ចង់ឱ្យ “ប្រព័ន្ធភាពស៊ាំរាងកាយរឹងមាំ” មិនត្រូវរំលងអាហារទាំងនេះទេ

ប្រព័ន្ធភាពស៊ាំរាងកាយរឹងមាំ គឺចាំបាច់ណាស់ដើម្បីរក្សាបាននូវសុខភាពល្អប្រសើរចៀសផុតពីជំងឺផ្សេងៗ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ភាគច្រើននៃពួកយើងសុទ្ធតែបានដឹងហើយថាការទទួលទានបន្លែនិងផ្លែឈើស្រស់ៗអាចផ្ដល់អត្ថប្រយោជន៍ប្រសើរយ៉ាងណាចំពោះសុខភាព។ ប៉ុន្តែអ្វីដែលសំខាន់នោះ គឺអាហារមួយចំនួនខាងក្រោមក៏អាចជួយពង្រឹងប្រព័ន្ធភាពស៊ាំនៃរាងកាយចៀសផុតពីបញ្ហាឆ្លងមេរោគផងដែរ។ ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីអាហារដែលអ្នកគួរព្យាយាមទទួលទានដើម្បីពង្រឹងប្រព័ន្ធភាពស៊ាំរាងកាយ ៖

១. ផ្លែបឺរ

ប្រសិនបើអ្នកងាយនឹងផ្ដាសាយនោះមានន័យថា ប្រព័ន្ធភាពស៊ាំរាងកាយរបស់អ្នកកំពុងចុះខ្សោយហើយ។ ដូច្នេះដើម្បីជាការប្រសើរ ចូររួមបញ្ចូលផ្លែបឺរក្នុងរបបអាហារ ឬទទួលទានផ្លែបឺរ ១ផ្លែក្នុងមួយថ្ងៃ។ នេះក៏ព្រោះតែផ្លែបឺរមានផ្ទុកសមាសធាតុដែលជួយពង្រឹងប្រព័ន្ធភាពស៊ាំរាងកាយទប់ទល់នឹងពពួកវីរុស ព្រមទាំងមេរោគឆ្លងផ្សេងៗ។

២. ការ៉ុត

ជាបន្លែដ៏ប្រសើរជួយក្នុងការទប់ស្កាត់ជំងឺផ្ដាសាយធំនិងគ្រុនផ្ដាសាយ។ វាមានផ្ទុកសម្បូរទៅដោយសារធាតុ beta-carotene ដែលជួយពង្រឹងប្រព័ន្ធភាពស៊ាំ។ អ្នកនឹងទទួលបានលទ្ធផលកាន់តែប្រសើរ ប្រសិនបើឧស្សាហ៍ទទួលទានទឹកការ៉ុតស្រស់ៗ។

៣. យ៉ាអួរ

ជាជម្រើសនៃអាហារសម្រន់ដ៏ល្អបំផុតមួយដែលអ្នកគួរទទួលទានដើម្បីរក្សាតុល្យភាពនៃបាក់តេរីក្នុងពោះវៀននិងពង្រឹងប្រព័ន្ធភាពស៊ាំរាងកាយ។

៤. តែបៃតង

ជាប្រភពដ៏ប្រសើរបំផុតនៃសារធាតុ epigallocatechin gallate (EGCG) ដែលចាំបាច់ក្នុងការជួយពង្រឹងប្រព័ន្ធភាពស៊ាំ។

៥. ផ្លែប៉ោម

ក្រៅពីវីតាមីននិងជាតិរ៉ែហើយនោះផ្លែប៉ោមក៏មានផ្ទុកសម្បូរទៅដោយជាតិសសៃផងដែរ។ ជាតិសសៃនេះជួយបណ្ដេញជាតិពុលតាមពោះវៀន។ នៅពេលជាតិពុលត្រូវបានកម្ចាត់នោះប្រព័ន្ធភាពស៊ាំរាងកាយនឹងមានលក្ខណៈកាន់តែប្រសើរឡើង។

៦. ផ្លែទទឹម

នេះក៏ព្រោះតែទទឹមជាផ្លែឈើមួយប្រភេទដែលមានផ្ទុកសម្បូរទៅដោយវីតាមីន C ដែលជួយពង្រឹងដល់ប្រព័ន្ធភាពស៊ាំរាងកាយ។

