បញ្ហាបាត់បង់ម៉ាសនៃឆ្អឹង ឬម៉ាសឆ្អឹងចុះខ្សោយ និងជំងឺពុកឆ្អឹង គឺសុទ្ធតែអាចបង្កើនហានិភ័យនៃការបាក់ និងភ្លាត់ឆ្អឹង។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ឆ្អឹងរឹងមាំ គឺសំខាន់ណាស់ចំពោះមនុស្សម្នាក់ៗ។ ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីទម្លាប់ធម្មតាដែលអាចធ្វើឲ្យប៉ះពាល់ដល់សុខភាពឆ្អឹងដែលបណ្ដាលអោយឆ្អឹងប្រែជាចុះខ្សោយស្មានមិនដល់។ ដូច្នេះដើម្បីជៀសវាងបញ្ហាសុខភាពឆ្អឹងណាមួយកើតឡើង ចូរព្យាយាមបញ្ឈប់នូវទម្លាប់មួយចំនួនខាងក្រោម ៖
១. មិនទទួលទានត្រីសម្បូរខ្លាញ់
ក្រៅពីជាតិកាល់ស្យូម ត្រីសាលម៉ុន និងត្រីសាឌីន មានផ្ទុកនូវសារធាតុចិញ្ចឹមដ៏ចាំបាច់មួយទៀតសម្រាប់សុខភាពធ្មេញ និងឆ្អឹងនោះ គឺវីតាមីន D។ ត្រីសាលម៉ុន និងត្រីសាឌីន ក៏ជាប្រភពដ៏ល្អប្រសើរនៃអាស៊ីតខ្លាញ់ល្អអូមេហ្គា ៣ ដែលមានសមត្ថភាពទប់ទល់នឹងការរលាកផងដែរ។ ដូចដែលបានដឹងហើយថាការរលាកភាគច្រើន គឺត្រូវបានផ្សារភ្ជាប់ជាមួយនឹងបញ្ហាឆ្អឹងចុះខ្សោយ។
២. ជក់បារី
មិនមែនតែសួតប៉ុណ្ណោះទេដែលទទួលរងផលប៉ះពាល់ ឬត្រូវបំផ្លាញដោយសារការជក់បារី ប៉ុន្តែសរីរាង្គផ្សេងៗទៀតក៏រងគ្រោះដូចគ្នាផងដែរ។ រាងកាយលែងមានប្រសិទ្ធិភាពក្នុងការបង្កើតកោសិកាឆ្អឹងថ្មីឡើយ ដោយសារតែឥទ្ធិពលអវិជ្ជមាននៃការជក់បារីលើអ័រម៉ូន។ ប្រសិនបើអ្នកជាអ្នកជក់បារី ចូរព្យាយាមផ្ដាច់ទៅ ដើម្បីអាចជៀសផុតពីបញ្ហាខ្សោយឆ្អឹង និងជំងឺពុកឆ្អឹង។
៣. ខ្លាចពន្លឺព្រះអាទិត្យគ្រប់ពេល
ពន្លឺព្រះអាទិត្យ គឺពិតជាមានអត្ថប្រយោជន៍ណាស់ចំពោះសុខភាពរាងកាយទាំងមូល រួមទាំងឆ្អឹងល្អប្រសើរ។ អ្នកគួរអនុញ្ញាតឱ្យរាងកាយត្រូវពន្លឺព្រះអាទិត្យសម្រាប់រយៈពេលពី ១០ ទៅ ១៥ នាទីក្នុងមួយថ្ងៃ។ ហើយចន្លោះម៉ោង ១០ ព្រឹក និង ម៉ោង ៤ ល្ងាច គឺជាពេលវេលាដ៏ប្រសើរបំផុតដើម្បីរាងកាយអាចទទួលបាននូវវីតាមីន D តាមរយៈការស្ថិតក្រោម ឬប៉ះពាល់នឹងពន្លឺព្រះអាទិត្យ។ វីតាមីន D ជាវីតាមីនដែលជួយបង្កើនលើកកម្ពស់ឆ្អឹងក្នុងការស្រូបយកនូវជាតិកាល់ស្យូម។ បរិមាណនៃជាតិកាល់ស្យូមគ្រប់គ្រាន់ គឺជួយអោយឆ្អឹងរក្សាបាននូវសុខភាពល្អរឹងមាំ ជៀសឆ្ងាយពីជំងឺពុកឆ្អឹង។
៤. ទទួលទានអាហារប្រៃៗច្រើនពេក
ភាគច្រើននៃពួកយើងសុទ្ធតែបានដឹងហើយថា ការទទួលទាន ឬទទួលយកនូវជាតិសូដ្យូមច្រើនពេកចូលក្នុងរាងកាយ គឺមិនល្អឡើយចំពោះសម្ពាធឈាម និងបេះដូង រួមទាំងឆ្អឹងផងដែរ។ លើសពីនេះទៅទៀត អាហារដែលមានផ្ទុកជាតិសូដ្យូមខ្ពស់បណ្ដាលអោយតម្រងនោមបញ្ចេញនូវជាតិកាល់ស្យូមចេញពីរាងកាយ។
៥. មិនកម្រិតការទទួលទានកាហ្វេ
វាជាការប្រសើរចំពោះសុខភាព ប្រសិនបើអ្នកទទួលទានកាហ្វេត្រឹមតែពី ២ ទៅ ៣ ពែងក្នុងមួយថ្ងៃ។ ទោះជាយ៉ាងណាក៏ដោយ ប្រសិនបើអ្នកទទួលទានវាលើសពីនេះ កាហ្វេនឹងបណ្ដាលអោយមានបញ្ហាអាក្រក់ជាច្រើនកើតឡើងចំពោះសុខភាព។ ក្រៅពីបញ្ហាថប់បារម្ភឈឺក្បាល និងហានិភ័យនៃជំងឺ
