ពេលកូនរបស់អ្នកបានលេបវត្ថុចម្លែកតើអ្នកគួរធ្វើដូចម្តេច?
ទារកនិងកុមារតូចអាចនឹងលេបអ្វីដែលវាបៀមចូលទៅក្នុងពោះ។គ្រោះថ្នាក់កើតមានឡើងកាលណាវត្ថុនោះវានៅជាប់គាំងក្នុងបំពង់ដកដង្ហើម។ របស់ដែលកុមារអាចហឺតចូលក្នុងបំពង់ដកដង្ហើមញឹកញាប់រួមមានចំណីអាហារដូចជាផ្លែទំពាំងបាយជូរ គ្រាប់ផ្លែឈើ សាច់ច្រក ពោតលីង និងគ្រាប់ធញ្ញជាតិ។ វត្ថុឯទៀតដែលមិនសូវញឹកញាប់ទេ ប៉ុន្តែអាចមានគ្រោះថ្នាក់ខ្លាំងមានឆ្អឹង សំបកសណ្តែកដី ល្បែងតូចៗ ចុងថ្មពិល និងផ្នែកផ្សេងៗនៃតុក្កតានិងរបស់លេង។
របស់របរដែលនៅជាប់ក្នុងបំពង់ដកដង្ហើមអាចរារាំងមិនឲ្យមានអុកស៊ីសែនគ្រប់គ្រាន់ចូលទៅដល់ក្នុងសួត។ ការដែលស្រាប់តែមានការលំបាកក្នុងការដកដង្ហើមភ្លាមៗ ក្អក សំលេងស្អក ឬការលំបាកក្នុងការនិយាយស្តី អាចជាសញ្ញាបញ្ជាក់ថាមានអ្វីប្លែកដែលត្រូវបានស្រូបបឺតចូលទៅហើយ ហើយដែលត្រូវការឲ្យមានការជួយសង្គ្រោះជាបន្ទាន់ ។ គេអាចមិនមានពេលដើម្បីហៅរកគ្រូពេទ្យនោះទេ។វត្ថុចំឡែកនោះអាចរាំងខ្ទប់បំពង់ដកដង្ហើមទាំងស្រុង គម្រាមកំហែងដល់អាយុជីវិតបាន។ នេះមានន័យថាវត្ថុនោះវានៅជាប់ជិតខ្សែបំពងសម្លេង ហើយគេត្រូវការប្រើវិធីHeimlich maneuver ជាដើម ដើម្បីដកហូតយកវាចេញ។ ជួនកាលកុមារម្នាក់ដែលមានសុខភាពល្អទេ ស្រាប់តែធ្លាក់បាត់បង់ស្មារតីភ្លាមៗដោយគ្មានមូលហេតុច្បាស់លាស់ អាចមកពីកុមារនោះបានឈ្លក់របស់អ្វីមួយប្លែកចូលទៅក្នុងផ្លូវដង្ហើម។ ដូច្នេះមាតាបិតាត្រូវតែចេះដឹងអំពីការព្យាបាលការឈ្លក់របស់កុមារ។ដំណាក់កាលភាគច្រើននៃការឈ្លក់វត្ថុសុទ្ធតែអាចបង្ការបាន។
របស់របរទាំងអស់នោះអាចដើរផ្លូវផ្សេង ចូលទៅក្នុងប្រព័ន្ធរំលាយអាហារទៅវិញ។ តាមធម្មតា វាអាចឆ្លងកាត់ក្រពះនិងពោះវៀនដោយមិនមានការលំបាកទេ។ ក៏ប៉ុន្តែវាក៏អាចគាំងជាប់នៅត្រង់ណាមួយក្នុងបំពង់រំលាយអាហារបានដែរ ជាពិសេសគឺនៅត្រង់ចន្លោះបំពង់កនិងក្រពះ។ របស់ដែលអាចដូច្នេះរួមមានម្ជុល ប្រាក់កាក់ ចុងថ្មពិល ជាដើម។ វាអាចធ្វើឲ្យក្អក ឈ្លក់ មានអារម្មណ៍ថាមានអ្វីនៅក្នុងបំពង់ក ឈឺចាប់ឬពិបាកលេប មិនចង់ហូបអាហារ បែកពពុះមាត់ ឬក្អួតជាប់។
បើកូនលោកអ្នកបានលេបអ្វីដែលទន់ៗ ដូចជាគ្រាប់ឈើ ឬឡេវអាវ ដោយមិនមានការពិបាកទេ នោះវត្ថុទាំងអស់នោះអាចនឹងឆ្លងកាត់បំពង់រំលាយអាហារបាន ប៉ុន្តែលោកអ្នកក៏ត្រូវតែរាយការណ៍ប្រាប់គ្រូពេទ្យឬគិលានុប្បដ្ឋាយិកា។
ប៉ុន្តែបើសិនជាកូនលោកអ្នកមានការឈឺចាប់ពេលក្អួតចង្អោរ ឬមានសញ្ញាអ្វីដូចដែលបានរៀបរាប់ខាងលើ នោះលោកអ្នកត្រូវតែនាំកូនទៅជួបជាមួយគ្រូពេទ្យភ្លាម។បើកូនលោកអ្នកលេបចុងថ្មពិល សូមនិយាយប្រាប់គ្រូពេទ្យឲ្យបានដឹង ព្រោះថ្មពិលអាចបណ្តាលឲ្យមានការសិករិចរិលស្បែកខាងក្នុងពោះវៀនបាន។
ជាធម្មតា បើកុមារបានលេបអ្វីមួយចូលទៅក្នុងខ្លួន គេចាំបាច់ត្រូវធ្វើការឆ្លុះកាំរស្មីអ៊ិច ដើម្បីកំណត់ឲ្យបានថារបស់នោះស្ថិតនៅត្រង់ណា។ គ្រូពេទ្យអាចប្រាប់អ្នកថាវាបានឆ្លងចូលទៅដល់ពោះវៀន ឬត្រូវធ្វើយ៉ាងណាដើម្បីយកវាចេញមកវិញ។
ជាទីបញ្ចប់ សូមកុំឲ្យឱសថ ipecac ឬថ្នាំបញ្ចុះ cathartic ឲ្យកុមារដែលបានលេបអ្វីចូលទៅក្នុងពោះឲ្យសោះ វាមិនអាចជួយអ្វីបានទេ ហើយអាចធ្វើឲ្យកាន់តែមានគ្រោះថ្នាក់ទៅវិញទេ។