ការឈឺចាប់ឆ្អឹងខ្នងប្រហែលជាអាការៈមួយក្នុងចំណោមជំងឺដ៏គួរឱ្យកត់សម្គាល់មួយនៅក្នុងសហរដ្ឋអាមេរិក។ មនុស្សជំទង់អាមេរិកពីរភាគបីនឹងកើតមានជំងឺនេះនៅក្នុងពេលណាមួយក្នុងជីវិតរបស់ពួកគេ។ ជាលទ្ធផល ជំងឺឈឺឆ្អឹងខ្នងនេះគឺជាមូលហេតុចម្បងដែលបង្ករឱ្យមានពិការភាពក្នុងចំណោមប្រជាជនអាមេរិកដែលមានអាយុក្រោម ៤៥ឆ្នាំ។
អាការៈឈឺឆ្អឹងខ្នងត្រូវបានបែងចែកចេញជាពីរក្រុមគឺ៖ ធ្ងន់ធ្ងរ និងរ៉ាំរ៉ៃ។
អាការៈឈឺឆ្អឹងខ្នងធ្ងន់ធ្ងរ
ការឈឺឆ្អឹងខ្នងធ្ងន់ធ្ងរកើតឡើងភ្លាមៗនិងឈឺខ្លាំង។ វាគឺជាប្រភេទដែលកើតឡើងដោយសារតែអ្នកធ្វើអ្វីម្យ៉ាងដែលអ្នកមិនគួរធ្វើ ឬធ្វើវាខុសរបៀប។ ការឈឺចាប់អាចកើតមានដោយសារការគ្រេច សង្កត់ ឬការទាញនៃសាច់ដុំនៅខ្នងរបស់អ្នក។ វាប្រហែលជាមានការឈឺចាប់យ៉ាងខ្លាំងរយៈពេលប៉ុន្មានថ្ងៃ ប៉ុន្តែគ្រូពេទ្យនិយាយថា អ្នកអាចបាត់ការឈឺចាប់ដោយមិនមានផលប៉ះពាល់អ្វីដែលនៅសល់តាមរយៈការអនុវត្តតាមការណែនាំជួយខ្លួនឯងដូចខាងក្រោម៖
រក្សាភាពសកម្ម៖ ចូរបំភ្លេចពាក្យចាស់បុរាណដែលឱ្យអ្នកសម្រាកនៅលើគ្រែឱ្យបានច្រើន។ ក្នុងការសិក្សាស្រាវជ្រាវមួយរបស់សាកលវិទ្យាល័យ Texas ផ្នែកវេជ្ជសាស្ត្រ នៅ Lubbock ក្រុមអ្នកស្រាវជ្រាវបានរកឃើញថា អ្នកជំងឺដែលហាត់ប្រាណអាចវិលត្រលប់ទៅធ្វើការវិញបានលឿនជាងអ្នកដែលមិនហាត់ប្រាណ។
ប្រសិនបើអ្នកត្រូវតែសម្រាកលើគ្រែ ចូរចំណាយពេលខ្លីបានហើយ៖ វេជ្ជបណ្ឌិត David Lehrman ជាអ្នកជំនាញផ្នែកឆ្អឹងខ្នង និយាយថា “មនុស្សជាច្រើនគិតថា ការសម្រាកលើគ្រែមួយសប្តាហ៍អាចបំបាត់ការឈឺចាប់របស់ពួកគេបាន ប៉ុន្តែវាមិនដូចជាអ្វីដែលពួកគេបានគិតនោះទេ។ ចំពោះរៀងរាល់សប្តាហ៍នៃការសម្រាកលើគ្រែ វាត្រូវការពេលពីរសប្តាហ៍ក្នុងធ្វើឱ្យដំណើរការបានដូចដើមវិញ”។
