​នៅ​ពេល​ចាប់ផ្តើម ជំងឺមហារីក​ក្រពេញប្រូ​ស្តាត​មិន​មាន​បង្ក​អ្វី​ជា​រោគសញ្ញា​ឡើយ​។ នៅពេល​មហា​រីកលូតលាស់​ហើយ អ្នក​ប្រហែលជា​មាន​បញ្ហា​ក្នុងការ​នោម​។ បុរស​ខ្លះ​ប្រហែល​ជា​ត្រូវការ​នោម​ញឹក ជាពិសេស​នៅពេល​យប់​តែម្តង​។ អ្នកខ្លះ​ទៀត​បែរជា​មាន​អា​ការៈឈឺចាប់ ឬ​ក្រហាយ​ពេល​នោម​, មាន​ឈាម​ក្នុង​ទឹកនោម ឬ​ទឹកកាម​, ឈឺ​ខ្នង​, ត្រគៀក ឬ​អាង​ត្រគៀក និង​ឈឺចាប់​ខ្លួន​ពេល​បាញ់​ទឹកកាម​។​

​ដើម្បី​រកអោយឃើញ​ថា​រោគសញ្ញា​ទាំងនេះ​បណ្តាលមកពី​ជំងឺមហារីក​ក្រពេញប្រូ​ស្តាត​នោះ គ្រូពេទ្យ​នឹង​សួរ​អំពី​ប្រវត្តិ​ជំងឺ និង​ប្រវត្តិ​ជំងឺ​ក្នុង​គ្រួសារ​របស់​អ្នក​។ គាត់​នឹង​ធ្វើ​ការពិនិត្យ​លើ​រាងកាយ​បន្ថែមទៀត​។ ក្នុង​ពេល​ពិនិត្យ គ្រូពេទ្យ​នឹង​ពាក់​ស្រោមដៃ​ដើម្បី​លូក​ពិនិត្យ​ក្នុង​រុន្ធ​គូថ និង​ប៉ះ​ក្រពេញប្រូ​ស្តាត​ដើម្បី​វាយតម្លៃ​។​

​គ្រូពេទ្យ​ក៏​ប្រហែល​ជា​ធ្វើតេស្ត​ឈាម​ដើម្បី​ពិនិត្យ​រកមើល​កម្រិត PSA (Prostate-specific Antigen)​។ កម្រិត​នៃ​សារធាតុ​មួយ​នេះ​អាច​នឹង​ឡើង​ខ្ពស់​លើ​បុរស​ដែល​មាន​បញ្ហា​រីក​ធំ​ក្រពេញប្រូ​ស្តាត ឬ​ជំងឺ​មហារីក​ក្រពេញប្រូ​ស្តាត​។ អ្នក​ក៏​ប្រហែឡជា​ត្រូវ​ការថត​អេកូ​ដែរ​ដើម្បី​មើល​ពី​រូ​បរាង្គ​ក៏ដូចជា​សភាព​របស់​ក្រពេញប្រូ​ស្តាត​។​

​បើសិនជា​ការ​ធ្វើ​តេស្ត​បង្ហាញ​ឃើញថា អ្នក​ប្រហែលជា​មាន​ជំងឺមហារីក គ្រូពេទ្យ​នឹង​បញ្ជាក់​រោគវិនិច្ឆ័យ​អោយ​កាន់តែ​ច្បាស់​ជា​មួយ​ការ​ច្រឹប​សាច់​ទៅពិនិត្យ​។ គាត់​នឹង​ច្រឹប​សាច់​ក្រពេញប្រូ​ស្តាតដ៏​តូចៗ​ជាច្រើន​ដើម្បី​រក​មើល​ថា​តើ​មាន​កោសិការ​មហារីក ឬក៏​អត់​។ គ្រូពេទ្យ​ប្រហែលជា​ចង់​ធ្វើ​តេស្ត​នេះ​ម្តង​ហើយ​ម្តងទៀត​ដើម្បី​តាមដាន​នូវ​លទ្ធផល​កាន់តែច្បាស់​។