មិនបាច់ពឹងផ្អែកតែលើផលិតផលថែរក្សាសម្រស់ដែលមានតម្លៃថ្លៃៗឡើយ! (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ដឹងទេថាអ្នកក៏អាចពន្យឺតដំណើរការនៃភាពចាស់តាមវ័យរបស់ស្បែកដូចជាស្នាមជ្រីវជ្រួញ ស្បែកយារធ្លាក់ និងស្នាមខ្សែដែលលេចឡើងលើស្បែកមុខនិងកជាដើមបានជាមួយគន្លឹះងាយៗមួយចំនួន។ ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីគន្លឹះដោះស្រាយបញ្ហានៃភាពចាស់តាមវ័យរបស់ស្បែក ៖
១. គេងឱ្យបានច្រើនគ្រប់គ្រាន់
ការគេងបានគ្រប់គ្រាន់ គឺសំខាន់ណាស់សម្រាប់សុខភាពរាងកាយទាំងមូល រួមទាំងស្បែកតឹងណែន។ វាចាំបាច់ក្នុងការគេងឱ្យបានស្កប់ពី ៧ ទៅ ៨ ម៉ោងក្នុងមួយយប់ដើម្បីផ្ដល់ពេលគ្រប់គ្រាន់ឱ្យស្បែកជួសជុលខ្លួនឯង បង្កើនការផលិតកូឡាជែន និងស្ដារភាពរឹងមាំឡើងវិញ។
២. ទទួលទានទឹកក្ដៅឧណ្ហៗ
ក្រៅពីបង្ករោគមុនហើយនោះ ជាតិពុលក៏អាចធ្វើឱ្យស្បែកឆាប់ចាស់ជាងវ័យ និងបង្កស្នាមដក់ខ្មៅក្រោមភ្នែកផងដែរ។ ប៉ុន្តែការទទួលទានទឹកក្ដៅឧណ្ហៗអាចជួយជួសជុលកោសិកាស្បែកដែលខូចខាតដោយកម្ចាត់រ៉ាឌីកាល់សេរី ហើយធ្វើឱ្យស្បែកទន់រលោង។ ទឹកក្ដៅឧណ្ហៗអាចជួយបន្សាបជាតិពុលក្នុងរាងកាយតាមរយៈការបង្កើនសីតុណ្ហភាពនៃរាងកាយធ្វើឱ្យអ្នកបែកញើស។ ជាលទ្ធផលជាតិពុលត្រូវបានកម្ចាត់ចេញ ហើយអ្នកនឹងទទួលបាននូវស្បែកស្អាតស្រស់ថ្លាពីខាងក្នុង។ ការទទួលទានទឹកក្ដៅឧណ្ហៗក៏សំខាន់ក្នុងការរក្សាបាននូវសុខភាពស្បែកល្អប្រសើរ ខណៈដែលវាជួយបង្កើនចរន្តឈាមហូរឆ្លងកាត់ពេញក្នុងរាងកាយផ្ដល់ពណ៌ស៊ីជំពូដល់ស្បែក។
៣. ទទួលទានទឹកឱ្យបានច្រើនគ្រប់គ្រាន់
មិនថាអ្នកបានប្រើប្រាស់ផលិតផលផ្ដល់សំណើមដល់ស្បែកដែលមានតម្លៃថ្លៃប៉ុណ្ណាក៏ដោយ ក៏វាមិនអាចជួយឱ្យស្បែករបស់អ្នកគ្មានស្នាមជ្រីវជ្រួញបានរហូតដែរប្រសិនបើអ្នកមិនព្យាយាមទទួលទានទឹកឱ្យបានច្រើនគ្រប់គ្រាន់ជាប្រចាំ។ ត្រឹមតែការទទួលទានទឹកឱ្យបានច្រើនគ្រប់គ្រាន់រាល់ថ្ងៃ នោះអ្នកក៏អាចរក្សាបាននូវស្បែកដែលតឹងណែនក្មេងជាងវ័យនិងមានសំណើមគួរឱ្យកតសម្គាល់។
៤. បង្កើនការទទួលទានអាហារសម្បូរសារធាតុប្រឆាំងអុកស៊ីតកម្ម
អ្នកក៏ចាំបាច់គួររួមបញ្ចូលអាហារសម្បូរសារធាតុប្រឆាំងអុកស៊ីតកម្មដូចជាបន្លែបៃតងស្រស់ ផ្លែឈើ ត្រីសម្បូរខ្លាញ់ គ្រាប់ពូជ និងគ្រាប់ធញ្ញជាតិជាដើមក្នុងរបបអាហារប្រចាំថ្ងៃផងដែរដើម្បីរក្សាកូឡាជែននិងការផលិតអេឡាស្ទីន។
៥. ធ្វើលំហាត់ប្រាណឱ្យបានទៀងទាត់
