ធ្លាប់ដឹងទេថាការហាត់ប្រាណមិនមែនចាំបាច់តែសម្រាប់អ្នកចង់ស្រកទម្ងន់ឡើយ? ក៏ព្រោះជាក់ស្ដែងការហាត់ប្រាណ គឺសំខាន់សម្រាប់គ្រប់គ្នាដែលចង់រក្សាបាននូវសុខភាពល្អរឹងមាំ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) យោងតាមវេជ្ជបណ្ឌិតជាច្រើនបានឱ្យដឹងថា ការធ្វើលំហាត់ប្រាណទៀងទាត់មិនត្រឹមតែជួយដុតបំផ្លាញជាតិខ្លាញ់ ឬកាឡូរីដែលលើសចេញពីរាងកាយឡើយ ប៉ុន្តែក៏ដើម្បីពង្រឹងប្រព័ន្ធភាពស៊ាំទប់ស្កាត់បញ្ហាសុខភាពផ្សេងៗផងដែរ។ ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីមូលហេតុដែលអ្នកគួរធ្វើលំហាត់ប្រាណទៀងទាត់ ៖
១. លំហាត់ប្រាណជួយទប់ស្កាត់ជំងឺធាត់ជ្រុល
ជាពិសេសប្រសិនបើអ្នកចូលចិត្តទទួលទានភេសជ្ជៈផ្អែមៗ ព្រមទាំងអាហារដែលមានផ្ទុកសម្បូរទៅដោយជាតិខ្លាញ់និងកាឡូរីខ្ពស់! ការមិនធ្វើលំហាត់ប្រាណជាប្រចាំនឹងបណ្ដាលឱ្យរាងកាយស្តុកទុកនូវទម្ងន់ដែលលើស។ អ្វីដែលគួរឱ្យព្រួយបារម្ភថែមទៀតនោះ គឺភាពធាត់ជ្រុលអាចទៅជាបង្កបញ្ហាសុខភាពជាច្រើន។
២. លំហាត់ប្រាណជួយគ្រប់គ្រងសម្ពាធឈាម
ការមិនធ្វើលំហាត់ប្រាណសោះនឹងបង្កផលប៉ះពាល់ដល់មុខងាររបស់បេះដូងក្នុងការច្របាច់ឈាមទៅសព្វរាងកាយដែលនាំឱ្យកើតមានបញ្ហាសុខភាពផ្សេងៗ រួមទាំងជំងឺលើសឈាម។ ហើយនៅពេលសម្ពាធឈាមឡើងខ្ពស់នោះប្រព័ន្ធសសៃឈាមបេះដូងទាំងមូល ក៏ដូចជាបណ្ដាសរីរាង្គផ្សេងទៀតនឹងត្រូវប្រឈមមុខជាមួយគ្រោះថ្នាក់គួរឱ្យព្រួយបារម្ភយ៉ាងខ្លាំងជាមិនខាន។
៣. លំហាត់ប្រាណជួយគ្រប់គ្រងកម្រិតនៃកូឡេស្តេរ៉ូល
យោងតាមវេជ្ជបណ្ឌិតជាច្រើនបានឱ្យដឹងថាផលប៉ះពាល់ផ្សេងទៀតនៃការមិនធ្វើលំហាត់ប្រាណទៀងទាត់ គឺការកើនឡើងខ្ពស់នៃកម្រិតកូឡេស្តេរ៉ូលមិនល្អក្នុងឈាម។ ដូច្នេះដើម្បីចៀសផុតពីបញ្ហាកូឡេស្តេរ៉ូលមិនល្អកើនឡើងខុសប្រក្រតី ចូរធ្វើលំហាត់ប្រាណជាប្រចាំ។
៤. កាត់បន្ថយហានិភ័យនៃជំងឺបេះដូង
ការកើនឡើងនៃសម្ពាធឈាមនិងកូឡេស្តេរ៉ូលមិនល្អ គឺជាកត្តាចម្បងបំផុតនៃបញ្ហាជំងឺបេះដូង។ ហើយកត្តាទាំងពីរនេះជាញឹកញយកើតឡើងដោយសារកង្វះនៃលំហាត់ប្រាណ។ ដូច្នេះប្រសិនបើអ្នកចង់ចៀសផុតពីបញ្ហានៃជំងឺបេះដូង ចូរព្យាយាមធ្វើលំហាត់ប្រាណឱ្យបានទៀងទាត់។
៥. រក្សាសុខភាពសាច់ដុំ