ការស្រាវជ្រាវនៅសាកលវិទ្យាល័យ Texas ផ្នែកវេជ្ជសាស្ត្របានអះអាងថាដូច្នេះ។ ក្រុមអ្នកស្រាវជ្រាវនៅទីនោះបានសិក្សាស្រាវជ្រាវលើអ្នកជំងឺ ២០៣នាក់ ដែលបានទៅគ្លីនីកហើយត្អូញត្អែរពីអាការៈឈឺឆ្អឹងខ្នងធ្ងន់ធ្ងររបស់ពួកគេ។ អ្នកជំងឺខ្លះត្រូវបានប្រាប់ឱ្យសម្រាករយៈពេលពីរថ្ងៃ និងអ្នកខ្លះសម្រាករយៈពេល ៧ថ្ងៃ។ វេជ្ជបណ្ឌិត Richard A. Deyo រាយការណ៍ថា មិនមានភាពខុសគ្នារវាងរយៈពេលដែលត្រូវចំណាយដើម្បីឱ្យភាពឈឺចាប់បាត់ទៅនោះទេក្នុងក្រុមទាំងពីរ។ ប៉ុន្តែអ្នកដែលងើបពីការសម្រាកលើគ្រែក្រោយពេលពីរថ្ងៃអាចវិលត្រលប់ទៅធ្វើការវិញបានលឿនជាង។
ប្រើទឹកកកដើម្បីបំបាត់ការឈឺចាប់៖ អ្នកស្រាវជ្រាវពីការឈឺចាប់ វេជ្ជបណ្ឌិត Ronald Melzack និយាយថា វិធីសាស្ត្រដែលល្អបំផុតក្នុងការបន្ថយការឈឺចាប់គឺការប្រើទឹកក។ វាជួយកាត់បន្ថយការហើម និងសម្ពាធលើសាច់ដុំខ្នងរបស់អ្នក។ គាត់និយាយថា ដើម្បីឱ្យទទួលបានលទ្ធផលល្អបំផុត អ្នកគួរសាកល្បងការម៉ាស្សាដោយប្រើទឹកកក។ “ដាក់កញ្ចប់ទឹកកកលើកន្លែងដែលឈឺ ហើយម៉ាស្សាកន្លែងនោះរយៈពេល ៧ ទៅ ៨នាទី”។ ធ្វើបែបនេះរៀងរាល់ពីរទៅបីម៉ោងម្តងរយៈពេលមួយឬពីរថ្ងៃ។
សាកល្បងបំបាត់ការឈឺចាប់ដោយប្រើកម្តៅ៖ វេជ្ជបណ្ឌិត Milton Fried និយាយថា ក្រោយពីប្រើទឹកកកមួយឬពីរថ្ងៃហើយ គ្រូពេទ្យណែនាំឱ្យអ្នកប្តូរទៅប្រើទឹកក្តៅវិញ។ ចូរយកកន្សែងទន់មួយជ្រលក់ក្នុងទឹកក្តៅឧណ្ហៗ ហើយពូតវាឱ្យនៅសើមល្មម ហើយអូសវាឱ្យស្មើកុំឱ្យមានស្នាមឆ្នូត។ គេងផ្កាប់មុខដោយដាក់ខ្នើយពីក្រោមចង្កេះនិងកជើង ហើយក្រាលកន្សែងលើកន្លែងដែលឈឺចាប់។ ចូរដាក់ថង់ប្លាស្ទិករុំលើវា បន្ទាប់មកប្រើបន្ទះកម្តៅដែលមានកម្តៅមធ្យមដាក់លើថង់ប្លាស្ទិកនោះ។ ប្រសិនបើអាច ចូរដាក់អ្វីមួយពីលើដើម្បីសង្កត់។ គាត់ពន្យល់ថា “វាជួយបង្កើតសំណើមដែលមានកម្តៅនិងជួយកាត់បន្ថយភាពតឹងណែននៃសាច់ដុំ។ អ្នកប្រហែលជាត្រូវការនរណាម្នាក់ឱ្យជួយអ្នកដើម្បីដាក់វាឱ្យបានល្អលើខ្នងរបស់អ្នក។
ប្រើភាពក្តៅនិងភាពត្រជាក់៖ វេជ្ជបណ្ឌិត Edward Abraham និយាយថា សម្រាប់អ្នកដែលមិនអាចសម្រេចចិត្តបានថាមួយណាអាចធ្វើឱ្យអ្នកបានប្រសើរជាងមុន អ្នកអាចប្រើប្រាស់ទាំងពីរមុខបាន។ វាប្រហែលជារឹតតែល្អសម្រាប់អ្នក។ គាត់និយាយថា “ការផ្លាស់ប្តូរនៃភាពក្តៅនិងភាពត្រជាក់ប្រហែលជាអាចជួយអ្នកបានកាន់តែប្រសើរ។ ដំបូងប្រើទឹកកក ៣០នាទី បន្ទាប់មកដកចេញដោយមិនប្រើអ្វីទាំងអស់មួយសន្ទុះធំ ក្រោយមកប្រើទឹកក្តៅ ៣០នាទី ហើយអនុវត្តដដែលរបៀបនេះ។
