២
​ជំងឺ​ទឹកនោមផ្អែម​ប្រភេទ​១ ធ្លាប់​ត្រូវបាន​គេ​ហៅថា “​ទឹកនោមផ្អែម​អនីតិជន​” ពីព្រោះ​ប្រភេទ​ទី​២ កម្រ​កើតមាន​ណាស់​ចំពោះ​កុមារ​។ ឥឡូវនេះ ដែល​កុមារ​កាន់តែ​ច្រើនឡើង​ទម្ងន់ ឬ​ធាត់​, ជំងឺ​ទឹកនោមផ្អែម​ប្រភេទ​ទី​២ កំពុង​កើតមាន​ជាទូទៅ​នៅក្នុង​ក្រុម​អាយុ​នេះ​។​

​ប្រហែលជា ៤០ ភាគរយ​នៃ​កុមារ ដែលមាន​ជំងឺ​ទឹកនោមផ្អែម​ប្រភេទ​២ មិនមាន​រោគសញ្ញា​អ្វី​ឡើយ​។ ជារឿយៗ​ជំងឺ​នេះ ត្រូវបាន​គេ​ធ្វើ​រោគវិនិច្ឆ័យ​ឃើញ​ក្នុងអំឡុងពេល​ពិនិត្យ​រាងកាយ​។​

​ជំងឺ​ទឹកនោមផ្អែម​ប្រភេទ​ទី​២ ដែល​មិនបាន​ព្យាបាល អាច​បង្កឱ្យមាន​ផលវិបាក​ពេញ​មួយជីវិត រួមមាន​ជំងឺ​បេះដូង ជំងឺ​តម្រងនោម និង​ពិការភ្នែក​។ ការ​ញ៉ាំ និង​ហាត់ប្រាណ ដែលមាន​សុខភាព​ល្អ អាចជួយ​ឱ្យ​កូន​អ្នកគ្រប់គ្រង​ជាតិ​ស្ករ​ក្នុង​ឈាម និង​ការពារ​បញ្ហា​ទាំងនេះ​៕