បេះដូងហើយនោះ ការចុះខ្សោយនៃឆ្អឹង ក៏អាចជាលទ្ធផលនៃការទទួលទានកាហ្វេច្រើនពេកផងដែរ។ បញ្ហានេះកើតឡើងដោយសារជាតិកាហ្វេអ៊ីននៅក្នុងកាហ្វេបង្កើនការផលិតទឹកនោម ហើយបណ្ដាលអោយជាតិកាល់ស្យូមមួយចំនួនក្នុងរាងកាយត្រូវបង្ហូរចេញតាមនោះដែរ។
៦. ទទួលទានភេសជ្ជៈសូដាច្រើន
សូដា ឬភេសជ្ជៈកំប៉ុងមួយចំនួនទៀត គឺសុទ្ធតែមានផ្ទុកនូវជាតិកាហ្វេអ៊ីន ដូច្នេះហើយទើបការទទួលទានភេសជ្ជៈប្រភេទនេះច្រើន ក៏រួមចំណែកលើកកម្ពស់ការបាត់បង់ម៉ាសនៃឆ្អឹងធ្វើឲ្យឆ្អឹងចុះខ្សោយ និងបង្កើនហានិភ័យនៃជំងឺពុកឆ្អឹងនាពេលអនាគតផងដែរ។ ប៉ុន្តែក្រៅពីផលប៉ះពាល់នៃជាតិកាហ្វេអ៊ីន ក៏ភេសជ្ជៈសូដាក៏មានផ្ទុកអាស៊ីតផូស្វ័រិចដែលជះផលអវិជ្ជមានខ្លាំងគួរអោយព្រួយបារម្ភចំពោះឆ្អឹង។ អាស៊ីតនេះអាចបណ្ដាលអោយកាល់ស្យូមនៅក្នុងឆ្អឹងត្រូវច្រោះចេញ។
៧. ទទួលទានគ្រឿងស្រវឹងច្រើនលើសកម្រិត
វាកាន់តែបង្កើនហានិភ័យនៅពេលគួបផ្សំជាមួយទម្លាប់នៃការជក់បារី។ គ្រឿងស្រវឹងអាចបង្កើ់នការផលិតអ័រម៉ូនស្ត្រេស cortisol ក្នុងរាងកាយ ហើយបន្ថយកម្រិតនៃអ័រម៉ូនតេស្តូស្តេរ៉ូន testosterone និង estrogen នាំឱ្យឆ្អឹងចុះខ្សោយ។ ការទទួលទានភេសជ្ជៈនេះច្រើនលើសកម្រិតក៏អាចបណ្ដាលឱ្យដង់ស៊ីតេឆ្អឹងថយចុះដែលងាយនឹងបាក់។
៨. មិនធ្វើលំហាត់ប្រាណ
ការមិនធ្វើលំហាត់ប្រាណរាងកាយណាមួយសោះនោះ គឺអាចបង្កើនហានិភ័យនៃបញ្ហាសុខភាពជាច្រើន។ ការធ្វើលំហាត់ប្រាណមិនបានគ្រប់គ្រាន់ក៏អាចបង្កើនហានិភ័យនៃការបាត់បង់ម៉ាសឆ្អឹង និងជំងឺពុកឆ្អឹងផងដែរ។ អ្នកជំនាញជាច្រើននិយាយថាការធ្វើលំហាត់ប្រាណសសៃឈាមបេះដូងដូចជា ការដើរ, ការរត់ត្រឹកៗ និងការឡើងជណ្ដើរ គឺជួយលើកកម្ពស់ការលូតលាស់នៃជាលិកាឆ្អឹង។
៩. កង្វះប្រូតេអ៊ីនក្នុងរបបអាហារប្រចាំថ្ងៃ
មិនមែនត្រឹមតែជាតិកាល់ស្យូមប៉ុណ្ណោះទេដែលជួយរក្សាសុខភាពឆ្អឹងអោយល្អរឹងមាំ ប៉ុន្តែប្រូតេអ៊ីនក៏ជាសារធាតុចាំបាច់ខ្លាំងបំផុតសម្រាប់ឆ្អឹងផងដែរ។ ដូច្នេះត្រូវប្រាកដថា របបអាហាររបស់អ្នកមានផ្ទុកនូវបរិមាណប្រូតេអ៊ីនគ្រប់គ្រាន់។
១០. ទទួលទានសាច់ក្រហមច្រើនពេក
សាច់ក្រហម គឺជាអ្វីមួយដែលអាចបណ្ដាលឱ្យឆ្អឹងបាត់បង់ជាតិកាល់ស្យូម។ ប្រសិនបើអ្នកមានជំងឺពុកឆ្អឹង ឬក៏មិនចង់កើតជំងឺនេះទេនោះ ចូរកម្រិតការទទួលទានសាច់ក្រហមរបស់អ្នកដោយមិនគួរលើសពី ២ ដងក្នុងមួយសប្តាហ៍ឡើយ។ ជាពិសេសសាច់ក្រហមកែច្នៃ!
១១. មិនសូវញ៊ាំបន្លែបៃតង
បន្លែបៃតងមានផ្ទុកសម្បូរទៅដោយជាតិកាល់ស្យូម និងវីតាមីន A រួមទាំងសារធាតុចិញ្ចឹមចាំបាច់ជាច្រើនផ្សេងទៀតដែលមិនត្រឹមតែល្អសម្រាប់សុខភាពឆ្អឹងរឹងមាំប៉ុណ្ណោះទេ ប៉ុន្តែក៏ប្រសើរចំពោះសុខភាពរាងកាយទាំងមូលផងដែរ។