ពត់ខ្លួនដើម្បីសម្រួលភាពតឹងណែន៖ វេជ្ជ. Lehrman និយាយថា ការពត់ពែនខ្នងដែលកំពុងឈឺនឹងជួយពន្លឿនដំណើរនៃការជះសះស្បើយដោយការជួយសម្រួលសាច់ដុំឱ្យសម្រាកលឿនជាងការរង់ចាំឱ្យវាសម្រាកដោយខ្លួនវា។ គាត់ណែនាំការពត់ខ្លួនសម្រាប់អ្នកឈឺឆ្អឹងខ្នងផ្នែកខាងក្រោមដូចតទៅ៖ លើកជង្គង់ថ្នមៗឡើងឱ្យផុតពីគ្រែឆ្ពោះទៅកាន់ទ្រូង។ ពេលទៅដល់ទ្រូងហើយ ចូរសង្កត់បន្តិចលើជង្គង់របស់អ្នក។ ពត់ខ្លួនហើយសម្រាក បន្ទាប់មកពត់សារជាថ្មី។
រមៀលចុះពីលើគ្រែ៖ រាល់ពេលព្រឹកដែលអ្នកងើបចេញពីគ្រែ គ្រូពេទ្យណែនាំឱ្យអ្នករមៀលយ៉ាងប្រយ័ត្នប្រយែងនិងយឺតៗ។
វេជ្ជ. Lehrman និយាយថា “អ្នកអាចកាត់បន្ថយការឈឺចាប់ដែលបណ្តាលមកពីការងើបពីលើគ្រែបានដោយការប្រមៀលទៅជ្រុងគ្រែ។ នៅពេលទៅដល់ជ្រុងគ្រែ រក្សាខ្នងរបស់អ្នកឱ្យនឹង ហើយទម្លាក់ជើងរបស់អ្នកចុះទៅមុន។
ឈឺឆ្អឹងខ្នងរ៉ាំរ៉ៃ
ចំពោះមនុស្សមួយចំនួន ការឈឺចាប់ឆ្អឹងខ្នងមានលក្ខណៈរ៉ាំរ៉ៃ ដែលមានន័យថាវាកើតឡើងរៀងរាល់ថ្ងៃនៃជីវិតរបស់ពួកគេ។ មិនថាដោយសារតែមូលហេតុអ្វីក៏ដោយ ការឈឺចាប់ចេះតែបន្តរហូតដែលហាក់ដូចជាគ្មានថ្ងៃបញ្ចប់។ មនុស្សមួយចំនួនទៀតជួបប្រទះនឹងការឈឺចាប់ដែលកើតឡើងវិញជាថ្មី គ្រាន់តែចលនាអ្វីបន្តិចក៏អាចបង្កឱ្យមានការឈឺចាប់បានដែរ។ ការណែនាំខាងក្រោមមានប្រយោជន៍យ៉ាងពិសេសសម្រាប់អ្នកដែលមានការឈឺចាប់ឆ្អឹងខ្នងរ៉ាំរ៉ៃ ហើយអ្នកដែលមានការឈឺចាប់ធ្ងន់ធ្ងរក៏អាចស្វែងរកអត្ថប្រយោជន៍ពីវាបានដែរ។
ប្រើបន្ទះក្តារ៖ ដាក់បន្ទះក្តារនៅពីក្រោមកន្ទេលឬពូករបស់អ្នក ដើម្បីជួយឱ្យវាមានទម្ររឹង។ វេជ្ជ. Fried និយាយថា “វាជួយធ្វើឱ្យគ្រែមិនខូងផ្នែកកណ្តាល នៅពេលដែលអ្នកគេងលើវា”។
គ្រែទឹក៖ វេជ្ជ. Fried និយាយថា “គ្រែទឹកដែលមិនមានរលកខ្លាំងនិងអាចផ្លាស់ទីបានល្អបំផុតសម្រាប់អ្នកដែលមានអាការៈឈឺឆ្អឹងខ្នង។