ការធ្វើលំហាត់ប្រាណទៀងទាត់ គឺជាវិធីដ៏ល្អបំផុតមួយដើម្បីបង្កើតនិងរក្សាសាច់ដុំ។ ប្រសិនបើអ្នកមិនធ្វើលំហាត់ប្រាណសោះនោះសាច់ដុំអាចនឹងប្រែជាចុះខ្សោយទៅៗ។ ជាក់ស្ដែងសាច់ដុំអាចនឹងរួមតូចប្រសិនបើអ្នកមិនប្រើប្រាស់វាសោះតាមរយៈការធ្វើលំហាត់ប្រាណ ឬសកម្មភាពរាងកាយ
ផ្សេងទៀត។
៦. ព្យាបាលនិងទប់ស្កាត់បញ្ហាស្ត្រេស ព្រមទាំងជំងឺធ្លាក់ទឹកចិត្ត
នោះក៏ព្រោះតែវិធីសាស្ត្រដ៏ល្អដើម្បីទប់ទល់ភាពស្ត្រេសនិងជំងឺធ្លាក់ទឹកចិត្ត គឺការធ្វើលំហាត់ប្រាណទៀងទាត់។ ប្រសិនបើអ្នកមិនធ្វើលំហាត់ប្រាណជាប្រចាំខួរក្បាលមិនអាចបញ្ចេញនូវអ័រម៉ូនរីករាយគ្រប់គ្រាន់ឡើយ។
៧. ល្អសម្រាប់អ្នកជំងឺទឹកនោមផ្អែម
ការធ្វើលំហាត់ប្រាណអាចផ្ដល់នូវអត្ថប្រយោជន៍ស្មានមិនដល់ជាច្រើនសម្រាប់អ្នកជំងឺទឹកនោមផ្អែម រួមបញ្ចូលទាំងជួយបញ្ចុះកម្រិតនៃជាតិស្ករក្នុងឈាម និងស្ត្រេស។ ន្តែថាតើការធ្វើលំហាត់ប្រាណប៉ុន្មានទៅទើបត្រឹមត្រូវ? មជ្ឈមណ្ឌលស្រាវជ្រាវផ្នែកវេជ្ជសាស្ត្រដ៏សំខាន់បំផុតមួយនៅលើពិភពលោក NIH បានណែនាំឱ្យធ្វើលំហាត់ប្រាណយ៉ាងហោចណាស់ ១៥០ នាទីរាល់សប្តាហ៍។ ហើយចំពោះអ្នកជំងឺទឹកនោមផ្អែមត្រូវហាត់ប្រាណជាប្រចាំមិនគួរផ្អាក ឬរំលងលើសពី ២ ថ្ងៃជាប់គ្នាឡើយ។ ចំណុចគួរកត់សម្គាល់ ៖
- កុំភ្លេចតាមដានកម្រិតនៃជាតិស្ករមុន និងក្រោយពេលធ្វើលំហាត់ប្រាណ ដើម្បីអាចដឹងបានថាតើលទ្ធផលល្អប្រសើរ ឬយ៉ាងណា។
- កម្ដៅសាច់ដុំ ៥ នាទីសិន សឹមធ្វើលំហាត់ប្រាណផ្សេងៗ និងកុំភ្លេចសម្រាកក្រោយហាត់រួច។
- ទទួលទានទានឱ្យច្រើននៅមុនពេល, កំឡុងពេល និងក្រោយពេលធ្វើលំហាត់ប្រាណណាមួយ ដើម្បីទប់ស្កាត់បញ្ហាខ្សោះជាតិទឹកក្នុងរាងកាយ។
- អ្នកក៏គួរធ្វើការពិភាក្សាជាមួយគ្រូពេទ្យក្នុងការជ្រើសរើសលំហាត់ប្រាណណាមួយខាងលើមកអនុវត្ត ដើម្បីប្រាកដថាវាមានសុវត្ថិភាព និងសាកសមជាមួយប្រភេទនៃជំងឺទឹកនោមផ្អែមរបស់អ្នក។
៨. ជួយឱ្យស្បែកតឹងណែនក្រោយស្រកទម្ងន់ដែលលើស
ប្រសិនបើអ្នកចង់បន្តឹងក្បាលពោះដែលយារធ្លាក់ឡើងវិញឆាប់រហ័ស ចូរចាប់ផ្ដើមធ្វើលំហាត់ប្រាណ។ អ្នកមិនចាំបាច់បង្ខំខ្លួនឯងធ្វើលំហាត់ប្រាណខ្លាំងក្លាណាមួយទេពេលចាប់ផ្ដើមដំបូងគ្រាន់តែហាត់យូហ្កា ឬដើរក៏បាន។