ជំងឺគីសប្រភេទនេះគឺជាប្រភេទថង់ពងទឹក ដែលមានលក្ខណៈស្រដៀងគ្នានឹងពងបែកនៅនឹងស្បែកដែរ ហើយច្រើនកើតមានលើស្ត្រីក្នុងវ័យបន្តពូជ។ ទម្រង់គីសដែលកើតមានក្នុងក្រពេញអូវ៉ែនោះមានរាងដូចជាផ្លែអាល់ម៉ុន។ គីសក្នុងក្រពេញអូវ៉ែភាគច្រើនមិនបង្កគ្រោះថ្នាក់អ្វីឡើយ ហើយវានឹងជាបាត់ទៅវិញដោយមិនបានព្យាបាលក៏មានដែរ។
មូលហេតុ
មុខងារធម្មតារបស់ក្រពេញអូវ៉ែគឺផលិតពងមេជីវិតញីជារៀងរាល់ខែ។ ក្នុងដំណើរការផ្ទុះអូវុល ពងទឹកដែលមានសភាពដូចជាពន្លកត្រូវបានបង្កើតឡើងនៅក្នុងក្រពេញអូវ៉ែ។ ចំពោះពន្លកណាដែលធំធាត់គ្រប់គ្រាន់ហើយនឹងផ្ទុះបែកចេញដើម្បីបង្កើតបានជាមេជីវិតញីក្នុងដំណើរការអូវុល។ ទម្រង់ Corpus Luteum កើតឡើងក្រោយពីពន្លកមេជីវិតញីផ្ទុះរួច ហើយបើសិនជាមិនមានផ្ទៃពោះទេ ទម្រង់ Corpus Luteum នឹងរលាយបាត់ទៅវិញ។ ទោះបីជាយ៉ាងណាក៏ដោយ ពេលខ្លះដំណើរការមួយនេះមិនបានបញ្ចប់ដោយត្រឹមត្រូវនោះទេ ដែលជាហេតុបណ្តាលអោយមានជំងឺគីសក្នុងក្រពេញអូវ៉ែ។
ចំពោះជំងឺគីសក្នុងក្រពេញអូវ៉ែមិនធម្មតាដូចជា Polycystic Ovarian Disease ប្រហែលជាកើតឡើងដោយសារតែអតុល្យភាពនៃអ័រម៉ូនភេទរបស់ស្ត្រី (Estrogen និង Progesterone)៕