Join with Health.com.kh on Telegram

ភាគច្រើននៃពួកយើងសុទ្ធតែស្គាល់និងធ្លាប់ដឹងពីអត្ថប្រយោជន៍នៃក្រូចឆ្មារចំពោះសុខភាព ប៉ុន្តែប្រហែលជាមិនដែលចាប់អារម្មណ៍ទេថាវាក៏អាចផ្ដល់ផលល្អៗចំពោះសុខភាពសក់ផងដែរ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ប្រើប្រាស់យ៉ាងដូចម្ដេចទៅ? កុំបារម្ភ! ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីវិធីងាយៗប្រើប្រាស់ក្រូចឆ្មារដោះស្រាយបញ្ហាសក់ផ្សេងៗ ៖

១. ខាត់ស្បែកក្បាល

ក្រូចឆ្មារអាចជួយសម្អាតស្បែកក្បាលកម្ចាត់ភាពកខ្វក់និងជម្រុញលំហូរឈាមត្រង់តំបន់នេះ ហើយបង្កើនការលូតលាស់នៃសក់បានយ៉ាងប្រសើរ។ អ្វីដែលអ្នកត្រូវធ្វើ គឺគ្រាន់តែលាយទឹកក្រូចឆ្មារស្រស់ជាមួយទឹកខ្មេះពណ៌សក្នុងបរិមាណស្មើគ្នា រួចលាបម៉ាស្សាលើស្បែកក្បាលសម្រាប់រយៈពេល ១០នាទី។ លាងសម្អាតចេញតាមក្រោយជាមួយសាប៊ូកក់សក់កម្រិតស្រាលជាការស្រេច។

២. កម្ចាត់អង្គែ

អ្វីដែលអ្នកត្រូវធ្វើ គឺកាត់ក្រូចឆ្មារទុំមួយផ្លែជា ២ កំណាត់ច្របាច់យកទឹក។ បន្ទាប់មកលាបទឹកក្រូចឆ្មារផ្ទាល់លើស្បែកក្បាលដោយម៉ាស្សាថ្នមៗសម្រាប់រយៈពេលពី ២ ទៅ ៣ នាទីនិងទុកចោលសម្រាប់រយៈពេលពី ៥ ទៅ ១០ នាទី។ លាងសម្អាតចេញជាមួយទឹកត្រជាក់។ មុននឹងលាបពេញលើស្បែកក្បាល អ្នកគួរប្រើប្រាស់ទឹកក្រូចឆ្មារត្រឹមតែបន្តិចទុកជាការសាកល្បងសិនដើម្បីប្រាកដថាវាមិនបង្កការរលាកដល់ស្បែក។

៣. បង្កើនការលូតលាស់នៃសក់

អ្វីដែលអ្នកត្រូវធ្វើ គឺគ្រាន់តែលាយទឹកក្រូចឆ្មារស្រស់ ១ ផ្លែជាមួយទឹកធម្មតាប​ន្តិច។ កូរឱ្យសព្វ សឹមលាបល្បាយលើស្បែកក្បាលនិងសក់ដោយម៉ាស្សាថ្នមៗសម្រាប់រយៈពេល ៥ នាទី។ ទុកចោលលើស្បែកក្បាលសម្រាប់រយៈពេលពី ៨ ទៅ ១០ នាទីសឹមលាងសម្អាតចេញ ហើយកក់សក់​និងប្រើប្រាស់ក្រែមបន្ទន់ដូចពេលធម្មតា។ អនុ​វត្តឱ្យបាន ២ ដងក្នុងមួយសប្តាហ៍។

៤. ទប់ទល់បញ្ហាសក់ឡើងប្រេងខ្លាំង

ច្របាច់ក្រូចឆ្មារ ២ ផ្លែយកទឹកលាយជាមួយទឹកធម្មតា ២ ពែងនិងទឹកឃ្មុំ ៣ ស្លាបព្រាកាហ្វេ។ កូរអោយសព្វសឹមលាបម៉ាស្សាល្បាយលើស្បែកក្បាលនិងសក់សម្រាប់រយៈពេលពី ២ ទៅ ៣ នាទី។ ទុកចោលសម្រាប់រយៈពេល ៥ នាទីសឹមលាងសម្អាតចេញជាមួយទឹកក្ដៅឧណ្ហៗ។ អនុវត្តអោយបានយ៉ាងហោចណាស់ ៣ ដងក្នុងមួយសប្តាហ៍។ អ្នកក៏អាចលាយទឹកក្រូចឆ្មារស្រស់ ១ស្លាបព្រាបាយជាមួយផ្នែកពណ៌សនៃស៊ុត ១ស្លាបព្រាបាយ។ កូរឱ្យសព្វ សឹមលាបម៉ាស្សាលើស្បែកក្បាលនិងរងចាំសម្រាប់រយៈពេល ៣០នាទី។ លាងសម្អាតចេញតាមក្រោយជាមួយសាប៊ូកក់សក់កម្រិតស្រាល។

៥. ផ្ដល់សំណើមដល់សក់

អ្វីដែលអ្នកត្រូវធ្វើ គឺគ្រាន់តែលាយស៊ុត ១ គ្រាប់ជាមួយប្រេងអូលីវ ១ ស្លាបព្រាបាយនិងទឹកក្រូចឆ្មារស្រស់ចំនួនម្ខាង។ កូរឱ្យសព្វ សឹមលាបល្បាយលើស្បែកក្បាលនិងសក់ រួចទុកចោលរហូតដល់ស្ងួត សឹមលាងសម្អាតចេញជាមួយទឹកធម្មតា។

៦. ពង្រឹងភាពរឹងមាំនៃសក់

អ្វីដែលអ្នកត្រូវការ គឺលាយជែលប្រទាលកន្ទុយក្រពើស្រស់ជាមួយទឹកឃ្មុំ និងទឹកក្រូចឆ្មារស្រស់បន្តិចឱ្យក្លាយជាល្បាយខាប់ៗ។ លាបម៉ាស្សាល្បាយលើសក់និងស្បែកក្បាល ហើយរងចាំសម្រាប់រយៈពេល ២០នាទីសឹមលាងសម្អាតចេញ។ សក់របស់អ្នកត្រូវការវីតាមីននិងជាតិរ៉ែចាំបាច់ដើម្បីរក្សាភាពរឹងមាំ ហើយម៉ាសនេះផ្ដល់ប្រសិទ្ធភាពខ្ពស់គួរឱ្យកត់សម្គាល់។

៧. ព្យាបាលស្បែកក្បាលដែលរមាស់

ប្រសិនបើអ្នកកំពុងមានបញ្ហារមាស់ស្បែកក្បាល អ្នកអាចគ្រាន់តែលាយទឹកក្រូចឆ្មារស្រស់ជាមួយសាប៊ូកក់សក់។ បន្ទាប់មកកក់សម្អាតសក់ដូចពេលធម្មតា។ កុំភ្លេចប្រើប្រាស់ក្រែមបន្ទន់ និងលាងជម្រះចេញឱ្យបានស្អាតជាមួយទឹកត្រជាក់។ រូបមន្តនេះនឹងជួយឱ្យស្បែកក្បាលស្រស់ស្អាតមានសុខភាពល្អ៕