Join with Health.com.kh on Telegram

ទោះបីជាបញ្ហាសក់ស្ដើង ហើយថែមទាំងជ្រុះតែងកើតមានធម្មតាចំពោះបុរស ប៉ុន្តែមនុស្សស្រីក៏អាចជួបប្រទះបញ្ហានេះផងដែរកំឡុងពេលមានផ្ទៃពោះ, ប្រើប្រាស់ថ្នាំណាមួយ តំណពូជ ឬបញ្ហាសុខភាពណាមួយ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) មកទល់នឹងពេលបច្ចុប្បន្នផលិតផលថែររក្សាសក់ព្យាបាលសក់ជ្រុះស្ដើងមានមិនខ្វះឡើយ តែវាមានតម្លៃថ្លៃ ហើយមួយចំនួនមានផ្ទុកសារធាតុគីមីប៉ះពាល់ដល់សុខភាព។ ប៉ុន្តែកុំបារម្ភ! មានរូបមន្តបែបធម្មជាតិច្រើនណាស់ជួយដោះស្រាយបញ្ហាសក់ស្ដើង ហើយជ្រុះប្រកបដោយប្រសិទ្ធិភាពខ្ពស់។ ហើយថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីគន្លឹះ និងរូបមន្តបែបធម្មជាតិងាយៗដោះស្រាយបញ្ហាសក់ស្ដើង ហើយជ្រុះ ៖

១. ស៊ុត

អ្វីដែលអ្នកត្រូវធ្វើ គឺលាយស៊ុត ១ គ្រាប់ ជាមួយប្រេងអូលីវ ១ ស្លានព្រាបាយ ក្នុងចានគោមតូចមួយរហូតដល់ក្លាយជាល្បាយម៉ដ្ឋរលោង។ លាបល្បាយលើសក់ និងស្បែកក្បាលរហូតដល់សព្វ។ គ្របសក់ជាមួយមួកពាក់ងូតទឹក ហើយទុកចោលសម្រាប់រយៈពេល ២០ នាទី សឹមកក់លាងសម្អាតសក់ចេញជាមួយសាប៊ូ និងទឹកត្រជាក់ជាការស្រេច។

២. ប្រេងអូលីវ

អ្វីដែលអ្នកត្រូវធ្វើ គឺគ្រាន់លាបម៉ាស្សាប្រេងអូលីវក្ដៅឧណ្ហៗលើស្បែកក្បាល និងទុកចោលសម្រាប់រយៈពេលពី ៣០ ទៅ ៤៥ នាទី ឬទុកចោលពេញមួយយប់សឹមលាងសម្អាតចេញ ហើយកក់សក់នៅព្រឹកបន្ទាប់ជាការស្រេច។

៣. ខ្ទឹមបារាំង

លាយទឹកខ្ទឹមបារាំងកន្លះពែងជាមួយទឹកឃ្មុំ ១ ស្លាបព្រាបាយ។ កូរឱ្យសព្វ សឹមលាបល្បាយលើសក់និងស្បែកក្បាល ហើយទុកចោលសម្រាប់រយៈពេល ១ ម៉ោងសឹមកក់សម្អាតចេញជាមួយសាប៊ូដូចធម្មតា។

៤. ប្រទាលកន្ទុយក្រពើ

អ្វីដែលអ្នកត្រូវធ្វើ គឺគ្រាន់តែលាបម៉ាស្សាសាច់ ឬទឹកប្រទាលកន្ទុយក្រពើលើស្បែកក្បាល និងទុកចោលសម្រាប់រយៈពេល ៣០ នាទីសឹមលាងសម្អាតចេញជាមួយទឹកក្ដៅឧណ្ហៗជាការស្រេច។

៥. ទឹកខ្មេះផ្លែប៉ោម

លាបម៉ាស្សាទឹកខ្មេះផ្លែប៉ោមឱ្យសព្វពេញស្បែកក្បាលនិងសក់ ហើយលាងសម្អាតចេញជាមួយទឹកក្ដៅឧណ្ហៗជាការស្រេច។

  • អាហារគួររួមបញ្ចូលក្នុងរបបអាហារប្រចាំថ្ងៃ

១.​ ត្រីសម្បូរខ្លាញ់

មួយក្នុងចំណោមមូលហេតុផ្សេងទៀតដែលបង្កបញ្ហាសក់ជ្រុះ គឺការរលាក! ទោះជាយ៉ាងណាការរលាកក្នុងរាងកាយអាចគ្រប់គ្រងបានដោយមានជំនួយពីអាស៊ីតខ្លាញ់អូមេហ្កា ៣។ ហើយប្រភពដ៏ប្រសើរបំផុតនៃអាស៊ីតខ្លាញ់នេះ គឺត្រីសម្បូរខ្លាញ់។ អាស៊ីតខ្លាញ់អូមេហ្កា ៣ មានអត្ថប្រយោជន៍ណាស់ចំពោះសុខភាពស្បែកក្បាលដែលចាំបាច់សម្រាប់ការលូតលាស់នៃសក់។ ម្យ៉ាងវិញទៀតត្រីសម្បូរខ្លាញ់ក៏ជាប្រភពដ៏ប្រសើរនៃវីតាមីន D និងអាស៊ីតអាមីណូដែលមានឥទ្ធិពលជួយឱ្យសក់លូតលាស់បានឆាប់រហ័សផងដែរ។

