តើអ្នកធ្លាប់សង្កេតឃើញទេថាអាហារពេលព្រឹករបស់អ្នកគឺគ្មានអ្វីប្លែកឡើយពីមួយថ្ងៃទៅមួយថ្ងៃ អ្នកតែងតែបរិភោគអាហារដដែរៗជានិច្ច ដូចនេះខាងក្រោមនេះយើងខ្ញុំនឹងប្រាប់អ្នកពីអាហារពេលព្រឹកមួយប្រភេទដែលឆ្ងាញ់ ហើយងាយស្រួលធ្វើ។ តើគឺជាអ្វីទៅ ហើយមានរបៀបចម្អិនបែបណាទៅ?
នំដំឡូងបារាំង
គ្រឿងផ្សំ ៖ ពងមាន់៣គ្រាប់ ដំឡូងបារាំងមួយផ្លែ ខ្ទឹមបារាំងកន្លះគ្រាប់ ម្រេច អំបិល។
របៀបចម្អិន ៖
- ដំបូងអ្នកត្រូវតែចិតសំបកដំឡូងបារាំងចេញ រួចលាងទឹកឱ្យស្អាត បើអ្នកមិនទាន់ធ្វើភ្លាម អ្នកត្រូវតែយកវាទៅត្រាំក្នុងទឹក ដើម្បីកុំឱ្យវាប្រែពណ៌ រួចចិតខ្ទឹមបារាំងជាសរសៃៗ រួចគោះពងមាន់បែក លាយជាមួយអំបិលវ៉ៃវាឱ្យសព្វ។
- បន្ទាប់មកអ្នកត្រូវដាក់ដំឡូងបារាំងចៀនក្នុងខ្ទះដល់វាឡើងលឿង។
- ក្រោយពេលដែលចៀនរួច អ្នកអាចចាក់ខ្ទឹមបារាំងចូលទៅក្នុងដំឡូងបារាំងនោះ រួចដាក់ម្រេចចូល និងអំបិល ហើយឆារឱ្យសព្វ។
- បន្ទាប់មកទើបចាក់ពងមាន់ចូលទៅក្នុងខ្ទះនោះ ចៀនពី២ទៅ៣នាទី។
- ក្រោយពេលដែលឆ្អិត អ្នកអាចយកចានទាបដែលធំជាងខ្ទះដើម្បីចាក់ពងមាន់នោះចូលទៅក្នុងចានជាការស្រេច។
- អ្នកអាចចិតវាជាដុំតូចៗដើម្បីយកមកបរិភោគ ឬអ្នកអាចពិសារជាមួយទឹកប៉េងប៉ោះក៏បានដែរ នោះអ្នកនឹងអាចទទួលទានអាហារពេលព្រឹកដែលឆ្ងាញ់ ហើយប្លែកដែលអ្នកមិនធ្លាប់ឃើញពីមុន៕