ស្បែកដែលស្ងួតរបកអាចកើតមាននៅចន្លោះពេលណាមួយដែលជាញឹកញយបញ្ហានេះបង្កឡើងដោយស្រទាប់ផ្នែកខាងលើត្រូវបានបំផ្លាញ ឬទទួលរងការខូចខាត។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ឧទាហរណ៍ល្អបំផុតមួយនៃបញ្ហានេះ គឺការរលាកដោយសារកម្ដៅថ្ងៃខ្លាំងដែលកើតឡើងនៅពេលអ្នកប៉ះផ្ទាល់នឹងពន្លឺព្រះអាទិត្យយូរម៉ោងពេក។ កត្តាមួយចំនួនផ្សេងទៀតដែលបណ្ដាលឱ្យស្បែកចាប់ផ្ដើមរបកមានដូចជាសារធាតុគីមីកម្រិតខ្លាំង ការប្រតិកម្មនិងផលិតផលថែរក្សាស្បែកណាមួយ និងសូម្បីតែកង្វះអនាម័យ។ ទោះជាយ៉ាងណាមិនថាមកពីកត្តាអ្វី នៅពេលបញ្ហានេះកើតឡើងអ្នកពិតជាចង់ព្យាបាលវាឱ្យបានឆាប់។ កុំបារម្ភ! ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីរូបមន្តបែបធម្មជាតិព្យាបាលបញ្ហារបកស្បែកបានយ៉ាងឆាប់រហ័ស ៖
១. ផលិតផលផ្ដល់សំណើមដែលគ្មានក្លិនក្រអូប
ការប្រើប្រាស់ផលិតផលផ្ដល់សំណើមក្រោយពេលលាងសម្អាតមុខអាចជួយរក្សាជាតិសំណើមនៃស្បែកដែលល្អណាស់សម្រាប់ព្យាបាលការរបកស្បែកបណ្ដាលមកពីភាពស្ងួតខ្លាំង។
២. ប្រទាលកន្ទុយក្រពើ
អ្វីដែលអ្នកត្រូវធ្វើ គឺគ្រាន់តែយកជែលប្រទាលកន្ទុយក្រពើមួយចំនួនទៅដាក់ក្នុងទូរទឹកកកឱ្យត្រជាក់សម្រាប់រយៈពេល ៣០ នាទី។ បន្ទាប់មកលាបវាលើតំបន់ស្បែកដែលទទួលរងផលប៉ះពាល់។ កុំជូតចេញត្រូវទុករហូតដល់ស្ងួត សឹមលាងសម្អាតចេញ។ អនុវត្តឱ្យបានពី ៥ ទៅ ៦ ដងជាប្រចាំរហូតដល់ជាសះស្បើយ។ អ្នកអាចលាយជែលប្រទាលកន្ទុយក្រពើស្រស់ជាមួយប្រេងវីតាមីន E និងលាបលើតំបន់ស្បែកដែលមានបញ្ហា។ រងចាំរហូតដល់ស្ងួត សឹមលាងសម្អាតចេញជាមួយទឹកក្ដៅឧណ្ហៗ។
៣. ត្រសក់
អ្វីដែលអ្នកត្រូវធ្វើ គឺគ្រាន់តែកិនត្រសក់ឱ្យម៉ដ្ឋក្លាយជាល្បាយខាប់ៗរួចប្រើជាគ្រីមលាបលើតំបន់ស្បែកដែលទទួលរងផលប៉ះពាល់។ អ្នកក៏អាចគ្រាន់តែប្រើប្រាស់បន្ទះ ឬចំណិតត្រសក់បិតពីលើស្បែកក៏បាន។
៤. ចេកទុំ
អ្វីដែលអ្នកត្រូវធ្វើ គឺគ្រាន់តែប្រើសមកិនសង្កត់ចេកទុំឱ្យម៉ដ្ឋ បន្ទាប់មកលាបលើស្បែកមុខដែលមានបញ្ហារបក។ រងចាំសម្រាប់រយៈពេល ២០នាទី សឹមលាងសម្អាតចេញជាមួយទឹកក្ដៅឧណ្ហៗ។
៥. ទឹកឃ្មុំ
អ្វីដែលអ្នកត្រូវធ្វើ គឺគ្រាន់តែលាបទឹកឃ្មុំលើស្បែកមុនពេលងូតទឹក រួចទុកចោលសម្រាប់រយៈពេលពី ៥ ទៅ ១០ នាទី។ អនុវត្តជាប្រចាំដើម្បីទទួលបានស្បែកមានសំណើមទន់រលោង។ អ្នកក៏អាចលាយទឹកឃ្មុំ ៣ភាគជាមួយម្សៅឈើអែម ១ភាគ និងកម្ដៅល្បាយឱ្យក្ដៅឧណ្ហៗ។ បន្ទាប់មកសឹមលាបលើស្បែកមុខ និងរងចាំសម្រាប់រយៈពេលពី ៨ ទៅ ១០នាទី សឹមលាងសម្អាតចេញជាមួយទឹកក្ដៅឧណ្ហៗជាការស្រេច៕