២. គ្រាប់ធញ្ញជាតិនិងគ្រាប់ពូជ

ក៏មានផ្ទុកសម្បូរទៅដោយអាស៊ីតខ្លាញ់អូមេហ្កា ៣ ផងដែរ។ ទោះជាយ៉ាងណាមិនត្រូវទទួលទានលើសពីមួយក្ដាប់ពេញក្នុងមួយថ្ងៃឡើយ។

៣. ស៊ុត

ការរួមបញ្ចូលស៊ុតក្នុងរបបអាហារប្រចាំថ្ងៃ គឺល្អណាស់សម្រាប់អ្នកកំពុងជួបប្រទះបញ្ហាសក់ជ្រុះ។ នេះក៏ព្រោះតែស៊ុតជាប្រភពដ៏ប្រសើរនៃបាយអូទីនវីតាមីន B មួយប្រភេទដែលមានប្រសិទ្ធភាពទប់ស្កាត់បញ្ហាសក់ជ្រុះ។ ស៊ុតក៏មានផ្ទុកសម្បូរទៅដោយប្រូតេអ៊ីនដែលចាំបាច់សម្រាប់ពង្រឹងឬសនៃសក់ផងដែរ។

៤. សាច់គ្មានខ្លាញ់

អ្នកក៏គួររួមបញ្ចូលសាច់គ្មានខ្លាញ់ក្នុងរបបអាហារផងដែរដើម្បីទប់ស្កាត់និងដោះស្រាយបញ្ហាសក់ជ្រុះ។ សាច់គ្មានខ្លាញ់មានផ្ទុកប្រូតេអ៊ីនគុណភាពខ្ពស់ដែលល្អសម្រាប់សុខភាពសក់។

៥. សណ្ដែក

សណ្ដែកជាប្រភពដ៏ប្រសើរបំផុតមួយនៃប្រូតេអ៊ីនគុណភាពខ្ពស់។ ដូច្នេះប្រសិនបើចង់ទប់ស្កាត់បញ្ហាសក់ជ្រុះអ្នកក៏គួររួមបញ្ចូលសណ្ដែកក្នុងរបបអាហារប្រចាំថ្ងៃផងដែរ។

៦. ការ៉ុត

ជាប្រភពដ៏ល្អបំផុតមួយនៃវីតាមីន A ដែលចាំបាច់សម្រាប់ការផលិតជាតិប្រេងធម្មជាតិនៃសក់ ដើម្បីរក្សាបាននូវស្បែកក្បាលមានសុខភាពល្អ។ ប្រសិនបើគ្មានជាតិប្រេងគ្រប់គ្រាន់ទេនោះស្បែកក្បាលនឹងប្រែជាស្ងួត ងាយជ្រុះ ហើយរមាស់។

៧. បន្លែបៃតង

ជាប្រភពដ៏ប្រសើរនៃជាតិដែកដែលចាំបាច់ណាស់សម្រាប់រក្សាសុខភាពសក់រឹងមាំ។ កង្វះជាតិដែកអាចបង្កជំងឺខ្វះគ្រាប់ឈាមក្រហមដែលជាកត្តាចម្បងបំផុតមួយនៃបញ្ហាជ្រុះសក់ ក៏ព្រោះឬសនៃសក់ទទួលបានសារធាតុចិញ្ចឹមតាមរយៈការផ្គត់ផ្គង់របស់ឈាម។

៨. ផ្លែបឺរ

ជាប្រភពដ៏ប្រសើរនៃវីតាមីន E ដែលជួយឱ្យឬសនៃសក់ធ្វើការកាន់តែមានប្រសិទ្ធិភាព និងបង្កើនចរន្តឈាមជម្រុញការលូតលាស់សក់។ វាក៏ជួយរក្សាកម្រិតតុល្យភាព PH និងជាតិប្រេងទប់ស្កាត់ភាពរាំងស្ទះដល់ការលូតលាស់នៃសក់ផងដែរ៕

