ក្រុមហ៊ុន Moderna បានប្រកាសថា វ៉ាក់សាំងកូវីដរបស់ខ្លួនមានប្រសិទ្ធភាព៩០ ភាគរយប្រឆាំងនឹងវីរុសកូរ៉ូណាគ្រប់ទម្រង់ និងមានប្រសិទ្ធភាព ៩៥ ភាគរយប្រឆាំងនឹងការធ្លាក់ខ្លួនឈឺធ្ងន់ធ្ងរ។
លទ្ធផលថ្មីនេះ គឺបានមកពីការសាកល្បងព្យាបាលដំណាក់កាលទី ៣ ដែលកំពុងដំណើរការដោយមានការចូលរួមពីមនុស្សជាង ៣០.០០០នាក់នៅទូទាំងអាមេរិក ហើយតួលេខប្រសិទ្ធភាពគឺមានការថយចុះបន្តិចពីតួលេខមុន ៩៤,១ ភាគរយ។
តួលេខថ្មីនេះ គឺផ្អែកទៅលើករណីកូវីដ ដែលបានធ្វើរោគវិនិច្ឆ័យចំនួន ៩០០ ករណីពីការសិក្សាគិតត្រឹមថ្ងៃទី ៩ ខែមេសា ខណៈតួលេខមុនគឺផ្អែកលើកូវីដ ១៨៥ ករណី។
សេចក្តីប្រកាសព័ត៌មានរបស់ក្រុមហ៊ុនមិនបានបញ្ជាក់ពីមូលហេតុដែលប្រសិទ្ធភាពបានធ្លាក់ចុះនោះទេ ប៉ុន្តែហេតុផលមួយអាចមកពីការលេចឡើងនូវមេរោគបំលែងខ្លួនថ្មីគួរឱ្យបារម្ភ ដែលមិនងាយដាស់អង្គបដិប្រាណឱ្យជំរុញសកម្មភាពរបស់វ៉ាក់សាំង។
Moderna កំពុងធ្វើការលើ Booster របស់វីរុសបំលែងខ្លួនជាក់លាក់ចំនួនពីរ ហើយនិយាយថាការសិក្សាលើសត្វកណ្តុរបង្ហាញថា ពួកវាបានបង្កើនការឆ្លើយតបរបស់ប្រព័ន្ធភាពស៊ាំ។លទ្ធផលនៃការសិក្សាទាំងនេះ ត្រូវបានផ្សព្វផ្សាយតាមអនឡាញនៅក្នុងឯកសារវិទ្យាសាស្ត្រមួយ ដែលឥឡូវនេះកំពុងរង់ចាំការពិនិត្យមើលពីអ្នកវិទ្យាសាស្ត្រគ្នាឯង៕