វាគ្មានអ្វីជាអាថ៌កំបាំងឡើយដែលថាការគេងក្នុងពេលមានផ្ទៃពោះមានលក្ខណៈខុសៗគ្នាច្រើនពីទម្លាប់នៃការគេងធម្មតាដោយគ្មានផ្ទៃពោះ។ រឿងមួយដែលត្រូវចាំនោះគឺថា អ្នកប្រហែលជាអាចភ្ញាក់ពីគេងនៅកណ្តាលយប់ច្រើនដងដោយសារតែត្រូវការនោម រមួលក្រពើនៅជើង ឈឺខ្នង ឬក្រហាយដើមទ្រូង។ ដោយសារតែពោះកាន់តែធំ ដូច្នេះវាពិបាកនឹងធ្វើឲ្យគេងបានស្រួលណាស់។ ប៉ុន្តែក៏មានជំហរគេងច្រើនដែរ ដែលល្អសម្រាប់ស្ត្រីមានផ្ទៃពោះ។ ជាក់ស្តែង ការគេងផ្កាប់គឺមិនអាចគេងបានទាល់តែសោះតែម្តង ជាពិសេសក្នុងត្រីមាសទីពីរ និងទីបី។ មួយវិញទៀត ការគេងផ្ងាក៏ជារឿងដែលមិនត្រូវបានណែនាំឲ្យធ្វើតែម្តងដោយសារតែអ្វីទៅ?
ការគេងផ្ងាមិនមែនមិនឲ្យគេងឡើយ គ្រាន់តែវាបង្កជាបញ្ហាច្រើន ជាពិសេសនៅត្រីមាសចុងក្រោយនៃការមានផ្ទៃពោះតែម្តង។ នៅពេលគេងផ្ងា ទម្ងន់របស់ស្បូន និងកូននឹងសង្កត់ទៅលើសរសៃឈាមវ៉ែនធំៗក្នុងពោះសម្រាប់បញ្ជូនឈាមពីអវៈយវៈខាងក្រោមចូលបេះដូងវិញ ដូច្នេះវានឹងកាត់បន្ថយលំហូរឈាមទៅចិញ្ចឹមទារក ហើយក៏មិនអាចផ្តល់ជីវជាតិ និងអុកស៊ីសែនទៅគេបានគ្រប់គ្រាន់ដែរ។ យ៉ាងណាមិញបើសិនជាអ្នកសង្កេតឃើញខ្លួនឯងគេងផ្ងាម្តងម្កាលនៅត្រីមាសដំបូង ឬទីពីរនោះក៏មិនអីដែរ ប៉ុន្តែមិនគួរណាធ្វើវាជារៀងរាល់ថ្ងៃឡើយ។
ការគេងចំហៀងគឺជាជម្រើសតែមួយគត់ដែលស្ត្រីគួរតែធ្វើ ហើយអ្នកជំនាញជាច្រើនបាននិយាយថា ការគេងមកចំហៀងខាងឆ្វេងគឺជារឿងល្អបំផុត ព្រោះវានឹងផ្តល់នូវលំហូរឈាមបានច្រើនបំផុត និងកាត់បន្ថយការហើមជើង ប៉ុន្តែបើសិនជាគេងមកចំហៀងខាងស្តាំក៏មិនអីដែរ៕
