នៅក្នុងមន្ទីរពេទ្យផ្នែកសង្គ្រោះបន្ទាន់ ករណីរបួសដោយសារការបើកបរបុកគ្នាគឺជាករណីទូទៅដែលគ្រូពេទ្យជួបប្រទះស្ទើរតែរាល់ថ្ងៃ។ យើងប្រើពាក្យការបើកបរបុកគ្នាជំនួសដោយពាក្យគ្រោះថ្នាក់ចរាចរណ៍ព្រោះថាគ្រោះថ្នាក់ចរាចរណ៍គឺអាចជៀសវាងបាន។ ការប្រើប្រាស់ខ្សែក្រវ៉ាត់សុវត្ថិភាពពិតជាអាចកាត់បន្ថយរបួសធ្ងន់ធ្ងរបានមួយចំនួន ប៉ុន្តែតើមានកន្លែងអង្គុយណាដែលមានសុវត្ថិភាពជាងគេ?
ការសិក្សាមួយចំនួនបានបញ្ជាក់ថាការអង្គុយនៅកៅអីខាងមុខមានគ្រោះថ្នាក់ជាងការអង្គុយនៅកៅអីខាងក្រោយ។ ការអង្គុយនៅខាងក្រោយអាចកាត់បន្ថយគ្រោះថ្នាក់នៃការស្លាប់បានដល់ទៅ ២៥ ទៅ ៣៩ភាគរយ។ គ្រោះថ្នាក់នៃរបួសធ្ងន់ធ្ងរក៏កាត់បន្ថយបានប្រហែល ៣០ភាគរយផងដែរសម្រាប់អ្នកអង្គុយនៅខាងក្រោយបើធៀបនឹងអ្នកអង្គុយនៅកៅអីខាងមុខ។ គ្រោះថ្នាក់របស់អ្នកបើកឡានក៏មានប្រហាក់ប្រហែលទៅនឹងអ្នកអង្គុយនៅកៅអីខាងមុខដែរ។
ប៉ុន្តែមិនថាអ្នកអង្គុយនៅខាងក្រោយឬខាងមុខនោះទេ ទិន្នន័យទាំងនេះយកមកពីការសិក្សាដែលបានធ្វើឡើងលើអ្នកដំណើរដែលប្រើខ្សែក្រវ៉ាត់សុវត្ថិភាពតែប៉ុណ្ណោះ។ ដូច្នេះ អ្នកត្រូវប្រើខ្សែក្រវ៉ាត់សុវត្ថិភាពជាប្រចាំ ដើម្បីការពារនិងជៀសវាងឧប្បត្តិហេតុផ្សេងៗ។ “ការពារប្រសើរជាងព្យាបាល”។