ចង់ឱ្យក្រចកមានសភាពរលោងស្អាតរឹងមាំមែនទេ? (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) មិនពិបាកឡើយ! ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីរូបមន្តបែបធម្មជាតិឱ្យក្រចកស្រស់ស្អាត ៖
១. ទឹកខ្មេះផ្លែប៉ោម
អ្វីដែលអ្នកត្រូវធ្វើ គឺគ្រាន់តែលាយទឹកខ្មេះផ្លែប៉ោមឆៅជាមួយទឹកធម្មតាក្នុងបរិមាណស្មើគ្នាក្នុងចានគោមតូចមួយ។ បន្ទាប់មកជ្រលក់ត្រាំក្រចកក្នុងទឹកល្បាយសម្រាប់រយៈពេលពី ២ ទៅ ៣ នាទី។ អនុវត្តម្ដងក្នុងមួយថ្ងៃជាប្រចាំសម្រាប់រយៈពេលពី ២ ទៅ ៣ថ្ងៃ។
២. ផ្នែកពណ៌លឿងនៃស៊ុត
សម្រាប់អ្នកដែលជួបប្រទះបញ្ហាក្រចកផុយស្រួយឆាប់បាក់ដោយសារភាពស្ងួតខ្លាំង នោះអ្វីដែលអ្នកត្រូវការ គឺផ្នែកពណ៌លឿងនៃស៊ុត។ អ្វីដែលអ្នកត្រូវធ្វើ គឺលាយផ្នែកពណ៌លឿងនៃស៊ុត ១គ្រាប់ជាមួយទឹកដោះគោស្រស់មួយចំនួន។ បន្ទាប់មកលាបម៉ាស្សាល្បាយនេះលើក្រចកសម្រាប់រយៈពេលពី ២ ទៅ ៣ នាទី។ លាងសម្អាតចេញតាមក្រោយជាមួយទឹកធម្មតា។
៣. ប៉េងប៉ោះ
លាយទឹកប៉េងប៉ោះស្រស់ចំនួនកន្លះពែងជាមួយប្រេងអូលីវ ២ស្លាបព្រាបាយ។ លាយឱ្យសព្វ សឹមជ្រលក់ត្រាំក្រចកក្នុងទឹកល្បាយនេះសម្រាប់រយៈពេល ១០នាទី។ លាងសម្អាតចេញជាមួយទឹកធម្មតា។ អនុវត្តជាប្រចាំរហូតទទួលបានលទ្ធផលគាប់ចិត្ត។
៤. តែបៃតង
ឆុងតែទឹកតែបៃតងមួយចំនួន បន្ទាប់មកសឹមត្រាំក្រចកក្នុងទឹកតែដែលចុះត្រជាក់សម្រាប់រយៈពេល ១៥នាទី។ អនុវត្តឱ្យបាន ២ដងក្នុងមួយសប្តាហ៍។
៥. ត្រសក់
អ្នកអាចដោះស្រាយបញ្ហាក្រចកផុយស្រួយឆាប់បាក់បានយ៉ាងងាយដោយគ្រាន់តែត្រាំក្រចកក្នុងទឹកត្រសក់ស្រស់សម្រាប់រយៈពេល ៥ នាទីជាការស្រេច។ អនុវត្តជាប្រចាំរហូតទទួលបានលទ្ធផលគាប់ចិត្ត។
៦. ប្រេងដើមតែ
រូបមន្តនេះល្អណាស់សម្រាប់បំបាត់បញ្ហារោគផ្សិតលើក្រចកនិងធ្វើឱ្យក្រចកមានសុខភាពល្អ។ អ្វីដែលអ្នកត្រូវធ្វើ គឺគ្រាន់តែលាបប្រេងដើមតែលើក្រចក។
៧. ទឹកក្រូចឆ្មារស្រស់និងម្សៅ Baking soda
ដើម្បីសម្អាតក្រចកអ្វីដែលអ្នកត្រូវធ្វើ គឺគ្រាន់តែលាយម្សៅ Baking soda ជាមួយទឹកក្រូចឆ្មារស្រស់ឱ្យក្លាយជាល្បាយខាប់ៗ រួចប្រើច្រាស់ដុសធ្មេញជ្រលក់ក្នុងល្បាយរួចលាបដុសលើក្រចក។
៨. ប្រេងដូង
ប្រេងដូងជួយផ្ដល់សារធាតុចិញ្ចឹម រក្សាភាពរឹងមាំ និងសំណើមនៃក្រចក។ អ្វីដែលអ្នកត្រូវធ្វើ គឺគ្រាន់តែលាបម៉ាស្សាប្រេងដូងដែលក្ដៅឧណ្ហៗប៉ុន្មានដំណក់លើក្រចករហូតដល់វាត្រូវបានស្រូបចូលអស់។
៩. ទឹកខ្មេះផ្លែប៉ោម
