តាមការស្រាវជ្រាវថ្មីមួយរបស់សាស្ត្រាចារ្យនៅសាកលវិទ្យាល័យ University of Utah សហរដ្ឋអាមេរិកបានបង្ហាញថា មនុស្សដែលរៀបការក្រោយអាយុ ៣២ឆ្នាំ នឹងមានអត្រាលែងលះខ្ពស់ជាងធម្មតា។
ការស្រាវជ្រាវនេះធ្វើឡើងដោយសាស្ត្រាចារ្យផ្នែកសង្គមវិជ្ជា Nicholas Wolfinger នៃសាកលវិទ្យាល័យ University of Utah រដ្ឋ Utah សហរដ្ឋអាមេរិក។ ទិន្នន័យដែលយកមកវិភាគ ទទួលបានពីរបាយការណ៍ស្ទាបស្ទង់កំណើនគ្រួសារ ដើម្បីកំណត់ថាអាយុណាប្រឈមជាមួយការលែងលះខ្ពស់។
បើតាមការបញ្ជាក់របស់សាស្ត្រាចារ្យរូបនេះបានបង្ហាញថា អត្រាលែងលះមានទាបប្រសិនបើអ្នករៀបការនៅចន្លោះអាយុ ២៥ឆ្នាំ រហូតដល់ជិត ៣០ឆ្នាំ។ យ៉ាងណាមិញ ប្រសិនបើអ្នករៀបការនៅអាយុក្រោយ ៣២ឆ្នាំ អត្រាលែងលះនឹងកើនឡើង ៥ភាគរយរៀងរាល់ឆ្នាំ។
បើពិនិត្យទៅលើទិន្នន័យក្នុងអំឡុងទសវត្សរ៍ឆ្នាំ១៩៩០ លោក Wolfinger បានសម្គាល់ឃើញថា គូស្នេហ៍ដែលសម្រេចចិត្តនៅវ័យកាន់តែចាស់ អត្រាលែងលះកាន់តែទាបជាងគូស្នេហ៍រៀបការនៅវ័យក្មេង។ យ៉ាងណាក្ដី បច្ចុប្បន្នទិន្នន័យលែងលះមានភាពផ្ទុយគ្នា ទៅនឹងអំឡុងពេលនោះ។
នៅសម័យទំនើប មនុស្សភាគច្រើនរង់ចាំរហូតដល់ចាស់ទើបសម្រេចចិត្តចូលរោងការ ព្រោះចង់មានការងារល្អជាមុន ឬសន្សំថវិកាឲ្យបានច្រើនសិន ប៉ុន្តែអត្រាលែងលះបែរជាមានកាន់តែខ្ពស់ លើសអ្នករៀបការនៅវ័យក្មេងជាង។
លោក Wolfinger មិនបានបញ្ជាក់ពីមូលហេតុច្បាស់ទេ គ្រាន់តែធ្វើការកត់សម្គាល់ថា បន្ទាប់ពីស្រាវជ្រាវរួច លទ្ធផលពុំមានការផ្លាស់ប្ដូរឡើយ បើផ្អែកទៅលើចរិតលក្ខណៈ ស្ថានភាពគ្រួសារ សាសនា ឬទីកន្លែងជាដើម។ យ៉ាងណាក្ដី គូស្នេហ៍មួយចំនួនរៀបការនៅវ័យចំណាស់ដែរ ប៉ុន្តែកំពុងរស់នៅជាមួយគ្នាយ៉ាងមានក្ដីសុខ ដូចជាលោក Brad Pitt និងអ្នកនាង Angelina Jolie ជាឧទាហរណ៍ស្រាប់៕
យល់យ៉ាងណាដែរ ចំពោះលទ្ធផលស្រាវជ្រាវនេះ?