Join with Health.com.kh on Telegram

មនុស្ស​យើង នរណា​ៗ​ក៏​ចង់​តែ​រស់​ដោយ​សប្បាយ​ដែរ ហើយ​តែងតែ​គិត​ថា​គេ​នឹង​បាន​សប្បាយ​ខ្លាំង​នៅ​ពេល​ដែល​ចូល​និវត្តន៍​ឈប់​ធ្វើការ​ទៅ ព្រោះ​មាន​ពេលទំនេរ​ច្រើន ចង់​ធ្វើ​អ្វី​ក៏​បាន​។ ក៏​ប៉ុន្តែ​ការ​ពិត​វា​មិនមែន​ដូច្នោះ​ទេ​។

១- ធ្វើ​ទេសចរណ៍
ការ​ដើរ​លេង​កំសាន្ត​វា​ងាយស្រួល​ជាង​កាលណា​អ្នក​នៅ​ក្មេង នៅ​មាន​កម្លាំង ព្រោះ​ងាយស្រួល​ក្នុង​ការ​ធ្វើ​ដំណើរ ងាយស្រួល​ក្នុង​ការ​ហូប​ចុក ងាយស្រួល​ក្នុង​ការ​ស្នាក់​អាស្រ័យ​។ អ្នក​អាច​ជិះ​កង់​ឬ​ម៉ូតូ​មួយ​ជុំ​ប្រទេស ឬ​ជួល​រថយន្ត​គេ​ជិះ​ក៏​បាន ឬ​ជិះ​យន្តហោះ​ទៅ​លេង​បរទេស​ក៏​បាន​។

នៅ​ពេល​ដែល​អ្នក​ចាស់​ទៅ ចង់ទៅ​ណា​មក​ណា​ក៏​ពិបាក ទោះបីជា​គ្រាន់តែ​អង្គុយ​ស្ងៀម​ក្នុង​រថ​ដែល​មាន​ម៉ាស៊ីនត្រជាក់​ក៏​ដោយ​។ ហូប​ចុក​ក៏​ពិបាក ហើយ​ពិបាក​ខ្លាំង​ជាងគេ​គឺ​ទីកន្លែង​គេង ដែល​បើសិនជា​នៅ​ក្មេង​វិញ​អ្នក​អាច​គេង​ក្នុង​រថយន្ត​ក៏​បាន​។

ម្យ៉ាងទៀត ត្រូវ​ដឹង​ថា​អ្វី​ៗ​ចេះ​តែ​ឡើងថ្លៃ​រហូត​ហើយ​។ បើ​ចាំ​ដល់​ចាស់​សឹម​ចេញ​ដើរ ចំណូល​ពេល​នោះ​វា​តិច ឯ​ឥ​វ៉ា​ន់​វា​កាន់តែ​ថ្លៃ​។

២- រៀន​រស់​ជាមួយ​ថវិកា​តិចតួច
នៅ​ពេល​ដែល​ចូល​និវត្តន៍​ទៅ ប្រាក់​សោធន​ដែល​អ្នក​ទទួល​បាន​មាន​មិន​ច្រើន​ទេ​។ ដូច្នេះ នៅ​ពេល​ដែល​អ្នក​នៅ​ពេញកម្លាំង​កំពុង​តែ​រក​ប្រាក់​បាន បើ​ទោះបីជា​អាច​រក​ប្រាក់​បាន​ច្រើន​យ៉ាងណា​ក៏​គួរតែ​ទម្លាប់ខ្លួន​ជាមួយនឹង​ការ​ចាយវាយ​តិចតួច​ឱ្យ​ហើយ​ទៅ​ជា​ការ​ល្អ​។ ម្យ៉ាងទៀត ការ​ចាយវាយ​បែប​នេះ​ក៏​អាច​ជួយ​ឱ្យ​យើង​អាច​សន្សំ​ប្រាក់ ទុក​សម្រាប់​ពេល​ចាស់​ទៅ​ផង​ដែរ​។

ឧទាហរណ៍​មួយ​នៃ​ការ​រស់​ជាមួយនឹង​ចំណាយ​តិចតួច ដូច​ជា​បើ​សមាជិក​ក្នុង​គ្រួសារ​តិច ឬ​បាន​ថយ​ចុះ​រួច​ហើយ អ្នក​អាច​ប្តូរ​ពី​នៅផ្ទះ​ធំ​ល្វឹងល្វើយ មក​នៅ​ក្នុងផ្ទះ​តូច​ល្មម ដែល​មិន​ត្រូវការ​ចំណាយ​ធំ ជា ដើម​។

៣- ហាត់ប្រាណ​ជា​ប្រចាំ
អ្នក​ពិតជា​ចង់​ណាស់​ឱ្យ​នៅ​មាន​សុខភាព​ល្អ​ដល់​ពេល​ចាស់​ទៅ មែន​ទេ? បើ​ដូច្នោះ​មែន សូម​ឧស្សាហ៍​ហាត់ប្រាណ​ឱ្យ​បាន​ជាប់​ជា​ប្រចាំ​តាំងពី​ក្មេង​ទៅ ព្រោះ​គេ​មិន​អាច​ទិញ​សុខភាព​បាន​ទេ ទោះបី​មាន​ប្រាក់​ច្រើន​យ៉ាងណា​ក៏​ដោយ​។ អាច​គួប​ផ្សំ​ការ​ដើរ​ចំនួន​៣០​នាទី​រាល់ថ្ងៃ ជាមួយនឹង​ការ​ហាត់​យោគៈ​ក៏​រឹតតែ​ល្អ​។

៤- មាន​គោលដៅ
ត្រូវ​មាន​គោលដៅ​សម្រាប់​ជួយ​តម្រង់​ទិស កុំឱ្យ​វង្វេង មិន​ច្បាស់លាស់​ក្នុង​ជីវិត និង​មិន​ឱ្យ​ខាត​ពេល វេលា​។ ទិស​ដៅ​នោះ​មិន​ចាំបាច់​ឱ្យ​អស្ចារ្យ ឬ​ខ្ពស់​ខ្លាំង​ណាស់ណា​នោះ​ទេ គ្រាន់តែ​ត្រូវ​ឱ្យ​ជាក់លាក់ អាច​វាស់វែង​បាន និង​អាច​អនុវត្ត​ទៅ​រួច​។

៥- សម្រប​ខ្លួន​សម្រាប់​ការ​ចូល​និវត្តន៍
ពេល​ចូល​និវត្តន៍ អ្នក​នឹង​ត្រូវ​បែក​ឆ្ងាយ​ពី​ការងារ ពី​មិត្តភក្តិ ពី​ទម្លាប់​អនុវត្ត​ប្រចាំ​ថ្ងៃ​។ វា​ហាក់ដូចជា​ពេលវេលា​មួយ​ដែល​អ្នក​ត្រូវ​បាត់បង់​អ្វី​ៗ ដូច​ជា​បុណ្យ​សក្តិ តួនាទី និង​ឋានៈ​ជាដើម​។

ដើម្បី​កុំឱ្យ​ក្លាយទៅជា​”​ឯកា​” អ្នក​ត្រូវ​បង្កើត​បណ្តាញ​ទំនាក់ទំនង​សង្គម​ផ្ទាល់ខ្លួន​មួយ ឬ​ស្ម័គ្រចិត្ត​ចូលរួម​ក្នុង​សកម្មភាព​សង្គម​ណាមួយ ។​ល​។​និង​។​ល​។ ដើម្បី​កុំឱ្យ​នៅ​តែ​ផ្ទះ​នាំ​កើត​អផ្សុក​។