ពេលឈឺថ្កាត់ មិនថាបុរស ឬនារី ឡើយតែងតែចង់ឱ្យ គូស្នេហ៍ចេះបារម្ភ និង យកចិត្តទុកដាក់។ បើគូស្នេហ៍ប្រិយមិត្តឈឺតើគួរ បារម្ភបែបណាខ្លះទៅ?
១. សួរសុខទុក្ខ
កញ្ញា ហេង លីដា អតីតនិស្សិតសាកលវិទ្យាល័យភូមិន្ទភ្នំពេញបានប្រាប់ថា សម្រាប់នាងផ្ទាល់មិនចាំបាច់ទាល់តែធ្លាក់ខ្លួនឈឺងើបមិនរួចទេ គ្រាន់តែប្រាប់ថា មិនស្រួលខ្លួន នាងចង់ឱ្យមិត្តប្រុសសួរនាំភ្លាម។«ការសួរនាំ អញ្ចឹងធ្វើឱ្យមានអារម្មណ៍កក់ក្ដៅ ដឹងថាគេបារម្ភពីយើង!» លីដាបានបន្ត។
សម្រាប់គូស្នេហ៍ដែលនៅឆ្ងាយពីគ្នា លីដា ផ្ដល់យោបល់ថា គួរតែឧស្សាហ៍ទូរសព្ទឬ ផ្ញើសារសួរ ថាពេលនេះគេយ៉ាងម៉េចទៅហើយ គួរតែទៅពេទ្យឬអត់ មិនតែប៉ុណ្ណោះ ពាក្យផ្ដាំផ្ញើដែលខ្វះមិនបាននោះ មានដូចជា « គេងឱ្យបានច្រើន កុំខំលេងហ្វេសប៊ុកពេក» ជាដើម។
២. ទិញថ្នាំ ឬ ទិញចំណី
ងាក មក សុខ នីឡា វិញបានប្រាប់ថា « បើខ្ញុំផ្ដាសាយ គួរទៅទិញថ្នាំផ្ដាសាយឱ្យ បើខ្ញុំគ្រុនក្ដៅគួរទៅទិញថ្នាំក្ដៅឱ្យ»។ បើសិនជាគូស្នេហ៍ឈឺនៅផ្ទះឬ ក៏នៅពេទ្យ មិត្តស្រីឬ មិត្តប្រុស គួរតែទូរសព្ទសួរថា តើ ចង់ញ៉ាំអី? គេនឹងទិញឱ្យ។
ទោះញ៉ាំកើតឬមិនកើត ក៏មានអារម្មណ៍ថា វាជាអាហារដែលគូស្នេហ៍ខំជិះម៉ូតូទៅទិញឬក៏ ខំធ្វើដោយខ្លួនឯងដែរ។
៣. មើលថែ
សំ អ៊ីតែន សិស្សថ្នាក់ទី ១២ នៃវិទ្យាល័យ បូរី ១០០ខ្នង បានឱ្យដឹងថា សម្រាប់នាងផ្ទាល់ នាងចង់ឱ្យមិត្តប្រុសនៅមើលថែ ជាអ្នកយកថ្នាំ ឱ្យនាងលេប ជាអ្នកដួសបបរឱ្យនាងញ៉ាំ។ អ៊ីតែនក៏បានបន្តទៀតថា ពេលដាស់នាងឱ្យញ៉ាំថ្នាំ ឬ ញ៉ាំបបរត្រូវ ប្រើពាក្យផ្អែមល្ហែមមិនមែនសម្លុត ឬ និយាយបែបព្រងើយកន្តើយឡើយ។
ការធ្វើបែបនេះ អ៊ីតែន យល់ថា វាធ្វើឱ្យអ្នកជំងឺមានអារម្មណ៍ធូរស្បើយ និង កក់ក្ដៅ ចំណែកឯស្នេហា ក៏កាន់តែផ្អែមល្ហែម និងយល់ចិត្តគ្នា ព្រោះពួកគេមានឱកាសយល់ចិត្តគ្នា ច្រើនជាងមុន។
ដូចគ្នានេះដែរ ស៊ីថា មុន្នីរក្សបានប្រាប់ថា មនុស្សប្រុសក៏ដោយ បើដឹងតែឈឺហើយមិត្តស្រី មិនមើលថែទាំ គេគង់តែមានអារម្មណ៍តូចចិត្តដូចគ្នា។ «បើមានមិត្តស្រីមើលថែពេលឈឺ យើងមានអារម្មណ៍ថា គេមិនបោះបង់យើងឡើយ»។ មុន្នីរក្សបញ្ជាក់។
ចុះចំណែកប្រិយមិត្តវិញ យល់យ៉ាងម៉េចដែរបើសង្សារឈឺ?