វេជ្ជ. Abraham យល់ស្របថា៖ “នៅលើគ្រែទឹក អ្នកអាចធ្វើការប្រែប្រួលដែលប្រើសម្ពាធស្មើគ្នា ដូច្នេះអ្នកអាចគេងបានយ៉ាងស្រួល”។
គេងគងខ្នើយ៖ ខ្នងដែលឈឺមិនអនុញាតឱ្យអ្នកគេងផ្កាប់មុខនោះទេ។ វេជ្ជ. Abraham ណែនាំថា “ដាក់ខ្នើយក្រោមក្បាលនិងកផ្នែកខាងលើ ហើយរក្សាលំនឹងខ្នងឱ្យរាបស្មើទៅលើគ្រែ បន្ទាប់មកដាក់ខ្នើយពីក្រោមជង្គង់របស់អ្នក”។
នៅពេលដែលអ្នកដាក់ជើងត្រង់ សាច់ដុំសរសៃពួរគន្លាក់នឹងទាញ ដែលដាក់សម្ពាធដល់ខ្នងផ្នែកខាងក្រោម។ ការដាក់ជង្គង់ឱ្យបត់បែបនេះ ជួយឱ្យសរសៃរពួរគន្លាក់សម្រាក ដែលអាចដកសម្ពាធចេញពីខ្នងផ្នែកខាងក្រោម។
គេងដូចទារកក្នុងផ្ទៃ៖ ប្រសិនបើអ្នកគេងផ្អៀង អ្នកត្រូវអនុវត្តការគេងដូចទារកដែលនៅក្នុងគភ៌។ វេជ្ជ. Fried និយាយថា “អ្នកគួរដាក់ខ្នើយមួយនៅចន្លោះជង្គង់របស់អ្នក ដើម្បីជៀសវាងមិនឱ្យជើងរំកិលទៅមុខ និងផ្លាស់ប្តូរទីតាំងត្រគៀក ដែលដាក់ជាសម្ពាធដល់ខ្នងរបស់អ្នក”។
លេបអាស្ពីរីនមួយថ្ងៃមួយគ្រាប់៖ អ្នកជំនាញអះអាងថា វាអាចជួយបំបាត់អាការៈឈឺខ្នងរបស់អ្នក។ ការឈឺចាប់ឆ្អឹងខ្នងច្រើនតែកើតមានឡើងជាមួយនឹងការរលាកនៅជុំវិញកន្លែងដែលឈឺ ហើយថ្នាំបំបាត់ការរលាកធម្មតាដែលអាចរកទិញបានដោយគ្មានវេជ្ជបញ្ជាអាចជួយបំបាត់វាបាន។
បន្លប់ខ្លួនឯងថាគ្មានការឈឺចាប់៖ នៅពេលកណ្តាលអាធ្រាត្រអាចជាពេលដ៏ឈឺចាប់បំផុតសម្រាប់អ្នក។ ការឈឺចាប់ធ្វើឱ្យអ្នកភ្ញាក់ពីដំណេក ហើយវានៅបន្តការឈឺចាប់ដែលអ្នកមិនអាចគេងលក់វិញបាន។ វេជ្ជបណ្ឌិត Dennis Turk និយាយថា “ការបន្លប់ខ្លួនឯងគឺជាវិធីល្អបំផុតដែលអ្នកអាចធ្វើនៅពេលនោះ”។
ចូរគិតពីអ្វីម្យ៉ាងដែលអាចទាក់ទាញអារម្មណ៍របស់អ្នកឱ្យស្លុងទៅក្នុងគំនិតមួយនោះ។ អ្នកកាន់តែស្លុងអារម្មណ៍ អ្នកនឹងឆាប់ភ្លេចពីការឈឺចាប់របស់អ្នក។
