មាន​ស្ត្រី​ស្ទើរតែ​ទាំងអស់ តែង​មាន​ភាព​ពិបាក ក្នុង​អត់ទ្រាំ​នឹង​ការឈឺចាប់ ដែល​កើតមាន​ក្នុង អំឡុងពេល​នៃ​ការធ្លាក់​ឈាមរដូវ​។ មាន​ស្ត្រី​មួយចំនួន អាច​នឹង​ប្រឈម​នូវ​ការ ឈឺចាប់​នេះ ខ្លាំងក្លា​ជាង ស្ត្រី​ផ្សេងទៀត ។ មូលហេតុ​ចំបង​នៃ​ការឈឺចាប់​នេះ គឺ​ដោយសារតែ អតុល្យភាព​នៃ កម្រិត​អរ​ម៉ូ​ន នៅក្នុង​រាងកាយ​។ ស្ត្រី​ភាគច្រើន តែង​ជ្រើសរើស​យក ការប្រើ​ថ្នាំ​បំបាត់​ការឈឺចាប់ ដើម្បី​សម្រាល​នូវ ការឈឺចាប់​នេះ ។ ប៉ុន្តែ ការជ្រើសរើស​យក វិធី​ព្យាបាល​ដោយ​ការប្រើ ថ្នាំ​បំបាត់​ការឈឺចាប់ អាច​នាំមក នូវ ផល​រំខាន​ដ៏​អាក្រក់​មួយ ។

ខាងក្រោម​នេះ គឺជា​វិធី​បែប​ធម្មជាតិ​ងាយៗ ក្នុងការ​សម្រាល​នូវ​ការឈឺចាប់ ដែល​បណ្តាល​មកពី​ការធ្លាក់​ឈាមរដូវ នេះ​បាន ដោយ​មិនបាច់​ប្រើ​ថ្នាំ ៖

១. ទឹក​ប្រទាល​កន្ទុយក្រពើ និង ទឹកឃ្មុំ​
​ទឹក​ប្រទាល​កន្ទុយក្រពើ​ពី​ធម្មជាតិ គឺ​មាន​សមាសធាតុ ក្នុង​ការជួយ​សម្រាល​ដល់​ការឈឺចាប់​។  អ្នក​អាច ធ្វើកា​រលាយ​ល្បាយ​រវាង ទឹក​ប្រទាល​កន្ទុយក្រពើ និង បន្ថែម​ជាមួយនឹង ទឹកឃ្មុំ ១​ស្លាបព្រា កាហ្វេ​។ អ្នក​អាច​ផឹក​វា អោយបាន ២ ទៅ ៣​ដង ក្នុង​មួយ​ថ្ងៃ​។ វិធី​នេះ អាច​ជួយ​សម្រាល ដល់​ការឈឺចាប់ ដែល​បណ្តាល​មកពី ការធ្លាក់​ឈាមរដូវ ។ ទឹក​ប្រទាល​កន្ទុយក្រពើ អាច​ជួយ​លៃ​តម្រូវ នូវ​ដំណើរ​ឈាម​រត់ នៅក្នុង​រយៈពេល នៃ​ការធ្លាក់​ឈាមរដូវ អោយបាន​ត្រឹមត្រូវ​ល្អ​។​

២. ការដាក់​ស្អំ​ក្រណាត់​ក្តៅឧណ្ណៗ​
​វិធី​នេះ​មាន ប្រសិទ្ធិភាព បំផុត ក្នុង​ការជួយ​សម្រាល​ដល់​ការឈឺចាប់ ។ យក​ក្រណាត់ ឬ ស្បៃ​ដែល​បាន ជ្រលក់​ទឹក​ក្តៅឧណ្ណៗ យក​មក​ស្អំ នៅលើ​ពោះ​របស់​អ្នក​។ អ្នក​អាច​នឹង​មាន​អារម្មណ៍​ថា ដឹង​ពី ប្រសិទ្ធិភាព របស់​វា តែ​ក្នុង​រយៈពេល ៥​នាទី​ប៉ុណ្ណោះ ។ វា​អាច​ជួយ ការពារ បាន​នូវ បញ្ហា​នៃ​ការឈឺចាប់ និង ការឈឺ រមួល​ក្នុង​ពោះ ។ មាន​ស្ត្រី​ជាច្រើន ក៏​អាច​នឹង​សម្រាល​បាន​នូវ​ការឈឺចាប់​នេះ បាន​ផង​ដែរ ដោយ​ការប្រើ នូវ​វិធី​ព្យាបាល ដោយ​ការផ្លាស់ប្តូរ​សីតុណ្ហភាព គឺ​មានន័យថា ដំបូង អ្នក​ត្រូវ​ដាក់​ស្អំ​ក្រណាត់​ក្តៅឧណ្ណៗ និង បន្ទាប់មក ដាក់​ស្អំ​ក្រណាត់​ត្រជាក់​វិញ​ម្តង ។​

