ធ្យូង គឺជា​មធ្យោបាយ​មួយទៀត​ត្រូវ​បាន​គេ​យក​មក​ប្រើ ដើម្បី​ជួយ​បង្កើន​គុណភាព​ដី និង​ដំណាំ​គ្រប់យ៉ាង ។ កំទេចកំទី​ធ្យូង​ដែល​មិន​អាច​ប្រើ​សម្រាប់​ដុត​ចំអិន អាហារ​បាន​គួរ​សន្សំទុក​សម្រាប់​យក​មក​លាយ​តាម​គល់​ដំណាំ ឬ​រង​បន្លែ ។ ធ្យូង​អាច​ជួយ​កាត់​បន្ថយ​មេរោគ​យាយី​ដល់​ដំណាំ និង​ការ​លូតលាស់​របស់​ដំណាំ មិនតែប៉ុណ្ណោះ​វា​នៅ​អាច​ជួយ​កាត់​បន្ថយ​ពពួក​ផ្សិត​ដែល​បំផ្លាញ ឫស​របស់​បន្ថែ ឬ​ដំណាំ​បាន​យ៉ាង​ល្អ​ទៀត​ផង ។ ក្រៅពី​ជួយ​ការពារ​ដល់​ដំណាំ ធ្យូង​ក៏​បាន​ជួយ​បង្កើន PH របស់​ដី​កុំ​ឲ្យ​មាន​ជាតិ​អាស៊ី​ដ​ច្រើន​ពេក ជួយ​ឲ្យ​ដី​សើម និង​រក្សា​គុណភាព​ដី​ឲ្យ​នៅ​ល្អ​បាន​ច្រើន​ឆ្នាំ ។

តាម​ការ​ពិសោធន៍​ជា​ច្រើន​ដែល​ត្រូវ​បាន​គេ​សិក្សា គេ​បាន​រក​ឃើញ​ថា ដី​ដែល​បាន​បាច​កំទេច​ធ្យូង​ពីលើ​បាន​ធ្វើ​ឲ្យ​ដី​ស្រទាប់​ក្រោម​ឡើង​ខ្មៅ សម្បូរ​ជីវជាតិ ជាង​ដី​ដែល​មិន​បាន​បាច​កំទេច​ធ្យូង​ពីលើ ។

ការ​លូតលាស់​របស់​បន្លែ និង​ដំណាំ​ក៏​ខុស​គ្នា​ដែរ ព្រោះ​នៅ​ត្រង់​ទី​ដែល​បាន​បាច​ធ្យូង​ពីលើ​ដំណាំ​មាន​ស្លឹក​ខៀវ​ជាង និង​មានការ​លូតលាស់​បាន​ល្អ​ជាង ទី​ដែល​មិន​បាន​ប្រើ​ធ្យូង ចំណែក​ដី​ស្រទាប់​ក្រោម​ដី​មាន​ពណ៌​ខ្មៅ និង​រក្សា​បាន​សំណើម​ប្រសើរ​ជាង​ដី​មិន​បាន​ប្រើ​ធ្យូង ។

គេ​អាច​បាច​ធ្យូង​នៅ​តាម​គល់​ដំណាំ​ចំនួន​ប្រហែល 2 ស​.​ម ឬ ច្រើន​ជាង​នេះ ឬ​អាច​បាច​លើ​រង​បន្លែ​ក៏​បាន ។

ក្នុង​ករណី​ដែល​គ្មាន​ធ្យូង​គេ​អាច​ប្រើ​ផេះ​អង្កាម​ជា​ជំនួស​បាន​ដោយ​ចាក់់​ពង្រាយ​លើ​ផ្ទៃដី រួច​ភ្ចួ​រលុប ឬ​ក៏​អាច​ដាក់​ក្នុង​រណ្ដៅ​ដាំ​ដំណាំ​ក៏​បាន ។ ដោយហេតុ​ថា​ផេះ​អង្កាម​មាន​តម្លៃ​ថោក​ជាង ងាយស្រួល​រក​ជាង​ធ្យូង ដូចនេះ​យើង​មាន​ជម្រើស​ពីរ​អាច​ប្រើ​ធ្យូង​ក៏​បាន ឬ​មួយ​ប្រើ​ផេះ​អង្កាម​ក៏​បាន ។

គួរ​ដាក់​ធ្យូង ឬ​ផេះ​អង្កាម​នេះ​មុន​រដូវភ្លៀង​ធ្លាក់​ទើប​ជា​ការ​ល្អ ដោយ​ធ្វើ​ម្ដង​មួយ​ចំណែក​ៗ ក្នុង​ទំហំ​ដី​ដែល​មាន​រហូត​ផ្ទៃដី​ទាំងមូល​ត្រូវ​បាន​គ្រប​ដោយ​ផេះ អង្កាម ឬ​ធ្យូង ។

ការ​ប្រើប្រាស់​វត្ថុ​ទាំង​ពីរ​យ៉ាងនេះ អាច​ជួយ​កាត់​បន្ថយ​ចំណាយ​ទៅ​លើ ការ​ប្រើ​ជីគីមី​បាន​មួយ​ចំណែក​ធំ និង​ថយ​ការ​ចំណាយ​បាន​មួយ​ចំណែក​ដែរ ៕