បញ្ច្រាស់ទំនាញផែនដី៖ វេជ្ជ. Fried និយាយថា “ការបញ្ច្រាស់ទំនាញផែនដីមានប្រសិទ្ធភាពចំពោះអ្នកជំងឺឈឺឆ្អឹងខ្នង។ ឆ្អឹងខ្នងរបស់អ្នកត្រូវបានសង្កត់នៅពេលដែលអ្នកឈរ។ ការបញ្ច្រាស់ទំនាញផែនដីនឹងបំបែកវាហើយបំបាត់ការឈឺចាប់”។ វិធីសាស្ត្រនេះតម្រូវឱ្យអ្នកទម្រេតខ្លួនទៅលើអ្វីមួយ ដែលអាចឱ្យអ្នកដាក់ក្បាលចុះក្រោមនិងជើងបាញ់ទៅលើ។ ការធ្វើបែបនេះ ៣០នាទីក្នុងមួយថ្ងៃ ពិតជាអាចបំបាត់ការឈឺចាប់ឆ្អឹងខ្នងផ្នែកខាងក្រោមបាន។ ប៉ុន្តែអ្នកត្រូវទទួលការអនុញ្ញាតពីគ្រូពេទ្យរបស់អ្នកជាមុនសិនមុនប្រើយុទ្ធសាស្ត្រនេះ ជាពិសេសប្រសិនបើអ្នកមានបញ្ហាឌីសឆ្អឹងខ្នង។ ហើយអ្នកដែលមានជំងឺទឹកដក់ក្នុងភ្នែក ឬមានគ្រោះថ្នាក់នឹងកើតជំងឺនេះ មិនគួរប្រើវិធីនេះឡើយ។
ប្រើក្បាច់គុណថៃជី៖ ថៃជីគឺជាក្បាច់គុណបុរាណរបស់ប្រទេសចិន ដែលមានចលនាយឺតៗ។ វេជ្ជ. Abraham ដែលប្រើវិធីសាស្ត្រមួយនេះដោយខ្លួនលោកផ្ទាល់និយាយថា “វាគឺជាយុទ្ធសាស្ត្រមួយដែលអាចសម្រួលសាច់ដុំបានយ៉ាងល្អ។ វាក៏មានការហាត់ប្រាណដោយប្រើការដកដង្ហើមនិងសកម្មភាពពត់ពែនខ្លួនជាច្រើនទៀតដែលអាចជួយដល់អ្នកបានដែរ”។
ផាសុកភាពនៃកៅអីឡាន៖ តើខ្នងរបស់អ្នកតែងតែធ្វើទុក្ខដល់អ្នករាល់ពេលដែលអ្នកជិះឡានដែរឬទេ? កៅអីដែលអ្នកអង្គុយពីលើនោះប្រហែលជាប្រភពនៃបញ្ហារបស់អ្នកហើយ។ វេជ្ជបណ្ឌិត Roger Minkow ដែលជាអ្នកជំនាញផ្នែករចនាកៅអីក្នុងយាន្តយន្ត និយាយថា ខណៈដែលមានមូលហេតុជាច្រើនដែលបង្ករឱ្យមានបញ្ហាឆ្អឹងខ្នង មនុស្សភាគច្រើនមានបញ្ហាជាមួយនឹងបញ្ហាឆ្អឹងខ្នងដែលគេហៅថា អាការៈឈឺខ្នងមេកានិច ដែលទាក់ទងទៅនឹងការអង្គុយ ឈរ លើករបស់ ឬឱន។ គាត់ផ្តល់ការណែនាំដូចខាងក្រោម៖
- សាកល្បងធ្វើតេស្តកៅអីរថយន្តថ្មី៖ លើកក្រោយនៅពេលដែលអ្នកស្វែងរកទិញរថយន្ត អ្នកត្រូវធ្វើតេស្តពូករបស់កៅអីនិងសមត្ថភាពរបស់វា។ កែតម្រូវពូកនិងខ្នងកៅអីដើម្បីធ្វើឱ្យជើងរបស់អ្នកកោងបន្តិចនៅពេលដែលអ្នកជាន់ឈ្នាន់បន្ថែមល្បឿន។ ខ្នងកៅអីត្រូវតែរុញទប់នឹងខ្នងផ្នែកខាងក្រោមរបស់អ្នកដែលនៅជិតចង្កេះ។ ជម្រើសដ៏ឆ្លាតវៃមួយគឺអ្នកគួរជួលឡានដែលមានម៉ាកនិងស៊េរីដូចគ្នានៅចុងសប្តាហ៍ ហើយជិះសាកល្បងទៅកាន់កន្លែងឆ្ងាយៗដើម្បីឱ្យដឹងថាតើវាមានផាសុកភាពដែរឬទេ?
