​យើងទាំងអស់គ្នា​អាចយ​ល់ពី​ភាពខុសគ្នា​រវាង​ការ​គេង​លក់​ស្កប់ស្កល់ និង​ការ​គេង​ដែល​មិន​ទៀត​ទាត់ ឬ​ខ្លី​ពេក​។ ការបាត់បង់​ដំណេក ជាប់លាប់​អាច​នាំឱ្យមាន​បញ្ហា​សុខភាព​ធ្ងន់ធ្ងរ​។

​ការសិក្សា​បាន​ផ្សារភ្ជាប់​បញ្ហា​ដំណេក​រ៉ាំរ៉ៃ​ទៅនឹង​ហានិភ័យ​ខ្ពស់​សម្រាប់​ស្ថានភាព​សុខភាព​ធ្ងន់ធ្ងរ​ដូចជា​៖

១.​ជំងឺ​បេះដូង​
​ការ​គេង​មិន​គ្រប់គ្រាន់​អាច​បណ្តាលឱ្យ​ឡើង​សម្ពាធ​ឈាម​ខ្ពស់ ដែលជា​កត្តា​គ្រោះថ្នាក់​ចម្បង​សម្រាប់​ជំងឺ​បេះដូង និង​សរសៃឈាម​។​

២.​មុខងារ​ភាពស៊ាំ​
​សារធាតុ​ដែល​ផលិត​ដោយ​ប្រព័ន្ធ​ភាពស៊ាំ ដើម្បី​ប្រឆាំងនឹង​ការឆ្លង​ក៏​រួមចំណែក​ដល់​ការ​អស់កម្លាំង​ផងដែរ ដូច្នេះ​អ្នក​ដែល​គេង​បានយូរ ត្រូវបាន​បង្ហាញថា​ឆាប់​ជាសះស្បើយ​ពីជំងឺ។

៣.​ភាពធាត់​លើស​ទម្ងន់​
​មនុស្ស​ដែល​គេង​តិចជាង ៦ ម៉ោង​ក្នុង​មួយ​យប់ ងាយ​នឹងមាន​ស​ន្ទ​ស្សន៍​ម៉ាស​រាងកាយ​ខ្ពស់​។ ហេតុអ្វី​? ក្រុម​អ្នកស្រាវជ្រាវ​ជឿជាក់ថា ការ​គេង​មិន​គ្រប់គ្រាន់ អាចធ្វើឱ្យ​តុល្យភាព​អ័រម៉ូន ដែល​ជួយ​គ្រប់គ្រង​ចំណង់​អាហារ និង​ការរំលាយ​អាហារ ចុះខ្សោយ​។​

៤.​ជំងឺ​ទឹកនោមផ្អែម​
​ជំងឺ​ទឹកនោមផ្អែម​ប្រភេទ ២ ច្រើនតែ​កើតមាន​ចំពោះ​មនុស្ស​ដែល​គេង​មិន​លក់​។ នេះ ត្រូវបាន​គេ​គិតថា ដោយសារតែ​ដំណើរការ​គ្លុយកូស​យឺត​ជាង​អ្នក​ដែល​គេង​ធម្មតា​។​

៥.​ជំងឺ​ធ្លាក់​ទឹកចិត្ត​
​បញ្ហា​ដំណេក​រ៉ាំរ៉ៃ ត្រូវបាន​ផ្សារភ្ជាប់​ជាមួយនឹង​ការធ្លាក់​ទឹកចិត្ត ការ​ថប់​បារម្ភ និង​អារម្មណ៍​ផ្លូវចិត្ត​។​

​ការសិក្សា​បានបង្ហាញ​ផងដែរ​ថា អ្នក​ដែល​គេង​បានជា​មធ្យម​ពី ៧ ទៅ ៨ ម៉ោង​ក្នុង​មួយ​យប់ មាន​អត្រា​មរណភាព​ទាប​ជាង​អ្នក​ដែល​គេង​តិច ឬ​ច្រើនជាង​នេះ​ក្នុង​មួយ​យប់​។​

​អ្នកស្រាវជ្រាវ ផ្នែក​វេជ្ជសាស្ត្រ​នៅតែ​ព្យាយាម​ស្វែងយល់​ឱ្យ​ច្បាស់​ថា តើ​ការងារ​ទាំងអស់នេះ ដំណើរការ​យ៉ាងដូចម្តេច ប៉ុន្តែ​យើង​ដឹងថា​បញ្ហា​ដំណេក គឺជា​ហានិភ័យ​សុខភាព​ដ៏​ធំ​មួយ​៕