ការបែកញើស គឺជាប្រតិកម្មទូទៅមួយរបស់រាងកាយតបតនឹងកម្ដៅ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) បញ្ហាបែកញើសខ្លាំងមិនពិបាកនឹងដោះស្រាយឡើយ! គួរធ្វើបែបណាទៅ? កុំបារម្ភ! ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីគន្លឹះងាយៗទប់ទល់បញ្ហាបែកញើសខ្លាំង ៖

១. ទឹកប៉េងប៉ោះស្រស់

ក្រៅពីផ្ដល់អត្ថប្រយោជន៍ប្រឆាំងហានិភ័យនៃជំងឺមហារីកហើយនោះ ទឹកផ្លែប៉េងប៉ោះស្រស់ក៏ជួយបង្រួមរន្ធញើសបន្ថយការបែកញើសផងដែរ។ ការទទួលទានរបបអាហារដែលមានផ្ទុកប៉េងប៉ោះ ឬគ្រាន់តែទទួលទានទឹកប៉េងប៉ោះស្រស់ៗ ១កែវក្នុងមួយថ្ងៃពិតជាអាចជួយអ្នកគ្រប់គ្រងការបែកញើសហួសប្រមាណ។ អ្នកក៏អាចលាបទឹកប៉េងប៉ោះស្រស់លើថ្ងាសនិងរងចាំសម្រាប់រយៈពេលយ៉ាងហោចណាស់ ១០នាទី សឹមលាងសម្អាតចេញ។

២. តែខ្មៅ

អ្វីដែលអ្នកត្រូវធ្វើ គឺគ្រាន់តែឆុងតែខ្មៅ ១កញ្ចប់តូចក្នុងទឹកមួយពែង និងរងចាំរហូតដល់ចុះត្រជាក់សិន។ បន្ទាប់មកសឹមប្រើប្រាស់ក្រណាត់ស្អាតជ្រលក់ក្នុងទឹកតែនិងលាបដុសលើថ្ងាសសម្រាប់រយៈពេលពី ២ ទៅ ៣នាទីជាការស្រេច។

៣. ទឹកក្រូចឆ្មារស្រស់

អ្វីដែលអ្នកត្រូវធ្វើ គឺគ្រាន់តែលាយទឹកក្រូចឆ្មារស្រស់ក្នុងបរិមាណស្មើគ្នាជាមួយទឹកធម្មតា។ កូរឱ្យសព្វ សឹមប្រើប្រាស់ដុំសំឡីដើម្បីជ្រលក់លាបល្បាយលើថ្ងាសនៅមុនពេលចូលគេង។ ទុកចោលសម្រាប់រយៈពេលពេញមួយយប់សិន សឹមលាងសម្អាតចេញនៅពេលព្រឹក។ ប្រសិនបើអ្នកមានស្បែកឆាប់ប្រតិកម្ម ចូរកុំអនុវត្តរូបមន្តនេះនៅពេលយប់។ លាបល្បាយទឹកក្រូចឆ្មារនៅពេលព្រឹកវិញ រួចលាងសម្អាតចេញភ្លាមៗនៅពេលមានអារម្មណ៍ផ្សារឆៀបៗ។

៤. បន្ទះត្រសក់

អ្វីដែលអ្នកត្រូវធ្វើ គឺគ្រាន់តែដាក់បន្ទះត្រសក់ក្នុងទូរទឹកកកសម្រាប់រយៈពេលពី ២ ទៅ ៣ នាទីសិន។ នៅពេលត្រសក់ត្រជាក់ សឹមយកវាមកដុសថ្មៗលើថ្ងាស។ ទុកត្រសក់លើថ្ងាស់សម្រាប់រយៈពេលប្រហែល ២០ នាទី សឹមលាងសម្អាតចេញជាមួយទឹកធម្មតា។ អនុវត្តនៅពេលព្រឹក។

៥. ដុំទឹកកក

អ្នកក៏អាចប្រើប្រាស់ដុំទឹកកកដើម្បីបញ្ឈប់អាការៈនេះផងដែរ។ អ្វីដែលអ្នកត្រូវធ្វើ គឺគ្រាន់តែរុំដុំទឹកកកក្នុងក្រណាត់ស្អាតមួយ។ ផ្សើមថ្ងាសជាមួយទឹកសិន សឹមប្រើប្រាស់ដុំទឹកកកដែលរុំក្នុងក្រណាត់ដុសថ្នមៗលើថ្ងាស។ វិធីនេះជួយបង្រួមរន្ធញើសកាត់បន្ថយការបែកញើសហួសប្រមាណ។ អ្នកអាចអនុវត្តរូបមន្តនេះឱ្យបានពី ៣ ទៅ ៥ ក្នុងមួយថ្ងៃដើម្បីទទួលបានលទ្ធផលកាន់តែប្រសើរ។

៦. ចៀសវាងទទួលទានភេសជ្ជៈកាហ្វេអ៊ីននិងគ្រឿងស្រវឹង

ក៏ព្រោះតែកាហ្វេអ៊ីនបង្កការរំញោចដល់ក្រពេញញើសនោះ ចូរអ្នកជៀសវាងទទួលទានកាហ្វេសូម្បីតែមួយពែង ឬភេសជ្ជៈដទៃទៀតដែលមានផ្ទុកជាតិកាហ្វេអ៊ីននៅរយៈពេលប៉ុន្មានម៉ោងមុនពេលចូលគេង។ ជាពិសេសប្រសិនបើអ្នកឆាប់ប្រតិកម្មទៅនឹងជាតិកាហ្វេអ៊ីនទៀតនោះ ចូរជៀសវាងការទទួលទានភេសជ្ជៈកាហ្វេអ៊ីន ឬកាហ្វេពី ៥ ទៅ ៦ ម៉ោងមុនពេលចូលគេង។ ហើយចំពោះគ្រឿងស្រវឹងវិញ ប្រសិនបើអ្នកគិតថាការទទួលទានគ្រឿងស្រវឹងអាចជួយឱ្យអ្នកឈប់ខ្វល់ខ្វាយពីបញ្ហាបែកញើសពេលយប់នោះ ចូរគិតម្ដងទៀត! នោះក៏ព្រោះតែជាតិអាល់កុលធ្វើឱ្យសសៃឈាមរីកធំជិតស្បែកដែលអាចធ្វើឱ្យអ្នកមានអារម្មណ៍ក្ដៅពេញខ្លួន និងបែកញើសកាន់តែច្រើន។

៧. ទទួលទានទឹកឱ្យបានច្រើន

ប្រសិនបើអ្នកបញ្ឈប់ការបែកញើសហួសប្រមាណ អ្នកគួរទទួលទានទឹកឱ្យបានច្រើនគ្រប់គ្រាន់។ នៅពេលទទួលទានទឹកគ្រប់គ្រាន់ជាប្រចាំ រាងកាយនឹងចុះត្រជាក់ហើយអ្នកមិនមានអារម្មណ៍ថាក្ដៅពេកឡើយ។ អ្វីដែលសំខាន់ទៀតនោះ គឺជាតិពុលផ្សេងៗក៏ត្រូវបានកម្ចាត់ចេញពីរាងកាយល្អចំពោះសុខភាពទាំងមូលផងដែរ។

សម្គាល់ ៖ ក្នុងករណីគន្លឹះទាំងប៉ុន្មានចំណុចខាងលើមិនអាចដោះស្រាយបញ្ហារបស់អ្នកបាន ចូរកុំស្ទាក់ស្ទើនឹងទៅជួបពិគ្រោះជាមួយគ្រូពេទ្យជំនាញខាងសើស្បែក៕