  • ចៀសឱ្យផុតពីទម្លាប់មួយចំនួននេះ

១. រំលងម៉ោងអាហារ

មិនត្រឹមតែរាងកាយរបស់អ្នកប៉ុណ្ណោះទេដែលស្គម ប៉ុន្តែសក់ក៏ប្រែជាស្ដើងដូចគ្នាប្រសិនបើរាងកាយមិនរក្សាបាននូវកាឡូរីគ្រប់គ្រាន់! តើអ្នកដឹងទេថាឬសនៃសក់នឹងមិនអាចទទួលបានសារធាតុចិញ្ចឹមគ្រប់គ្រាន់ដើម្បីរក្សាបាននូវសុខភាពល្អរឹងមាំ និងដំណើរការមុខងារបានត្រឹមត្រូវឡើយ នៅពេលអ្នកតមអាហារ? រាងកាយនឹងបញ្ជូនថាមពលនិងសារធាតុចិញ្ចឹមចាំបាច់ទៅមុខងារសំខាន់ៗដូចជាបេះដូង និងខួរក្បាលដោយមិនខ្វាយខ្វល់ដល់សក់ ព្រមទាំងស្បែកក្បាលឡើយ។ ដូច្នេះជំនួសឱ្យការរំលងមិនទទួលទានអាហារច្រើនព្រោះចង់ស្លីម ចូរជ្រើសរើសរបបអាហារមានសុខភាពល្អសម្បូរទៅដោយសារធាតុចិញ្ចឹមគ្រប់គ្រាន់ដែលសក់និងស្បែកក្បាលត្រូវការ។

២. ត្រូវកម្ដៅថ្ងៃច្រើនពេក

នៅពេលអ្នកចេញក្រៅ កាំរស្មីយូវីចាប់ផ្ដើមជះឥទ្ធិពលលើភាពបត់បែនរឹងមាំនៃសក់។ ការត្រូវក្ដៅយូរពេកមិនថាសូម្បីកម្ដៅថ្ងៃអាចធ្វើឱ្យសក់និងស្បែកក្បាលប្រែជាស្ងួត។ ជាលទ្ធផលសក់ប្រែជាផុយស្រួយនិងជ្រុះ។

៣. ការចងសក់តឹងៗពេក

ធ្លាប់ដឹងទេថាការលេងម៉ូដសក់ ឬការចងសក់តឹងៗពេកក៏អាចបណ្ដាលឱ្យសក់ជ្រុះផងដែរ? ដូច្នេះដើម្បីជាការប្រសើរចូរព្យាយាមលេងម៉ូដសក់ ឬចងសក់ធូរល្មមនិងមិនតឹងពេក។

៤. មិនសូវកក់សក់

ការកក់សក់ញឹកញាប់ពេកអាចជះផលប៉ះពាល់ដល់សក់គួរឱ្យបារម្ភ ប៉ុន្តែការមិនសូវកក់សក់ក៏អាចនាំឱ្យសក់ ព្រមទាំងស្បែកក្បាលមានបញ្ហាផងដែរ។ ប្រសិនបើអ្នកមិនបានកក់សក់ជាប្រចាំទេនោះភាពកខ្វក់ និងជាតិប្រេងត្រូវប្រមូលផ្ដុំជាប់លើស្បែកក្បាលដែលអាចនាំឱ្យស្ទះឬសនៃសក់។ ជាលទ្ធផលសក់នឹងពិបាកដុះលូតលាស់ ហើយប្រសិនបើមិនយកចិត្តទុកដាក់ទេនោះ សក់នឹងប្រែជាស្ដើងទៅៗ ព្រមទាំងជ្រុះ។

៥. អ្នកកក់សក់ញឹកញាប់ពេក

អ្នកមិនចាំបាច់ត្រូវកក់សម្អាតសក់រាល់ថ្ងៃឡើយ ត្រឹមតែពី ៣ ទៅ ៤ ដងក្នុងមួយសប្តាហ៍ គឺគ្រប់គ្រាន់ណាស់ហើយដើម្បីកម្ចាត់ភាពកខ្វក់ពីសក់និងស្បែកក្បាល។ ទម្លាប់នេះក៏ជួយរក្សាសុខភាពសក់និងស្បែកក្បាលដោយមិនធ្វើឱ្យសក់ស្ងួត ហើយងាយទទួលរងការបំផ្លាញ។ ប្រសិនបើសក់របស់អ្នកឡើងប្រេងខ្លាំង ចូរប្រើប្រាស់រូបមន្តបែបធម្មជាតិ ឬសាកល្បងផលិតផលសាប៊ូស្ងួត។

៦. ការអេះក្បាលខ្លាំងៗ

អារម្មណ៍រមាស់លើស្បែកក្បាលអាចជាលទ្ធផលនៃការឆ្លងមេរោគផ្សិត ប្រតិកម្មអាឡែកស៊ី ឬការរលាកដែលបង្កគ្រោះថ្នាក់ដល់សក់ ហើយនាំឱ្យជ្រុះ។ ម្យ៉ាងវិញទៀតនៅពេលអ្នកចាប់ផ្ដើមអេះលើស្បែកក្បាល អ្នកកំពុងបំផ្លាញឬសនៃសក់ដែលជាមូលហេតុមួយនាំឱ្យសក់ជ្រុះផងដែរ។

៧.  ងូតទឹកក្ដៅពេក

ការងូតទឹកក្ដៅមិនល្អសម្រាប់សក់ឡើយដោយវាអាចធ្វើឱ្យស្បែកក្បាលស្ងួត ហើយសក់ប្រាកដជាងាយនឹងជ្រុះជាមិនខាន។ សក់ក៏អាចប្រែជាស្ងួត ហើយបែកចុងដោយងាយព្រោះទឹកក្ដៅផងដែរ។ ដូច្នេះកុំងូតទឹកក្ដៅពេក!