ការបរិភោគអាហារ ដែលមានសុខភាពល្អ គឺជាផ្នែកសំខាន់មួយនៃការគ្រប់គ្រងជំងឺទឹកនោមផ្អែម។ ក្នុងករណីខ្លះ ការផ្លាស់ប្តូររបបអាហាររបស់អ្នក អាចគ្រប់គ្រាន់ដើម្បីគ្រប់គ្រងជំងឺ។
-ជំងឺទឹកនោមផ្អែមប្រភេទ ១
កម្រិតជាតិស្ករក្នុងឈាមរបស់អ្នកកើនឡើង ឬធ្លាក់ចុះអាស្រ័យលើប្រភេទអាហារដែលអ្នកញ៉ាំ។ អាហារដែលមានជាតិម្សៅ ឬជាតិស្ករ ធ្វើឱ្យកម្រិតជាតិស្ករក្នុងឈាមកើនឡើងយ៉ាងឆាប់រហ័ស។ ប្រូតេអ៊ីន និងខ្លាញ់ បណ្តាលឱ្យមានការកើនឡើងជាលំដាប់។
ក្រុមគ្រូពេទ្យរបស់អ្នកអាចណែនាំឱ្យអ្នកកំណត់បរិមាណកាបូអ៊ីដ្រាត ដែលអ្នកញ៉ាំក្នុងមួយថ្ងៃ។ អ្នកក៏ត្រូវថ្លឹងថ្លែងនូវការទទួលទានកាបូអ៊ីដ្រាតជាមួយនឹងកម្រិតអាំងស៊ុយលីនរបស់អ្នកផងដែរ។
ធ្វើការជាមួយអ្នកជំនាញខាងចំណីអាហារ ដែលអាចជួយអ្នករៀបចំគំរោងអាហារទឹកនោមផ្អែម។ ការទទួលបានតុល្យភាពជាតិប្រូតេអ៊ីន ខ្លាញ់ និងកាបូអ៊ីដ្រាត ត្រឹមត្រូវ អាចជួយអ្នកក្នុងការគ្រប់គ្រងជាតិស្ករក្នុងឈាម។
-ជំងឺទឹកនោមផ្អែមប្រភេទទី ២
ការទទួលទានប្រភេទអាហារត្រឹមត្រូវ អាចគ្រប់គ្រងជាតិស្ករក្នុងឈាមរបស់អ្នក និងជួយឱ្យអ្នកស្រកទំងន់ដែលលើស។
ការរាប់សមាសធាតុកាបូន គឺជាផ្នែកសំខាន់មួយនៃការញ៉ាំសម្រាប់ជំងឺទឹកនោមផ្អែមប្រភេទទី ២ ។ អ្នកឯកទេសខាងចំណីអាហារ អាចជួយអ្នកក្នុងការស្វែងយល់ពីចំនួនកាបូអ៊ីដ្រាតប៉ុន្មានក្រាមក្នុងពេលទទួលទានម្តងៗ។
ដើម្បីធ្វើឱ្យកម្រិតជាតិស្ករក្នុងឈាមរបស់អ្នកមានស្ថេរភាព សូមព្យាយាមញ៉ាំអាហារតូចៗ ពេញមួយថ្ងៃ។ សង្កត់ធ្ងន់លើអាហារ ដែលមានសុខភាពល្អដូចជា៖
.ផ្លែឈើ
.បន្លែ
.ធញ្ញជាតិទាំងមូល
.ប្រូតេអ៊ីនគ្មានខ្លាញ់ដូចជា សាច់បក្សី និងត្រី
.ខ្លាញ់ដែលមានសុខភាពល្អ ដូចជា ប្រេងអូលីវ និងពពួកគ្រាប់ ។
អាហារផ្សេងទៀត អាចធ្វើឱ្យអន្តរាយដល់ការរក្សាជាតិស្ករក្នុងឈាមរបស់អ្នក។ គប្បីគ្រប់គ្រងចំណីអាហារ ដែលអ្នកគួរជៀសវាង ប្រសិនបើអ្នកមានជំងឺទឹកនោមផ្អែម៕