Join with Health.com.kh on Telegram

សិស្ស​ដែល​សិក្សា​ផ្នែក​ចិត្ត​វិទ្យា ត្រូវ​សិក្សា​ពី​បុគ្គលិកលក្ខណៈ​មនុស្ស ហើយ​អាច​ធ្វើ​ជា​អ្នក​ប្រឹក្សា​យោបល់​ដល់​អ្នក​ដទៃ​ទៀត​ផង​។ ចុះ​នៅ​ពេល​ដែល​ពួក​គេ​ពិបាកចិត្ត តើ​ពួក​គេ​ធ្វើ​យ៉ាងម៉េច​ទៅ?

ជូ​លី និស្សិត​ចិត្ត​វិទ្យា​ឆ្នាំ​ទី​មួយ​នៅ​សាកលវិទ្យាល័យ​ភូមិន្ទ​ភ្នំពេញ​បានឱ្យ​ដឹង​ថា បញ្ហា​របស់​ខ្លួន​គឺ​ដោះស្រាយ ដោយ​ការ​លើកទឹកចិត្ត​ខ្លួនឯង​។ ជូ​លី​ប្រាប់​ទៀត​ថា អ្នក​ណា​ៗ​ក៏​មាន​បញ្ហា​ដែរ ដូច្នេះ​មាន​តែ​ខ្លួនឯង​ប៉ុណ្ណោះ ដែល​ត្រូវ​ប្រឈម​មុខ​ទាំង​បញ្ហា​និង​ការ​រក​ដំណោះស្រាយ​។

ខុស​ពី​កញ្ញា សុខ ល​ក្ខិ​ណា និស្សិត​ចិត្ត​វិទ្យា​ឆ្នាំ​ទី​បី​វិញ​បាន​ប្រាប់​ថា កញ្ញា​ត្រូវការ​ឱ្យ​មិត្ត​ភ័ក្ដិ​ជួយ​ដោយ​ប្រាប់​ពី​បញ្ហា​របស់​កញ្ញា​ទៅ​កាន់​ពួក​គេ និង ទទួលយក​យោបល់​របស់​ពួក​គេ​មក​វិញ​។ តែ​ជួនកាល​ក៏​ល​ក្ខិ​ណា ពឹង​លើ​ដំណោះស្រាយ​របស់​ខ្លួនឯង​ដែរ​។

លោក សំ សុម​ន្នា និស្សិត​ឆ្នាំ​ទី​បី​ដែរ បានឱ្យ​ដឹង​ថា មិនមែន​អ្នករៀន​ចិត្ត​វិទ្យា មិន​ចេះ​ពិបាកចិត្ត​នោះ​ទេ​។ ពេល​ដែល​លោក​ឱ្យ​យោបល់​ចំពោះ​អ្នក​ដែល​មាន​វិបត្តិ លោក​នឹង​យក​ដំណោះស្រាយ​ដែល​ខ្លួន​បាន​ផ្ដល់​ឱ្យ​គេ មក​អនុវត្ត​ខ្លួនឯង ឬ​ក៏​អាច​ទៅ​ពិភាក្សា​ជាមួយ​សិស្ស​ច្បង និង សាស្ត្រាចារ្យ​ដែល​មានបទពិសោធន៍​ច្រើន​ជាង​។ តែ សុមនា នៅ​តែ​អះអាង​ថា ទោះជា​យ៉ាងណា​ក្នុង​នាម​ជា​និស្សិត​ចិត្ត​វិទ្យា​ម្នាក់​លោក​ចេះ​គ្រប់គ្រង​ខ្លួនឯង និង មិន​ឱ្យ​បញ្ហា​ប៉ះពាល់​ធ្ងន់ធ្ងរ​ដល់​ផ្លូវចិត្ត​ឡើយ​៕