ភាគច្រើននៃពួកយើងចូលចិត្តទទួលទានកាហ្វេដោយមិនគិតថាវាអាចផ្ដល់អត្ថប្រយោជន៍ ឬផលប៉ះពាល់អ្វីខ្លះនោះទេ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ពិតណាស់កាហ្វេអាចផ្ដល់នូវផលល្អៗស្មានមិនដល់ជាច្រើនចំពោះសុខភាពប្រសិនបើទទួលទានបានត្រឹមត្រូវ។ ទោះជាយ៉ាងណាកាហ្វេក៏នឹងផ្ដល់ផលប៉ះពាល់គួរឱ្យព្រួយបារម្ភប្រសិនបើទទួលទានលើសកម្រិត។ ប៉ុន្តែថាតើគួរទទួលទានកាហ្វេបែបណាទៅទើបល្អមែនទេ? ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីទម្លាប់មួយចំនួនក្នុងការទទួលទានកាហ្វេដើម្បីពង្រឹងសុខភាពឱ្យកាន់តែប្រសើរ ៖
១. ទទួលទានកាហ្វេ ៣០នាទីមុន ឬក្រោយពេលប្រជុំ ឬធ្វើបទបង្ហាញ
រាងកាយអាចស្រូបយកជាតិកាហ្វេអ៊ីនតែពាក់កណ្ដាលប៉ុណ្ណោះនៅពេលទទួលទានក្នុងកំឡុងពេល ៧នាទី។ ដូច្នេះរាងកាយរបស់អ្នកនឹងអាចរំលាយកាហ្វេបានពេញលេញក្នុងចន្លោះពេល ៣០នាទីដែលផ្ដល់ឱ្យអ្នកនូវថាមពលនិងការប្រមូលផ្ដុំផ្ដោតអារម្មណ៍បានយ៉ាងប្រសើរ។ ការទទួលទានកាហ្វេ ៣០នាទីមុនពេលកិច្ចប្រជុំដ៏សំខាន់ណាមួយនឹងជួយអ្នកឱ្យផ្ដោតអារម្មណ៍និងចងចាំបានកាន់តែច្រើន។
២. ទទួលទានកាហ្វេដោយមិនដាក់ស្ករ
តាមពិតទៅយើងគ្រប់គ្នាគួរទទួលទានកាហ្វេដោយមិនដាក់ស្ករ ឬបន្ថែមជាតិផ្អែមសិប្បនិមិត្តផ្សេងៗចូល។ នោះក៏ព្រោះតែស្ករស ឬជាតិផ្អែមជាគ្រឿងផ្សំដ៏គ្រោះថ្នាក់បំផុតមួយចំពោះសុខភាពនៅពេលទទួលទានច្រើន។ ប្រសិនបើអ្នកឃ្លានផ្អែមមិនអាចទ្រាំបាន ឬមិនចេះទទួលទានកាហ្វេមិនដាក់ស្ករ ចូរព្យាយាមប្រើប្រាស់ជាតិផ្អែមធម្មជាតិចូលវិញ ឬកាត់បន្ថយបិរមាណជាតិស្ករពាក់កណ្ដាល។
៣. ចៀសវាងទទួលទានកាហ្វេក្រោយម៉ោង ២ រសៀល
ភាគច្រើននៃពួកយើងសុទ្ធតែដឹងហើយថា កាហ្វេជាភេសជ្ជៈម្យ៉ាងដែលមានប្រសិទ្ធភាពជួយឱ្យស្វាងងងុយគេង ហេតុនេះការទទួលទានវាលើសកម្រិតអាចបង្កផលប៉ះពាល់ដល់ដំណេកគួរឱ្យកត់សម្គាល់។ ដូច្នេះដើម្បីជាការប្រសើរគេងលក់បានស្រួលអ្នកគួរទទួលទានកាហ្វេត្រឹម ២ ទៅ ៣ កែវនៅពេលព្រឹក ហើយចៀសវាងទទួលទានកំឡុងពេលក្រោយម៉ោង ២ ទៅ ៣ រសៀល។ ប្រសិនបើមិនអាចទ្រាំបានអ្នកអាចសាកល្បងទទួលទានតែជំនួសវិញនៅពេលរសៀល។
៤. កុំទទួលទានកាហ្វេតែមួយមុខនៅពេលព្រឹក
ការទទួលទានភេសជ្ជៈនេះនៅពេលព្រឹកដោយមិនទាន់ទទួលទានអ្វីសោះអាចបង្កផលប៉ះពាល់អាក្រក់ច្រើនជាងល្អចំពោះសុខភាព។ កាហ្វេបង្កើនអាស៊ីតក្រពះដែលបណ្ដាលឱ្យពិបាករំលាយអាហារ និងក្រហាយទ្រូង។ វាក៏អាចបង្កប៉ះពាល់ដល់ប្រព័ន្ធសរសៃប្រសាទធ្វើឱ្យអ្នកមានអារម្មណ៍តប់ប្រមល់ផងដែរ។
៥. កុំឆុងកាហ្វេជាមួយទឹកដែលមិនបានច្រោះត្រឹមត្រូវ
មនុស្សភាគច្រើនប្រើប្រាស់ទឹកពុះក្នុងការឆុងកាហ្វេដោយមិនចាប់អារម្មណ៍ថាតើទឹកដែលយកមកនោះបានច្រោះត្រឹមត្រូវឫអត់ឡើយ។ តើអ្កនធ្លាប់ដឹងទេថាកាហ្វេដែលប្រើប្រាស់ទឹកច្រោះស្អាតមកឆុងមិនត្រឹមតែមានរសជាតិឆ្ងាញ់ប៉ុណ្ណោះទេ ប៉ុន្តែវាថែមទាំងមិនផ្ទុកនូវជាតិលោហៈពីបំពង់ទឹកចាស់ៗ ឬជាតិក្ល៉រូអ៊ីនទៀតផង។
៦. ចៀសវាងទទួលទានកាហ្វេលើសកំរិត
កាហ្វេជាប្រភេទភេសជ្ជៈម្យ៉ាងដែលអាចធ្វើឱ្យអ្នកទទួលទានញៀនបានយ៉ាងងាយ ដូច្នេះដើម្បីជាការប្រសើរចៀសផុតបញ្ហាញ័រ ឈឺក្បាល ឬអាការៈផ្សេងទៀតនៃការញៀនកាហ្វេ ចូរព្យាយាមកម្រិតការទទួលទានរបស់អ្នក៕