ការច្រឹបសាច់យកមកវិភាគ គឺជាវិធីសាស្ត្រដែលគេធ្វើ ដើម្បីទទួលបានគំរូនៃកោសិកាពីរាងកាយរបស់អ្នក សម្រាប់ការធ្វើតេស្តក្នុងមន្ទីរពិសោធន៏។ ការច្រឹបយកសាច់យកមកវិភាគអាចត្រូវបានប្រើដើម្បីយកវត្ថុវិភាគដែលអាចជាជាលិកា ឬសារធាតុរាវ។ វាអាចជាជាលិកាសាច់ដុំ ឬឆ្អឹង និងសរីរាង្គដូចជាថ្លើម ឬសួតជាដើម។ គ្រូពេទ្យរបស់អ្នកអាចផ្ដល់យោបល់អោយធ្វើការច្រឹបយកសាច់មកវិភាគដើម្បីជួយដល់ធ្វើរោគវិនិច្ឆ័យ ឬដើម្បីទាត់ចោលនូវជំងឺណាមួយ។ ការច្រឹបយកសាច់យកមកវិភាគក៏អាចត្រូវបានប្រើដើម្បីវាយតម្លៃលើការវិវត្តនៃការព្យាបាល។ វត្ថុវិភាគអាចជួយគ្រូពេទ្យរបស់អ្នកក្នុងការកំណត់នូវអ្វីដែលជាធាតុបង្កនៃជំងឺរបស់អ្នកដែលអាចមានដូចជា ៖
- ដុំពក ឬដុំសាច់ ៖ ដើម្បីបញ្ជាក់ថា ដុំដែលអ្នកមានគឺជាគីស ការឆ្លងមេរោគ ដុំសាច់ស្លូត ឬជាដុំមហារីក។
- ការបង្ករោគ ៖ ការវិភាគនេះអាចជួយអោយវេជ្ជបណ្ឌិតកំណត់នូវអ្វីដែលជាមូលហេតុបង្កនៃការឆ្លងមេរោគ ដូច្នេះ គ្រូពេទ្យអាចជ្រើសថ្នាំដែលមានប្រសិទ្ធភាពបំផុតសម្រាប់ព្យាបាល។
- ការរលាក ៖ ការវិភាគនេះអាចបង្ហាញនូវអ្វីដែលបណ្តាលអោយមានការរលាក និងប្រភេទនៃកោសិកាដែលបានចូលរួម។
- អ្នកក៏អាចតម្រូវអោយធ្វើតេស្តរូបភាពវេជ្ជសាស្ត្រដូចជាស្កែន (CT) ឬអ៊ុលត្រាសោន (ថតអេកូ) មុននឹងច្រឹប។ ពេលខ្លះ ការធ្វើតេស្តទាំងនេះត្រូវបានប្រើក្នុងអំឡុងពេលច្រឹបសាច់ ដើម្បីរកទីតាំងច្រឹបអោយបានត្រឹមត្រូវ៕