Join with Health.com.kh on Telegram

សក់ស្ងួតអាចបណ្ដាលមកពីកត្តាជាច្រើន ហើយប្រសិនបើអ្នកមានប្រភេទសក់បែបនេះ ចូរប្រយ័ត្នក្នុងការប្រកាន់ខ្ជាប់នូវទម្លាប់​ ឬទង្វើមួយចំនួន។(អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?)  ថាតើគួរចៀសវាងទម្លាប់អ្វីខ្លះដើម្បីថែរក្សាសក់ស្ងួតមិនឱ្យទទួលរងការបំផ្លាញកាន់តែខ្លាំង? កុំបារម្ភ! ខាងក្រោម Health.com.kh នឹងបង្ហាញឱ្យដឹងពីទង្វើដែលគួរចៀសវាងដើម្បីថែរក្សាសក់ស្ងួត ៖

១. កក់សក់ញឹកញាប់ពេក

ថាតើអ្នកគួរកក់សម្អាតសក់ប៉ុន្មានដងក្នុងមួយសប្តាហ៍ទើបប្រសើរ? ការជ្រើសរើសសាប៊ូដែលត្រឹមត្រូវក៏ជារឿងសំខាន់ផងដែរ ប្រសិនបើអ្នកមានសក់ស្ងួតគួរជ្រើសរើស សាប៊ូដែលអាចផ្តល់សំណើមដល់សក់ ឬសាប៊ូកម្រិតស្រាល។ ការប្រកាន់ខ្ជាប់នូវទម្លាប់កក់សក់ត្រឹមពី ២ ទៅ ៣ ដងក្នុងមួយសប្តាហ៍ គឺប្រសើរបំផុត។ ទម្លាប់នេះជួយរក្សាសុខភាពសក់ រួមទាំងស្បែកក្បាលដោយមិនធ្វើអោយសក់ស្ងួត ហើយងាយនឹងទទួលរងការបំផ្លាញ។

២. សិតសក់នៅពេលសក់សើម

សក់ស្ងួត គឺងាយនឹងបែកចុងណាស់ ឬដាច់ណាស់។ ប៉ុន្តែថាតើអ្នកធ្លាប់ដឹងទេថាសក់ស្ងួតសើមក៏ងាយនឹងរងគ្រោះ ឬទទួលរងការបំផ្លាញដូចគ្នា? នេះក៏ព្រោះតែសំណើមធ្វើឱ្យសសៃសក់រីកធំជាងមុននិងមានសភាពខ្សោយ ហើយនៅពេលប្រើក្រាស់សិត គឺងាយនឹងដាច់ណាស់។ ដូច្នេះដើម្បីជាការប្រសើរខណៈពេលសក់សើម ចូរប្រើប្រាស់ម្រាមដៃដើម្បីស្រាយសក់ដែលជំពាក់ ឬប្រើប្រាស់ក្រាស់សិតសក់ដែលមានធ្មេញ ឬចន្លោះធំៗ។

៣. ឧស្សាហ៍លេងស្ទាយល៍សក់

ការលេងស្ទាយល៍ ឬធ្វើម៉ូដសក់ជាប្រចាំក៏បង្កផលប៉ះពាល់ដល់ភាពរឹងមាំនៃសក់គួរឱ្យកត់សម្គាល់ ជាពិសេសចំពោះប្រភេទសក់ដែលស្ងួត។ ជាធម្មតាផលិតផលលេងស្ទាយល៍សក់មួយចំនួនធំមានផ្ទុកសារធាតុគីមីកម្រិតខ្លាំងដូចជាអាល់កុលដែលធ្វើឱ្យសក់ប្រែជាកាន់តែស្ងួតនិងផុយស្រួលឆាប់ជ្រុះ ឬដាច់លឿងជាងការប្រើប្រាស់ម៉ាស៊ីនផ្លុំសម្ងួត ម៉ាស៊ីនកៀប និងម៉ូររួញទៅទៀត! ដូច្នេះដើម្បីជាការប្រសើរចូរកម្រិតការលេងម៉ូដសក់របស់អ្នកត្រឹមយូរៗម្ដងបានហើយ៕