៣. ទឹក​ម្នាស់​
​តើ​អ្នក​មាន​ដឹង​ទេ​ថា ទឹក​ម្នាស់ គឺ​សម្បូរ​ទៅ​ដោយ​សារជាតិ bromelanin ? វា​អាច​ជួយ សម្រាល​នូវ អាការៈ​នៃ​ការឈឺ​រមួល ក្នុង​ពោះ និង ការឈឺចាប់​សាច់ដុំ ក្នុងអំឡុងពេល​នៃ​ការ​ធ្លាក់ឈាម​រដូវ​នេះ ។ ជាមួយនឹង​ការ ផឹកទឹក​ម្នាស់​ត្រឹមតែ​មួយ​កែវ នោះ​អ្នកនឹង​អាច បាត់បង់​នូវ​អារម្មណ៍ នៃ​ការឈឺចាប់​នេះ បាន​។ ប្រសិនបើ​រាងកាយ​អ្នក មិន​អាច​ទទួល​យក​ទឹក​ម្នាស់​នេះ​បាន នោះ​អ្នក​អាច​ជ្រើសរើស​យក ទឹក​ការ៉ុត​យក​មក​ទទួល​ទាន​ជំនួស​វិញ ។ ទឹក​ការ៉ុត ក៏​អាច​មាន​ប្រសិទ្ធិភាព ក្នុងការ​សម្រាល បាន​ដល់ ការឈឺចាប់​សាច់ដុំ និង អា​ការៈឈឺរ​មួល​ក្នុង​ពោះ បាន​ផង​ដែរ​។​

៤. ទឹក​ជី​អង្កា​ម និង ខ្ញី​
​ទឹក​ជី​អង្កា​ម អាច​ជួយ​សម្រាល ដល់​សភាព​តឹង​ណែន របស់​សាច់ដុំ នៅក្នុង​រាងកាយ ។ ធ្វើកា​រលាយ​ល្បាយ រវាង ទឹក​ជី​អង្កា​ម និង ជាមួយ​នឹង​ទឹក​ខ្ញី ។ វិធី​ធម្មជាតិ​មួយ​នេះ នឹង​អាចជួយ​បំបាត់ នូវ​ការឈឺចាប់ ដែល​បណ្តាល​មកពី​ការ​ឈឺពោះ​នៃ​ការ​ធ្លាក់ឈាម​រដូវ​នេះ​បាន​។ អ្នក​គួរ​យក​វា មក​ទទួល​ទាន ក្នុង​ទម្រង់​ជា​លក្ខណៈ​ធម្មជាតិ នោះ​អ្នកនឹង​ទទួលបាន​នូវ លទ្ធផល​ដ៏​ល្អ ។ អ្នក​អាច​យក វា​មក​ផឹក ពី ២  ទៅ ៣​ដង ក្នុង​មួយ​ថ្ងៃ គឺ​អាស្រ័យ​ទៅតាម សភា​ពនៃ​ការឈឺចាប់​របស់​អ្នក ។​

៥. លំ​ហាត់ប្រាណ​បែប​យូ​ហ្គា​
​ស្ថានភាព​នៃ​លំ​ហាត់ប្រាណ បែប​យូ​ហ្គា​មួយចំនួន អាច​ជួយ​សម្រាល​បាន​ដល់ ការឈឺចាប់ និង បង្ការ​បាន​នូវ សភា​ពនៃ​ការឈឺចាប់​រមួល ក្នុង​ពោះ នៅក្នុង​អំឡុងពេល​នៃ​ការ​ធ្លាក់ឈាម​រដូវ​នេះ ។ មាន​ស្ត្រី​ជាច្រើន បាន​អនុវត្ត​នូវ លំ​ហាត់ប្រាណ​កម្រិត​ស្រាលៗ ដើម្បី​ជួយ​សម្រាល​ដល់ ការឈឺចាប់ ។ អ្នក​មិន​ត្រូវ​បង្ខំ​ខ្លួនឯង អោយធ្វើ​លំ​ហាត់ប្រាណ​ទាំងនេះ នោះទេ ប្រសិនបើ​អ្នក​មាន​អារម្មណ៍​ថា មិនមាន ផាសុក​នោះ ។​

៦. ព្យាបាល​ដោយ​ការ​ងូតទឹក​ដោយ​ប្រើ​ក្លិន​ក្រអូប​
​វា​ជួយ​សម្រាល នូវ​ការឈឺចាប់​រមួល ក្នុង​ពោះ និង សម្រាល​នូវ​សភាព​តឹង​ណែន​របស់​សាច់ដុំ​បាន​។ អ្នក អាច​សាកល្បង​នូវ ការប្រើ​ទឹក​ក្រអូប យក​មក​ងូតទឹក និង រង់ចាំ​ទទួល​យក នូវ​លទ្ធផល​ដ៏​មាន ប្រសិទ្ធិភាព របស់​វា​។ វិធី​ព្យាបាល​នូវ ការឈឺចាប់​ក្នុងអំឡុងពេល​នៃ​ការ ធ្លាក់​ឈាមរដូវ តាម បែប​ធម្មជាតិ​ខាងលើ នេះ គឺ​មិន​បាន​ផ្តល់​ផល​រំខាន​អ្វី​ជា​អវិជ្ជមាន ចំពោះ​រាងកាយ​នោះទេ ៕​