រូបមន្តនេះសាកសមសម្រាប់ព្យាបាលក្រចកដែលឆ្លងមេរោគ។ អ្វីដែលអ្នកត្រូវធ្វើ គឺគ្រាន់តែលាយទឹកខ្មេះផ្លែប៉ោមជាមួយទឹកធម្មតាក្នុងបរិមាណស្មើគ្នា។ ត្រាំក្រចកក្នុងទឹកល្បាយសម្រាប់រយៈពេលប្រហែល ៣០ នាទី។
- របបអាហារជះឥទ្ធិពលលើសុខភាពរាងកាយទាំងមូលរួមបញ្ចូលទាំងភាពរឹងមាំនៃក្រចក។ ខាងក្រោមជាប្រភទនៃអាហារដែលអ្នកគួរព្យាយាមបង្កើនការទទួលទានដើម្បីព្យាបាលបញ្ហាក្រចកផុយស្រួយឆាប់បាក់ ៖
១. ត្រី
ត្រីជាអាហារមួយប្រភេទដែលអ្នកគួរព្យាយាមទទួលទានដើម្បីពង្រឹងសុខភាពក្រចក។ នេះក៏ព្រោះតែត្រីជាប្រភពដ៏ប្រសើរនៃប្រូតេអ៊ីនដែលក្រចកត្រូវការដើម្បីរក្សាភាពរឹងមាំ។ ប្រូតេអ៊ីនក្នុងត្រីអាចបង្កើនការផលិតកូឡាជែននិងសារធាតុ keratin ដែលចាំបាច់សម្រាប់សក់និងក្រចក។
២. គ្រាប់អាល់ម៉ុន
អាហារមួយប្រភេទទៀតដែលអ្នកគួររួមបញ្ចូលក្នុងរបបអាហារដើម្បីភាពរឹងមាំនិងសុខភាពល្អនៃក្រចក គឺគ្រាប់អាល់ម៉ុន។ គ្រាប់ធញ្ញជាតិនេះជាប្រភពដ៏ប្រសើរបំផុតមួយនៃស័ង្កសី ម៉ាញ៉េស្យូម សេលេញ៉ូម ទង់ដែងនិងម៉ង់កាណែស រួមទាំងបាយអូទីនដែលសុទ្ធតែចាំបាច់សម្រាប់ពង្រឹងសុខភាពក្រចក។
៣. ផ្លែបឺរ
ជាប្រភពដ៏ប្រសើរនៃវីតាមីន A វីតាមីន B វីតាមីន E សារធាតុ folate ប្រូតេអ៊ីន និងខ្លាញ់ល្អដែលល្អណាស់សម្រាប់រក្សាសុខភាពរាងកាយ ព្រមទាំងពង្រឹងភាពរឹងមាំនៃក្រចក។
៤. អាហារមានផ្ទុកសម្បូរទៅដោយជាតិដែក
ក្រចកអាចប្រែជាផុយស្រួយឆាប់បាក់នៅពេលរាងកាយជួបប្រទះបញ្ហាខ្វះជាតិដែក។ នេះហើយជាមូលហេតុដែលអ្នកចាំបាច់គួរបង្កើនការទទួលទានអាហារមានផ្ទុកជាតិដែកខ្ពស់ដើម្បីរក្សាភាពរឹងមាំនៃក្រចក។
៥. ស៊ុត
ចូរព្យាយាមទទួលទានស៊ុតជាប្រចាំប្រសិនបើចង់ឱ្យក្រចករឹងមាំមានសុខភាពល្អ។ នេះក៏ព្រោះតែស៊ុតជាប្រភពដ៏ប្រសើរនៃបាយអូទីន រួមទាំងប្រតេអ៊ីននិងសារធាតុចិញ្ចឹមច្រើនផ្សេងទៀតដែលចាំបាច់សម្រាប់សុខភាពក្រចក។
៦. បន្លែបៃតង
មានផ្ទុកសម្បូរទៅដោយសារធាតុចិញ្ចឹម ជាតិរ៉ែសំខាន់ៗ សារធាតុប្រឆាំងអុកស៊ីតកម្ម និងជាតិរ៉ែចាំបាច់ដែលចាំបាច់សម្រាប់រក្សាសុខភាពក្រចករឹងមាំ។
៧. ប៉េងប៉ោះ ម្ទេសផ្លោក ដំឡូងផ្អែម និងការ៉ុត
ប៉េងប៉ោះនិងម្ទេសផ្លោកមានផ្ទុកសម្បូរទៅដោយវីតាមីន C ដែលជួយបង្កើនកម្រិតនៃកូឡាជែន ហើយដំឡូងផ្អែមនិងការ៉ុតមានផ្ទុកសម្បូរទៅដោយវីតាមីន A ដែលជាសារធាតុប្រឆាំងអុកស៊ីតកម្មចាំបាច់ជួយការពារសុខភាពក្រចកនិងពង្រឹងភាពរឹងមាំ។
៨. សណ្ដែក
មានផ្ទុកសម្បូរទៅដោយបាយអូទីនដែលចាំបាច់សម្រាប់រក្សាភាពរឹងមាំនិងការលូតលាស់នៃក្រចក៕