ការងាប់លិង្គ គឺជាបញ្ហាដែលកើតមាន ជាញឹកញាប់មួយ លើមនុស្សប្រុស ហើយយើងអាចសម្គាល់ដឹង តាមរយៈការមិនមានលទ្ធភាព រក្សាភាពរឹងរបស់លិង្គ បានគ្រប់គ្រាន់សម្រាប់ការរួមភេទ ឬមិនអាចបាញ់ទឹកកាមចេញតែម្តង។ ការងាប់លិង្គ អាចមានការប្រែប្រួល មិនទៀងទាត់ឡើយ។ វាអាចជាការគ្មានសមត្ថភាពទាំងស្រុងតែម្តង ដើម្បីទទួលបានភាពរឹង ឬបាញ់ទឹកកាមតិច ឬរឹងតែមួយភ្លែតប៉ុណ្ណោះ។
ការប្រឈមនឹងការងាប់លិង្គនេះ នឹងកើនឡើងទៅតាមអាយុកាន់តែច្រើន។ បើយោងទៅតាម សារព័ត៌មានរបស់ Journal of Urology បានឲ្យដឹងថា ចំនួនបុរសដែលមានអាយុខ្ទង់ ៦០ ឆ្នាំ គឺអាចកើតបញ្ហាងាប់លិង្គនេះ ច្រើនជាងបុរសវ័យខ្ទង់ ៤០ ឆ្នាំរហូតដល់ ៤ ដងឯណោះ។ បុរសដែលមិនសូវមានការអប់រំច្រើន ទំនងជាឆាប់ជួបបញ្ហាងាប់លិង្គនេះ ព្រោះប្រហែលជាពួកគេ មានមិនសូវចេះថែរក្សាសុខភាព ឬមានរបៀបរស់នៅមិនផ្តល់សុខភាព ញ៉ាំអាហារមិនសូវជំនួយដល់សុខភាព ផឹកស្រាច្រើន និងហាត់ប្រាណតិច។ ការហាត់ប្រាណ អាចបន្ថយការប្រឈមនឹង ការងាប់លិង្គបាន។
ការងាប់លិង្គ អាចបណ្តាលមកពីមូលហេតុផ្លូវចិត្ត ប៉ុន្តែ ភាគច្រើន គឺបញ្ហាផ្លូវកាយទៅវិញទេ។ មូលហេតុផ្លូវកាយ មានដូចជា ជំងឺ (ជំងឺទឹកនោមផ្អែម និងជំងឺលើសសម្ពាធឈាម) មានរបួស (ដូចជា ការវះកាត់ក្រពេញប្រូស្តាត) ផលរំខានរបស់ថ្នាំ (ដូចជាថ្នាំ Protease Inhibitors ដែលប្រើសម្រាប់ព្យាបាលអ្នកជំងឺអេដស៍) និងភាពមិនធម្មតា (ដូចជាជំងឺក្រិនរឹងសរសៃឈាម) ដែលវាសុទ្ធតែទៅរំខាន ដល់លំហូរឈាមក្នុងលិង្គ។ ការងាប់លិង្គ គឺជាជំងឺដែលអាចព្យាបាល បានគ្រប់វ័យទាំងអស់។ ការព្យាបាលមានដូចជា ការព្យាបាលបែបចិត្តសាស្ត្រ ប្រើឧបករណ៍បូម វះកាត់ និងការប្រើថ្នាំ (ពេញនិយមជាងគេនាពេលបច្ចុប្បន្ន)៕