យើងដឹងស្រាប់ហើយថា កូនតូចៗឧស្សាហ៍ក្ដៅខ្លួនណាស់ ព្រោះក្មេងងាយនឹងឆ្លងមេរោគបណ្ដាលឲ្យកើតជំងឺផ្សេងៗច្រើន។ មានវិធីសាមញ្ញមួយដែលម៉ាក់ប៉ានិយមប្រើពេលកូនៗក្ដៅខ្លួន គឺយកកន្សែងសើមមកជូតខ្លួន ឬរុំខ្លួនឲ្យកូន ដើម្បីជួយបញ្ចុះកម្ដៅ។
ទាក់ទងនឹងបញ្ហានេះ នៅពេលកូនតូចឈឺហើយមានអាការៈក្ដៅខ្លួនខ្លាំង ការដណ្ដប់កន្សែងសើម និងការងូតទឹកក្ដៅឧណ្ហៗ គឺជាមធ្យោបាយមួយដែលជួយបញ្ចុះកម្ដៅកូន បន្ទាប់ពីបានប្រើថ្នាំបញ្ចុះកម្ដៅរួចហើយ។
តើការរុំកន្សែងសើមនេះយូរ អាចធ្វើឲ្យទឹកចូលសួតឫទេ?
បើម៉ាក់ប៉ាបារម្ភពីបញ្ហាទឹកចូលសួតកូន ដោយសារការរុំកន្សែងនេះ គឺជាការយល់ខុសហើយ។ ការដែលរុំកន្សែងសើមឲ្យកូនពេលក្ដៅខ្លួនមិនមានអ្វីប៉ះពាល់ដល់កូនទេ ព្រោះជាតិទឹកមិនអាចជ្រាបចូលទៅក្នុងស្រោមសួត តាមរយៈរន្ធញើសនោះទេ។ ចំណែកឯករណីទឹកចូលសួតកូនតូចនោះ អាចកើតឡើងបណ្ដាលមកពីមូលហេតុច្រើន ដែលក្នុងនោះរួមមាន ជំងឺរលាកសួតធ្ងន់ធ្ងរ និងការព្យួរសេរ៉ូមច្រើនជ្រុលលើសពីតម្រូវការរាងកាយរបស់ក្មេងជាដើម។
ប្រការដែលល្អ ពេលកូនក្ដៅខ្លួន គឺត្រូវរកមូលហេតុបង្កឲ្យបានច្បាស់លាស់ ព្រោះជូនកាលវាជាបញ្ហាធម្មតា តែវាក៏អាចជារោគសញ្ញារបស់ជំងឺមួយចំនួនដែរ។ ក្នុងករណីដែលកូនក្ដៅខ្លួនធម្មតា ម៉ាក់ប៉ាអាចដោះស្រាយបានដោយ៖
១.ស្លៀកពាក់ស្ដើងៗឲ្យកូន និងកុំឲ្យកូនដណ្តប់ភួយក្រាស់ៗ
២.ឲ្យកូនញ៉ាំទឹកឲ្យបានច្រើន
៣.ផ្ដល់ថ្នាំត្រឹមត្រូវដល់កូន។
បើសិនផ្ដល់ថ្នាំផង ជូតខ្លួនផង កម្ដៅខ្លួនកូននៅតែមិនចុះ ឪពុកម្តាយគួរនាំកូនទៅពិនិត្យនៅមន្ទីរពេទ្យភ្លាម កុំទុកយូរ ដើម្បីចៀសវាងក្ដៅខ្លួនខ្លាំងរហូតអាចប្រកាច់ គ្រោះថ្នាក់ធ្ងន់បាន៕