ជាទូទៅមនុស្សមួយចំនួននៅមានការស្ទាក់ស្ទើរលើការសម្រេចចិត្តទិញអចលនទ្រព្យ ជាពិសេសផ្ទះល្វែង ខណៈលុយមានតិចតួច ហើយស្របនឹងតំបន់ផ្ទះល្វែងមួយចំនួនធ្លាប់មានបញ្ហាកើតឡើងដោយសារតែពុំមានច្បាប់ច្បាស់លាស់ជាដើម។
ដូច្នេះ ដើម្បីជាប្រទីបបង្ហាញផ្លូវ លោក ច្រឹក សុខនីម អគ្គនាយកក្រុមហ៊ុន Century 21 Mekong ជាក្រុមហ៊ុនធ្វើការងារជំនាញខាងអចលនទ្រព្យនៅប្រទេសកម្ពុជា បានបង្ហើបគន្លឹះ៥ ចំណុច ដែលជាមូលដ្ឋានគ្រឹះនៅក្នុងការពិចារណានៅពេលសម្រេចចិត្តទិញផ្ទះឲ្យបានត្រឹមត្រូវ។
សូមអានគន្លឹះទាំង ៥ នៅខាងក្រោមនេះ៖
ទី១. តើអ្នកចង់ទិញផ្ទះប្រភេទណា?៖ សំណួរនេះត្រូវតែចាប់ផ្ដើមដំបូងសួរខ្លួនឯងថា តើអ្នកចង់ទិញផ្ទះប្រភេទណា? ជាផ្ទះល្វែង ខុនដូ ឬ ទិញដើម្បីចំណេញឬគ្រាន់តែទិញដើម្បីនៅ?
ទី២. ធនធានហិរញ្ញវត្ថុ៖ អ្នកត្រូវដឹងជាចាំបាច់តើអ្នកមានលុយប៉ុន្មាន ហើយការគិតគូរអំពីធនធានហិរញ្ញវត្ថុនេះ គេបែងចែកជាបីទៀត គឺ លុយផ្ទាល់ខ្លួន, លុយខ្ចីពីមីក្រូហិរញ្ញវត្ថុ និង លុយខ្ចីពីមិត្តភ័ក្ដិ គ្រួសារ ជាដើម។ ការដឹងអំពីហិរញ្ញវត្ថុផ្ទាល់ខ្លួននេះសំខាន់ដើម្បីដឹងពីលទ្ធភាពទៅទិញផ្ទះប្រភេទណាមួយ ឬ លទ្ធភាពបង់រំលស់។
ទី៣. ប្រព័ន្ធច្បាប់៖ នៅមុនអ្នកទិញផ្ទះល្វែងអ្នកត្រូវសិក្សាឲ្យបានច្បាស់លាស់អំពីប្រវត្តិផ្ទះ។ ដូច្នេះ អ្នកត្រូវតែសួររកឯកសារពាក់ព័ន្ធនានាឲ្យគ្រប់ជ្រុងជ្រោយ ដូចជា តើផ្ទះនេះសាងសង់មានច្បាប់សាងសង់ដែរទេ? ប្លង់អចលនទ្រព្យ (ប្លង់ទន់ ឬ រឹង) តើមានកម្រិតប្លង់ណា? តើប្រវត្តិម្ចាស់ផ្ទះនេះមានធ្លាប់ខ្ចីបំណុលគេដែរឬទេ?។ ការស្វែងរកព័ត៌មានទាំងនេះ សំខាន់ដើម្បីកុំឲ្យមានភាពរកាំរកូសទៅថ្ងៃក្រោយ។
ទី៤. ចំណូលពីការវិនិយោគ៖ អ្នកក៏ត្រូវសិក្សាអំពីបំណងខ្លួនឯងដែរថា តើអ្នកចង់ទិញផ្ទះដើម្បីចំណេញឬដើម្បីគ្រាន់តែនៅ? ចំណុចនេះអ្នកត្រូវដឹងថា ប្រសិនបើអ្នកទិញផ្ទះល្វែងគឺ បច្ចុប្បន្នគឺអាចចំណេញនៅពេលខាងមុខ ឯខុនដូ គឺបច្ចុប្បន្នតម្លៃសមរម្យ ប៉ុន្ដែ បើគិតពីផលចំណុចគឺមិនសូវចំណេញទេ សម្រាប់សង្គមបច្ចុប្បន្ន ព្រោះប្រជាជនខ្មែរនៅឲ្យតម្លៃផ្ទះខុនដូ ទាបនៅឡើយ។
ទី៥. ប្រឹក្សាយោបល់៖ ប្រសិនបើប្រិយមិត្តនៅទីទើរឿងសម្រេចចិត្តទិញផ្ទះ គួរតែទៅរកកន្លែងប្រឹក្សាយោបល់ពីអ្នកជំនាញទិញលក់អចលនទ្រព្យ ក៏ជាមធ្យោបាយមួយដ៏ល្អ ដើម្បីបង្កើនភាពទុកចិត្ត និង កក់ក្ដៅ ក្រោយពីទិញផ្ទះហើយ៕