ចំណុចសម្គាល់ដ៏គួរឲ្យភ្ញាក់ផ្អើលបំផុតក្នុងពេលមានផ្ទៃពោះគឺនៅពេលដែលអ្នកមានអារម្មណ៍ដំបូងដឹងថា កូនក្នុងផ្ទៃកំពុងតែកម្រើក ឬធាក់តិចៗ។ ចលនាទាំងនេះបង្ហាញថា កូនអ្នកកំពុងតែរស់រវើក និងលូតលាស់បានយ៉ាងល្អ។
បើសិនជាចលនារបស់កូនថយចុះ ឬឈប់ វាអាចបញ្ជាក់ថា មានបញ្ហាចំពោះសុខភាពហើយ។ ចូរយកចិត្តទុកដាក់ទៅលើលក្ខណៈនៃការធ្វើចលនារបស់កូនក្នុងផ្ទះ និងប្រាប់ដល់គ្រូពេទ្យឲ្យបានដឹងផងបើសិនជាមានអ្វីមួយប្រែប្រួល។
តើពេលណាទើបកូនខ្ញុំចេះកម្រើក?
អ្នកប្រហែលជាចាប់ផ្តើមមានអារម្មណ៍ថា កូនកំពុងតែកម្រើក ឬធាក់ នៅជុំវិញសប្តាហ៍ទី ១៨ នៃការមានផ្ទៃពោះ។ បើសិនជាកូនដំបូងវិញ វាអាចនឹងពន្យាពេលរហូតដល់ សប្តាហ៍ទី២០ឯណោះ។ យ៉ាងណាមិញ សម្រាប់ស្ត្រីកូនទីពីរហើយ អ្នកអាចនឹងសម្គាល់ឃើញអាការៈនេះនៅសប្តាហ៍ទី ១៦។
តើអារម្មណ៍នៃការកម្រើករបស់កូនមានលក្ខណៈបែបណាទៅ?
ប្រភេទនៃការធ្វើចលនារបស់កូនអាស្រ័យទៅតាមអ្វីដែលកូនអ្នកកំពុងតែធ្វើ និងដំណាក់កាលនៃការលូតលាស់របស់គេដែរ។ រាល់ទារកនីមួយៗគឺមានលក្ខណៈខុសៗគ្នា ខ្លះក៏មានភាពសកម្មជាង ខ្លះក៏មិនសូវដែរ។
អារម្មណ៍ដឹងដំបូងថាកូនកំពុងតែកម្រើកនោះ អាចជាការធាក់ បង្វិលខ្លួន ឬដូចដួលរលំ។ នៅពេលអាយុគ័រកាន់តែច្រើន ចលនាធម្មតារបស់ទារកនឹងកាន់តែច្រើន និងញឹកញាប់ជាងមុនដែរ។
នៅពេលកូនកាន់តែធំ និងរឹងមាំ ស្បែកអ្នកក៏អាចនឹងតឹងជាងមុន ហើយក៏ងាយនឹងមានអារម្មណ៍ដឹងថាកូនកំពុងតែឡើងជង្គង់ និងឲ្យកែងដែរ។ ដល់ពេលជិតគ្រប់ខែ ការធាក់របស់កូនអាចគ្រប់គ្រាន់នឹងធ្វើឲ្យអ្នកឈឺខ្លាំងបាន ជាពិសេសនៅតំបន់ឆ្អឹងជំនីតែម្តង។
តើកូនគួរតែកម្រើកញឹកញាប់ប៉ុណ្ណាទៅ?
នៅពេលអ្នកមានអារម្មណ៍ដឹងថាកូនកំពុងតែកម្រើក (ជុំវិញសប្តាហទី ២០ ទៅ២៤) អ្នកនឹងសម្គាល់ឃើញអាការៈនេះកាន់តែញឹកញាប់ហើយ។ យ៉ាងណាមិញ អ្នកប្រហែលជាមិនអាចមានអារម្មណ៍ដឹងការកម្រើកនេះជានិច្ចនោះទេ ជាពិសេសបើសិនជាអ្នករវល់ធ្វើការងារ និងមិនយកចិត្តទុកដាក់នោះ។
ទារកនឹងធ្វើចលនាកាន់តែច្រើននៅពេលថ្ងៃ ហើយក៏អាចមានភាពសកម្មច្រើននៅពេលអ្នកកំពុងតែគេង និងគ្រប់គ្រាន់ធ្វើឲ្យអ្នកភ្ញាក់បានដែរ។ ជាធម្មតា ទារកក្នុងផ្ទៃអាចគេងតែ ២០ ទៅ៤០នាទីប៉ុណ្ណោះ (អាចគេងដល់ ៩០នាទីម្តងម្កាលដែរ) ហើយគេក៏មិនធ្វើចលនាអ្វីដែរនៅពេលគេគេង។
ការធ្វើចលនារបស់កូនអាចនឹងប្រែប្រួលនៅពេលគេលូតលាស់បានកាន់តែច្រើន ហើយគួរតែធ្វើចលនានោះកាន់តែញឹកញាប់ជាងមុនទៀតក្នុងត្រីមាសទី៣។ ដល់ពេលជិតគ្រប់ខែ អ្នកអាចនឹងមានអារម្មណ៍ដឹងថាកូនធ្វើចលនាញឹកញាប់ពី ១៦ ទៅ៤៥ដងក្នុងមួយម៉ោងឯណោះ។ ក្មេងដែលមានសុខភាពគឺនៅតែធ្វើចលនាអញ្ចឹងទោះបីជាក្នុងពេលអ្នកសម្រាលក៏ដោយ។
តើគួរធ្វើអ្វីទៅបើសិនជាកូនឈប់កម្រើក?
បើសិនជាចលនារបស់កូនថយចុះ ឬឈប់ វាអាចជាសញ្ញាមួយដែលបញ្ជាក់ថាមានបញ្ហាហើយ។ បើសិនជាអ្នកមិនមានអារម្មណ៍ថាកូនមិនធ្វើចលនាក្នុងពោះសោះរយៈពេល ២៤សប្តាហ៍ហើយ ឬធ្វើចលនាតិច ឬធ្វើឲ្យអ្នកបារម្ភច្រើន ចូរទៅឲ្យគ្រូពេទ្យពីនិត្យទៅ។ អ្នកអាចគេងចំហៀងមកឆ្វេង ដោយមានខ្នើយទ្រពោះផង និងផ្ចង់អារម្មណ៍រកមើលការកម្រើករបស់កូនរយៈពេលពីរម៉ោង។ បើសិនជាកូនកម្រើកមិនដល់ ១០ដងផងក្នុងរយៈពេលពីរម៉ោង ចូរទាក់ទងទៅគ្រូពេទ្យភ្លាម។
បើសិនជាអ្នកសង្ស័យថាកូនកំពុងតែមានបញ្ហា ថ្វីបើគេកម្រើកចាប់ពី ១០ដងហើយក៏ដោយ ដើម្បីសុវត្ថិភាព មិនត្រូវរងចាំមិនទាក់ទងគ្រូពេទ្យឡើយ។ ដល់ពេលនោះគ្រូពេទ្យនឹងពិនិត្យទៅលើចង្វាក់បេះដូង និងចលនារបស់កូន។ បើសិនជាចាំបាច់ គាត់នឹងបញ្ជូនអ្នកទៅមន្ទីរពេទ្យដើម្បីព្យាបាលបន្ថែម៕
