បន្ទប់គេងគឺជាកន្លែងដែលទាក់ទងនឹងទំនាក់ទំនង និងមនោសញ្ចេតនារបស់ប្តី និងប្រពន្ធ ហើយក៏ទាក់ទងនឹងសំណាង និងសុខភាពអ្នកដែរ រួមជាមួយផ្នែកជាច្រើនទៀត។
មានមនុស្សមួយចំនួនបច្ចុប្បន្ននេះចូលចិត្តប្រើគ្រែដែលមានរាងមូល ព្រោះគេយល់ថាវាជាម៉ូតពេញនិយម ហើយក៏ជាម៉ូតថ្មីផងដែរ ប៉ុន្តែអ្នកមិនត្រូវប្រើទេ ព្រោះវាមិនល្អសម្រាប់អ្នក ដូចនេះអ្នកគួរតែប្រើគ្រែដែលមានលក្ខណៈជ្រុងទើបល្អ។
ជាងនេះទៅទៀតក្បាលគ្រែរបស់អ្នកមិនត្រូវបែរចំមុខទ្វារបន្ទប់នោះទេ ព្រោះវាអាចធ្វើឱ្យអ្នកដែលគេងលើគ្រែមានអារម្មណ៍មិនស្ងប់ ហើយពិបាកក្នុងការគេងលក់ ហើយក្បាលគ្រែរបស់អ្នកក៏មិនត្រូវដាក់ជាប់នៅជញ្ជាំងនៃទ្វារបន្ទប់ដែល ព្រោះវាអាចប៉ះពាល់ដល់សំណាងរបស់អ្នក ម្យ៉ាងទៀតក៏មិនត្រូវដាក់នៅក្រោមបង្អួចដែរ ព្រោះវាអាចប៉ះពាល់ដល់ដំណេករបស់អ្នក ធ្វើឱ្យអ្នកមិនអាចគេងលក់ស្រួល ហើយថែមទាំងអាចធ្វើឱ្យអ្នកអស់កម្លាំងទៀតផង ប្រសិនជាបន្ទប់អ្នកមានបន្ទប់ទឹក អ្នកក៏មិនអាចដាក់ក្បាលគ្រែទល់មុខទ្វារបន្ទប់ទឹកដែរ ព្រោះវាអាចជះក្លិន និងនាំយកមេរោគពីបន្ទប់ទឹកមកឱ្យអ្នក ជាហេតុដែលអាចប៉ះពាល់ដល់សុខភាពអ្នកបាន។
នៅក្រោមគ្រែរបស់អ្នក មិនត្រូវដាក់របស់របរច្រើននោះទេ ជាពិសេសស្បែកជើង ហើយរបស់ដែលមានក្លិនមិនល្អ វាអាចប៉ះពាល់ដល់សុខភាពអ្នកបាន សូម្បីតែពណ៌នៃបន្ទប់អ្នកក៏មិនត្រូវជ្រើសរើសភាពឆើតឆាយពេកដែរ ព្រោះវាអាចធ្វើឱ្យអ្នកមានអារម្មណ៍មួលម៉ៅ ហើយមានចិត្តមិនស្ងប់ហើយអាចប៉ះពាល់ដល់មនោសញ្ចេតនារបស់អ្នកទាំងពីរដូចគ្នា។
នៅក្នុងបន្ទប់អ្នកមិនត្រូវផ្ជួររូបថតដែលធំពេកទេ ហើយស៊ុមនៃរូបថតក៏មិនត្រូវក្រាស់ពេកដែរ ហើយក៏មិនត្រូវផ្ជួរលើសពី៣សន្លឹកនោះទេ រីឯចង្កៀងក៏មិនត្រូវងងឹតពេកដែរ ម្យ៉ាងទៀតកម្រាលព្រំអ្នកគួរតែកុំប្រើ ព្រោះវាអាចនាំមេរោគមកឱ្យអ្នកបាន នៅពេលដែលអ្នកមិនសម្អាតទៀងទាត់ ដែលអាចធ្វើឱ្យប៉ះពាល់ដល់សុខភាពអ្នកបាន៕