- បំប៉ោងពូកកៅអី៖ ប្រសិនបើអ្នកមិនចង់ទិញឡានថ្មីទេនោះ ពូកដែលអាចបំប៉ោងបានគឺជាជម្រើសដ៏ល្អដល់អ្នកដែលមានអាការៈឈឺឆ្អឹងខ្នងមេកានិចនេះ។
ហាត់ប្រាណដើម្បីបំបាត់ការឈឺចាប់៖ ការហាត់ប្រាណប្រហែលជាជម្រើសចុងក្រោយបំផុតដែលអ្នកនឹងគិតនៅពេលដែលអ្នកមានបញ្ហាឈឺឆ្អឹងខ្នង ប៉ុន្តែអ្នកជំនាញនិយាយថា ការហាត់ប្រាណគឺជាលំហាត់ដែលល្អបំផុតសម្រាប់អ្នកដែលមានការឈឺឆ្អឹងខ្នងរ៉ាំរ៉ៃ។
វេជ្ជ. Minkow និយាយថា “សម្រាប់អ្នកដែលឈឺចាប់រាល់ថ្ងៃដោយសារតែការឈឺឆ្អឹងខ្នងរ៉ាំរ៉ៃ ជាពិសេសប្រសិនបើការឈឺចាប់កើតឡើងនៅពេលខុសៗគ្នា ការហាត់ប្រាណអាចមានប្រយោជន៍ណាស់”។
ប្រសិនបើអ្នកស្ថិតនៅក្រោមការមើលថែរបស់គ្រូពេទ្យចំពោះបញ្ហាការឈឺឆ្អឹងខ្នងនេះ អ្នកត្រូវទទួលការអនុញ្ញាតពីគ្រូពេទ្យសិនមុននឹងធ្វើការហាត់ប្រាណ។ ខាងក្រោមគឺជាការហាត់ប្រាណដែលគ្រូពេទ្យបានណែនាំ៖
អាវ៉ងផ្នែកខាងលើ៖ វេជ្ជ. Minkow និយាយថា “ចូរគេងផ្កាប់ទៅលើឥដ្ឋ ហើយរក្សាត្រគាកឱ្យនៅរាបស្មើជាប់នឹងឥដ្ឋ ហើយអាវ៉ងដោយប្រើដៃរបស់អ្នក ដែលធ្វើឱ្យខ្នងរបស់អ្នកកោងឡើងនៅពេលដែលស្មារបស់អ្នកឡើងផុតពីឥដ្ឋ”។
ការធ្វើបែបនេះនឹងជួយពង្រឹងខ្នងផ្នែកខាងក្រោមរបស់អ្នក។ គាត់ណែនាំឱ្យធ្វើម្តងនៅពេលព្រឹកនិងម្តងនៅពេលថ្ងៃ។
ហាត់ងើបខ្លួនកំណាត់លើ៖ ចូរគេងផ្ញារ ហើយហាត់ងើបខ្លួនមួយកំណាត់លើ (crunch situp)។ គេងដោយដាក់បាតជើងឱ្យត្រង់លើឥដ្ឋ ហើយបត់ជង្គង់។ ដាក់ដៃរបស់អ្នកខ្វែងគ្នា ហើយដាក់ប្រអប់ដៃលើស្មា។ បន្ទាប់មកងើបក្បាលនិងស្មាឱ្យផុតពីដីឱ្យបានខ្ពស់បំផុតតាមដែលអ្នកអាចធ្វើបាន ប៉ុន្តែត្រូវរក្សាខ្នងផ្នែកខាងក្រោមឱ្យនៅរាបស្មើលើឥដ្ឋ។ ទប់វា ១ នាទី បន្ទាប់មកធ្វើសាជាថ្មី។
ហែលទឹកលើគោក៖ គេងផ្កាប់ ហើយលើកដៃឆ្វេងនិងជើងស្តាំរបស់អ្នក។ ទប់វារយៈពេល ១វិនាទី បន្ទាប់មកប្តូរទៅដៃស្តាំនិងជើងឆ្វេងវិញដូចជាអ្នកកំពុងហែលទឹក។
វានឹងជួយពង្រឹងខ្នងផ្នែកខាងក្រោមរបស់អ្នក។
