មិនបាច់ហត់ប្រើក្រែមលាបមាត់! ចង់បានពណ៌បបូរមាត់ស្អាតបែបស៊ីជម្ពូ ឬក្រហមព្រឺងៗ កុំរំលងរូបមន្តធម្មជាតិទាំងនេះ

នរណាដែលមិនចង់បានបបូរមាត់ទន់រលោងពណ៌ស៊ីជំពូនោះ? (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) នារីភាគច្រើនជួបប្រទះបញ្ហាបបូរមាត់ខ្មៅស្ងួតមិនគួរឱ្យទាក់ទាញដែលបណ្ដាលមកពីមូលហេតុផ្សេងៗ រួមទាំងការជក់បារី ពន្លឺព្រះអាទិត្យ កាហ្វេអ៊ីនជាដើម។ ប៉ុន្តែឈប់បារម្ភទៀតទៅ គ្មានអ្វីពិបាកឡើយ! អ្នកមិនចាំបាច់ខ្ជះខ្ជាយប្រាក់ទិញផលិតផលថ្លៃទេ ក៏ព្រោះរូបមន្តបែបធម្មជាតិអាចជួយអ្នកបាន។ ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីវិធីងាយៗសម្រាប់បបូរមាត់ទន់រលោងពណ៌ស៊ីជំពូ ៖

១. រមៀត

អ្វីដែលអ្នកត្រូវធ្វើ គឺគ្រាន់តែលាយទឹកដោះគោស្រស់ជាមួយម្សៅរមៀតឱ្យក្លាយជាល្បាយខាប់ៗ។ បន្ទាប់មកប្រើប្រាស់ម្រាមដៃជ្រលក់ដុសម៉ាស្សាល្បាយថ្នមៗលើបបូរមាត់។ រងចាំសម្រាប់រយៈពេលប្រហែល ៥នាទី សឹមលាងសម្អាតចេញថ្នមៗជាមួយទឺកត្រជាក់។

២. ប្រេងអូលីវ

មុនពេលចូលគេង អ្នកអាចលាបម៉ាស្សាប្រេងអូលីវប៉ុន្មានដំណក់លើបបូរមាត់។

៣. ក្រូចឆ្មារនិងទឹកឃ្មុំ

អ្វីដែលអ្នកត្រូវធ្វើ គឺគ្រាន់តែលាយទឹកក្រូចឆ្មារស្រស់ ១ស្លាបព្រាកាហ្វេជាមួយទឹកឃ្មុំ ១ស្លាបព្រាកាហ្វេ។ កូរឱ្យសព្វ សឹមលាបម៉ាស្សាល្បាយលើបបូរមាត់។ រងចាំសម្រាប់រយៈពេលពី ១៥ ទៅ ២០នាទី សឹមលាងសម្អាតចេញជាមួយទឹកធម្មតា។

៤. ក្រូចឆ្មារនិងស្ករស

អ្វីដែលអ្នកត្រូវធ្វើ គឺគ្រាន់តែរោយស្ករសលើបន្ទះក្រូចឆ្មារស្ដើងមួយ រួចយកមកដុសថ្នមៗលើបបូរមាត់និងរងចាំសម្រាប់រយៈពេល ២ នាទី។បន្ទាប់មកលាងសម្អាតកោសិកាងាប់ៗចេញដោយប្រើទឹកក្ដៅឧណ្ហៗ។ អនុវត្តសារឡើងវិញសម្រាប់រយៈពេលពី ២ ទៅ ៣ សប្តាហ៍ ឬរហូតដល់អ្នកទទួលបានលទ្ធផលជាទីគាប់ចិត្ត។

៥. ស្ករសនិងទឹកឃ្មុំ

ចូរលាយស្ករស ១ ស្លាបព្រាបាយជាមួយទឹកឃ្មុំ ១ ស្លាបព្រាបាយឱ្យសព្វចូលគ្នា។ បន្ទាប់មកលាបម៉ាស្សាល្បាយលើបបូរមាត់ថ្នមៗសម្រាប់រយៈពេល ១ នាទី ហើយទុកចោលសម្រាប់រយៈពេលពី ២ ទៅ ៣ នាទី សឹមលាងសម្អាតចេញជាមួយទឹកធម្មតា។ អនុវត្តឱ្យបានពី ២ ទៅ ៣ ដងក្នុងមួយសប្តាហ៍។

៦. ទឹកឃ្មុំ

អ្វីដែលអ្នកត្រូវធ្វើ គឺគ្រាន់តែលាបម៉ាស្សាទឹកឃ្មុំលើបបូរមាត់មុនពេលចូលគេងជាការស្រេច។ អ្នកក៏អាចលាយទឹកឃ្មុំជាមួយយ៉ាអួរនិងម្សៅ (សម្រាប់យកមកធ្វើអាហារផ្សេងៗ) ចូលគ្នាឱ្យក្លាយជាល្បាយខាប់ៗ បន្ទាប់មកលាបល្បាយលើបបូរមាត់និងរងចាំសម្រាប់រយៈពេលប្រហែលពី ៣០ ទៅ ៤០ នាទី។ លាងសម្អាតចេញជាមួយទឹកក្ដៅឧណ្ហៗ។ អនុវត្តម្ដងក្នុងមួយថ្ងៃ រហូតទទួលបានលទ្ធផលប្រសើរ។

៧. ប្រទាលកន្ទុយក្រពើ

អ្វីដែលអ្នកត្រូវធ្វើ គឺគ្រាន់តែលាបសាច់ ឬជែលប្រទាលកន្ទុយក្រពើលើបបូរមាត់និងទុកចោលសម្រាប់រយៈពេលមួយយប់។ បន្ទាប់មកសឹមលាងសម្អាតចេញជាមួយទឹកធម្មតានៅព្រឹកបន្ទាប់។

៨. ត្រសក់

អ្វីដែលអ្នកត្រូវធ្វើ គឺគ្រាន់តែប្រើប្រាស់បន្ទះត្រសក់ដុសថ្នមៗលើបបូរមាត់។ អ្នកអាចប្រើប្រាស់ទឹកត្រសក់ស្រស់លាបលើបបូរមាត់ និងរងចាំសម្រាប់រយៈពេល ៥ នាទី សឹមលាងសម្អាតចេញជាមួយទឹកក្ដៅឧណ្ហៗ។ អនុ​វត្តឱ្យបាន ២​ដងក្នុងមួយថ្ងៃ។

សម្គាល់! ដើម្បីរក្សាបាននូវបបូរមាត់ដែលមានសុខភាពល្អពណ៌ស្រស់ស្អាត អ្នកចាំបាច់ត្រូវចៀសឱ្យផុតពីទម្លាប់មួយចំនួនដែលបណ្ដាលឱ្យបបូរមាត់ខ្មៅនិងជ្រីវជ្រួញរួមមានការជក់បារី ការត្រូវកម្ដៅថ្ងៃខ្លាំង ការជញ្ជក់បបូរមាត់ការទទួលទានទឹកមិនបានច្រើនគ្រប់គ្រាន់ ការទទួលទានអាហារនិងភេសជ្ជៈកាហ្វេអ៊ីនច្រើនពេក ឬការប្រើប្រាស់ផលិតផលដែលមានផ្ទុកសារធាតុគីមីខ្លាំងជាដើម។