ជួយចែករំលែក! ហេតុអ្វីពិបាកមានផ្ទៃពោះម្ល៉េះ? អាចមកពីកត្តាទាំងនេះ

ទម្លាប់មួយចំនួនអាចជះផលប៉ះពាល់គួរឱ្យព្រួយបារម្ភលើភាពមានកូនបានរបស់ស្ត្រី។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ថាតើទម្លាប់ទាំងនោះមានអ្វីខ្លះ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីទម្លាប់ដែលស្ត្រីគួរចៀសវាងប្រសិនបើចង់ឆាប់មានផ្ទៃពោះ ៖

១. ទទួលទានអាហារសម្បូរខ្លាញ់ឆ្អែត

ការទទួលទានអាហារសម្បូរខ្លាញ់ឆ្អែតអាចជះផលប៉ះពាល់ដល់ភាពមានកូនបានគួរឱ្យកត់សម្គាល់។ ដូច្នេះដើម្បីជាការប្រសើរចូរកម្រិតការទទួលទានអាហារប្រភេទនេះ ហើយជំនួសមកវិញនូវរបបអាហារដែលមានផ្ទុកកាបូអ៊ីដ្រាតសុខភាពល្អ។

២. ការជក់បារី

ភាគច្រើននៃពួកយើងសុទ្ធតែដឹងហើយថា ការជក់បារីអាចបង្កគ្រោះថ្នាក់ចំពោះសុខភាព។ ទោះជាយ៉ាងណាតើអ្នកធ្លាប់ដឹងទេថាទម្លាប់នេះក៏អាចជះផលប៉ះពាល់ខ្លាំងដល់ឱកាសនៃការមានផ្ទៃពោះរបស់អ្នកដែរ? នេះក៏ព្រោះតែការជក់បារីអាចបង្កការខូចខាតដល់សុខភាពប្រព័ន្ធបន្តពូជក្នុងរបៀបជាច្រើនរាប់ចាប់ពីការបំផ្លាញស៊ុតដែលកកើតក្នុងអូវែដល់ហានិភ័យនៃបញ្ហារលូតកូន។ ប្រសិនបើអ្នកចង់មានផ្ទៃពោះ និងអាចរក្សាបាននូវសុខភាពល្អកំឡុងពេលពពោះ ចូរបញ្ឈប់ការជក់បារីឱ្យបានឆាប់បំផុត។

៣. ការទទួលទានគ្រឿងស្រវឹងច្រើនលើសកម្រិត

ការសិក្សាស្រាវជ្រាវជាច្រើនបានបង្ហាញថា ស្ត្រីដែលទទួលទានគ្រឿងស្រវឹង ៣ដង ឬច្រើនជាងនេះក្នុងមួយសប្តាហ៍ គឺពិបាកនឹងមានផ្ទៃពោះជាងស្ត្រីដែលទទួលទានភេសជ្ជៈនេះក្នុងកម្រិតមធ្យម។

៤. គេងមិនបានគ្រប់គ្រាន់

ការគេងមិនបានស្កប់និងគ្រប់គ្រាន់ក៏ជះឥទ្ធិពលលើភាពមានកូនបានផងដែរ។ មានមូលហេតុច្រើនណាស់ដែលធ្វើឱ្យអ្នកពិបាកមានផ្ទៃពោះដោយសារការគេងមិនបានគ្រប់គ្រាន់។ មូលហេតុទី១នោះ គឺការគេងមិនគ្រប់អាចបង្កឱ្យរដូវមកមិនទៀងដែលជារោគសញ្ញាមួយជំងឺពិបាកមានកូន។ មូលហេតុទី២ គឺការគេងមិនគ្រប់អាចបង្កបញ្ហាអតុល្យភាពនៃអ័រម៉ូន។ ហើយមូលហេតុទី៣នោះ គឺការគេងមិនគ្រប់អាចនាំឱ្យធាត់ជ្រុលដែលជាបញ្ហាមួយជះផលប៉ះពាល់ដល់លទ្ធភាពនៃការមានកូនបានរបស់ស្ត្រី។

៥. ការធ្វើលំហាត់ប្រាណច្រើនពេក

ការធ្វើលំហាត់ប្រាណ គឺចាំបាច់ណាស់សម្រាប់ពង្រឹងនិងរក្សាសុខភាពរាងកាយ។ ប៉ុន្តែការធ្វើលំហាត់ប្រាណច្រើនពេកអាចជះផលប៉ះពាល់គួរឱ្យបារម្ភចំពោះឱកាសនៃការមានផ្ទៃពោះរបស់អ្នក។ ដូច្នេះប្រសិនបើអ្នកចង់ឆាប់មានផ្ទៃពោះ ចូរកុំដាក់សម្ពាធខ្លាំងពេកចំពោះរាងកាយ។

៦. របបអាហារគ្មានសុខភាពល្អ

គួបផ្សំនឹងការធ្វើលំហាត់ប្រាណទៀងទាត់ ការជ្រើសរើសអាហារឱ្យបានត្រឹមត្រូវដើម្បីទទួលទាន គឺចាំបាច់ណាស់សម្រាប់សុខភាពនិងសម្រស់របស់អ្នក។ ហើយរបបអាហាររឹតតែសំខាន់ថែមទៀតនៅពេលអ្នកព្យាយាមមានផ្ទៃពោះ។ អ្នកជំនាញជាច្រើនបានឱ្យដឹងថា ទម្លាប់នៃការទទួលទានអាហារមិនល្អអាចនាំឱ្យធាត់ជ្រុល និងពេលខ្លះអាចមានទម្ងន់មិនគ្រប់ដែលកត្តាទាំងពីរនេះអាចបង្កគ្រោះថ្នាក់ដល់ឱកាសនៃការមានកូនបានរបស់ស្ត្រី។

៧. ដៃគូរបស់អ្នកមានភាពតានតឹងក្នុងអារម្មណ៍

ការសិក្សាស្រាវជ្រាវជាច្រើនបានបង្ហាញថា ភាពមានកូនបានរបស់បុរសអាចនឹងទទួលរងឥទ្ធិពលអវិជ្ជមានដោយសារភាពស្ត្រេស ឬភាពតានតឹងក្នុងអារម្មណ៍៕