ហែលក្នុងទឹក៖ វេជ្ជ. Fried និយាយថា “ការហែលទឹកគឺជាការហាត់ប្រាណដ៏ល្អសម្រាប់អ្នកមានបញ្ហាឆ្អឹងខ្នង។ ការហាត់ប្រាណដែលល្អសម្រាប់អ្នកដែលមានបញ្ហាឈឺខ្នងធ្ងន់ធ្ងរគឺការហែលក្នុងអាងទឹកក្តៅឧណ្ហៗ”។
ជិះកង់មួយកន្លែង៖ វេជ្ជ. Minkow និយាយថា “ចូរជិះកង់នៅមួយកន្លែងដោយមានកញ្ចក់នៅពីមុខអ្នក។ អ្នកត្រូវមើលថាអ្នកអង្គុយត្រង់ខ្លួន ដោយមិនមានកោងខ្នងបន្តិច។ ចូរលើកដៃកង់ឡើង ប្រសិនបើអ្នកត្រូវអង្គុយដោយឱនទៅមុខ”។
មិនត្រូវបង្ខំហាត់ទាំងឈឺ៖ ចូរប្រយ័ត្នប្រយែងនិងដឹងពីកំហិតរបស់អ្នកជាមួយនឹងលំហាត់ប្រាណទាំងនេះនិងលំហាត់ប្រាណដទៃទៀត។ វេជ្ជ. Minkow ណែនាំថា “ប្រសិនបើលំហាត់ប្រាណដែលអ្នកកំពុងធ្វើឱ្យអ្នកឈឺចាប់កាន់តែខ្លាំងឬធ្វើឱ្យស្ថានភាពរបស់អ្នកកាន់តែយ៉ាប់ជាងមុន អ្នកមិនត្រូវបន្តធ្វើវាទៀតទេ។ អ្នកមិនអាចនឹងកាត់បន្ថយការឈឺចាប់បានដោយការខាំមាត់ទាំងឈឺចាប់និងខំធ្វើលំហាត់ប្រាណទាំងនោះជាថ្មីឡើយ។ ប្រសិនបើអ្នកមានអារម្មណ៍ធម្មតាវិញក្រោយពេលផ្អាកមួយឬពីរថ្ងៃ នោះមានន័យថាវាមានសុវត្ថិភាពក្នុងការបន្តការហាត់ប្រាណបែបនោះ”។
ពេលដែលត្រូវរកគ្រូពេទ្យ៖ តើពេលណាដែលខ្នងរបស់អ្នកត្រូវការការត្រួតពិនិត្យពីគ្រូពេទ្យ? គឺនៅពេលដែលអ្នកជួបប្រទះនូវអាការៈដូចជាខាងក្រោម៖
- ការឈឺចាប់ឆ្អឹងខ្នងដែលកើតមានឡើងភ្លាមៗនិងគ្មានមូលហេតុ
- ការឈឺចាប់ឆ្អឹងខ្នងដែលកើតឡើងជាមួយនឹងរោគសញ្ញាផ្សេងទៀត ដូចជា ក្តៅខ្លួន រមូលពោះ ឈឺទ្រូង ឬពិបាកដកដង្ហើម។
- ការឈឺខ្លាំងដែលកើតមានយូរជាងពីរឬបីថ្ងៃដោយការឈឺចាប់មិនថយចុះ
- ការឈឺចាប់រ៉ាំរ៉ៃដែលកើតមានច្រើនជាងពីរសប្តាហ៍ដោយគ្មានការអន់ថយ
- ការឈឺចាប់ឆ្អឹងខ្នងដែលសាយភាពចុះពីជើងទៅជង្គង់ ឬជើងផ្នែកខាងក្រោម។
វេជ្ជ. Fried និយាយថា អ្នកមិនត្រូវតែងតែសន្មត់ថាអាការៈឈឺឆ្អឹងខ្នងគឺជាសញ្ញាបង្ហាញថាមានអ្វីកើតឡើងចំពោះខ្នងរបស់អ្នកនោះទេ។ វាអាចជាសញ្ញានៃវិបត្តិផ្សេងៗទៀត។