៧. ម្ទេសផ្លោកពណ៌ក្រហម

ជាប្រភពដ៏ប្រសើរបំផុតនៃវីតាមីន C និងសារធាតុ carotenoids ដែលមានលក្ខណៈសម្បត្តិពង្រឹងប្រព័ន្ធភាពស៊ាំគួរឱ្យកត់សម្គាល់។

៨. ផ្កាខាត់ណាខៀវ

ខាត់ណាខៀវជាប្រភពដ៏ប្រសើរនៃសារធាតុ beta carotene វីតាមីន A វីតាមីន E និងវីតាមីន C។ ដូច្នេះការរួមបញ្ចូលផ្កាខាត់ណាខៀវក្នុងរបបអាហារប្រចាំថ្ងៃ គឺល្អបំផុតសម្រាប់រក្សាក៏ដូចជាពង្រឹងប្រព័ន្ធភាពស៊ាំរាងកាយឱ្យកាន់តែរឹងមាំឡើង។

៩. ខ្ទឹមស

មានផ្ទុកសារធាតុ allicin ដែលជួយពង្រឹងប្រព័ន្ធភាពស៊ាំរាងកាយ ក៏ដូចជាប្រយុទ្ធប្រឆាំងបាក់តេរី វីរុស និងរោគផ្សិត។

១០. រមៀត

រមៀតមានផ្ទុកសារធាតុ lipopolysaccharides ដែលជួយពង្រឹងប្រព័ន្ធភាពស៊ាំរាងកាយគួរឱ្យកត់សម្គាល់។

១១. ខ្ញី

ជាប្រភពដ៏ប្រសើរនៃសារធាតុប្រឆាំងមេរោគបាក់តេរីដែលជួយប្រយុទ្ធប្រឆាំងនឹងរាល់បាក់តេរីបង្កគ្រោះថ្នាក់។ ប្រសិនបើអ្នកទទួលទានខ្ញី ឬតែខ្ញីរាល់ថ្ងៃ អ្នកនឹងមិនងាយកើតជំងឺផ្ដាសាយឡើយ។ ខ្ញីក៏មានផ្ទុកសារធាតុប្រឆាំងអុកស៊ីតកម្មនិងលក្ខណៈសម្បត្តិប្រឆាំងការរលាកដែលជួយកម្ចាត់ការរលាកផ្សេងៗក្នុងប្រព័ន្ធប្រសាទនៃប្រព័ន្ធភាពស៊ាំ រួមបញ្ចូលទាំងសមាសធាតុសកម្មបំផុតហៅថា gingerols ជួយកាត់បន្ថយហានិភ័យនៃការឆ្លងមេរោគ។

១២. ទឹកដូង

អ្នកអាចជៀសផុតពីជំងឺដោយគ្រាន់តែទទួលទានទឹកដូងជាប្រចាំ។ នោះក៏ព្រោះតែទឹកដូងជួយពង្រឹងប្រព័ន្ធភាពស៊ាំនៃរាងកាយបានយ៉ាងប្រសើរដោយវាមានផ្ទុកសម្បូរទៅដោយអាស៊ីត lauric ដែលជួយប្រយុទ្ធប្រឆាំងបាក់តេរីនិងពពួកវីរុស។ វាមានប្រសិទ្ធិភាពកម្ចាត់រាល់បាក់តេរីមិនល្អក្នុងរាងកាយដែលបង្កជំងឺអញ្ចាញនិងមេរោគឆ្លងក្នុងផ្លូវទឹកនោម។ ទឹកដូងក៏ជួយទប់ស្កាត់វីរុសដែលបង្កជំងឺផ្ដាសាយ និងមេរោគឆ្លងផ្សេងៗផងដែរ។

១៣. ទឹក

ទឹក គឺចាំបាច់ណាស់ដើម្បីរក្សាជាតិទឹកគ្រប់គ្រាន់ក្នុងរាងកាយ ព្រមទាំងជួយកម្ចាត់ជាតិពុលផ្សេងៗដែលប្រព័ន្ធភាពស៊ាំកំពុងប្រយុទ្ធប្រឆាំងផងដែរ។ ដូច្នេះអ្នកត្រូវព្យាយាមទទួលទានទឹកឱ្យបានច្រើនគ្រប់គ្រាន់ជាប្រចាំ៕