ការធ្វើលំហាត់ប្រាណជាប្រចាំក៏ជួយរាងកាយបង្កើនការផលិតកូឡាជែនផងដែរ។ លើសពីនេះទៅទៀតការធ្វើលំហាត់ប្រាណឱ្យបានទៀងទាត់ថែមទាំងជួយរក្សាសុខភាពរាងកាយទប់ស្កាត់ហានិភ័យជំងឺផ្សេងៗគួរឱ្យកត់សម្គាល់។ ទោះជាយ៉ាងណាអ្នកមិនគួរធ្វើលំហាត់ប្រាណហួសកម្រិតពេកដែរ! នេះក៏ព្រោះតែការធ្វើលំហាត់ប្រាណច្រើនជាងអ្វីដែលចាំបាច់អាចពន្លឿនដំណើរការនៃភាពចាស់តាមវ័យ ខណៈដែលវាអាចបង្កើនការបង្កើតរ៉ាឌីកាល់សេរីបង្កការបំផ្លាញដល់កោសិកាស្បែកដែលមានសុខភាពល្អ។
៦. គ្រប់គ្រងស្ត្រេស
ស្ត្រេសមិនត្រឹមតែជះឥទ្ធិពលអវិជ្ជមានគួរឱ្យព្រួយបារម្ភចំពោះសុខភាពប៉ុណ្ណោះទេ ប៉ុន្តែថែមទាំងធ្វើឱ្យសម្រស់អ្នកមើលទៅចាស់ជាងវ័យផងដែរ។ វេជ្ជបណ្ឌិតជាច្រើននិយាយថាភាពតានតឹងក្នុងអារម្មណ៍ពេកសឹងតែជាប្រចាំពន្លឿនដំណើរការនៃភាពចាស់តាមវ័យ។
៧. កុំភ្លេចប្រើប្រាស់ឡេការពារកម្ដៅថ្ងៃ
ការស្ថិតក្រោមកម្ដៅថ្ងៃយូរ ឬច្រើនពេកអាចផ្ដល់ផលអាក្រក់ច្រើនជាងល្អ។ គ្រូពេទ្យជំនាញខាងសើស្បែកបានឱ្យដឹងថា ការប៉ះផ្ទាល់នឹងកម្ដៅថ្ងៃច្រើនពេក គឺជាមូលហេតុចម្បងបំផុតមួយដែលបណ្ដាលឱ្យស្បែកឆាប់ចាស់ជាងវ័យ។ វាក៏ជាមូលហេតុដែលអ្នកចាំបាច់គួរប្រើប្រាស់ឡេលាបការពារកម្ដៅថ្ងៃដែលមាន SPF យ៉ាងហោចណាស់ ៣០ ជាពិសេសនៅពេលឈានជើងចេញទៅក្រៅក្រោយម៉ោង ១០ ព្រឹក និងមុនម៉ោង ៤ល្ងាច។
៨. កម្រិតការទទួលទានអាហារកែច្នៃ
អាហារកែច្នៃមានផ្ទុកសម្បូរទៅដោយជាតិប្រៃ ឬអំបិលដែលអាចធ្វើឱ្យអ្នកមានអាការៈហើម។ អាហារប្រភេទនេះក៏ជាប្រភពនៃសារធាតុ nitrites ដែលបំផ្លាញកូឡាជែន និងភាពបត់បែនក្នុងស្បែកផងដែរ។ ការទទួលទានសាច់កែច្នៃក៏អាចធ្វើឱ្យស្បែកឆាប់ចាស់ជាងអាយុផងដែរ ដោយវាគ្មានផ្ទុកសារធាតុចិញ្ចឹមល្អៗដើម្បីទ្រង់ទ្រង់សុខភាពស្បែករក្សាភាពក្មេងជាងវ័យ។ ដូច្នេះដើម្បីជៀសផុតពីគ្រោះថ្នាក់ កុំទទួលទានអាហារកែច្នៃច្រើនពេក និងមិនត្រូវទទួលទានរាល់ថ្ងៃឡើយ។
៩. កម្រិតការទទួលទានគ្រឿងស្រវឹង
នេះក៏ព្រោះតែជាតិអាល់កុលបំផ្លាញកូឡាជែនដែលកាត់បន្ថយភាពតឹងណែននៃស្បែកលើសុដន់ ដើមទ្រូង និងកន្លែងផ្សេងទៀតគួរឱ្យកត់សម្គាល់។
១០. កម្រិតការទទួលទានអាហារនិងភេសជ្ជៈផ្អែម
ការទទួលទានអាហារនិងភេសជ្ជៈផ្អែមច្រើនពេកអាចជះឥទ្ធិពលគួរឱ្យព្រួយបារម្ភមិនត្រឹមតែចំពោះសម្រស់ប៉ុណ្ណោះទេ ប៉ុន្តែលើសុខភាពរាងកាយទាំងមូល។ ជាតិស្ករក្នុងអាហារនិងភេសជ្ជៈផ្អែមអាចបំបែកកូឡាជែនដ៏សំខាន់ក្នុងស្បែក។ ដូច្នេះដើម្បីចៀសផុតបញ្ហាស្បែកឆាប់ចាស់ជាងវ័យនិងជ្រីវជ្រួញស្រអាប់ចូរព្យាយាមកម្រិតការទទួលទានអាហារនិងភេសជ្ជៈផ្អែមៗរបស់អ្នក៕