ការទទួលទានអហារមានជាតិសរសៃយ៉ាងត្រឹមត្រូវអាចចៀសវាងការស្លាប់មុនវ័យ នៅពេលដែលលឺពាក្យថាជាតិសរសៃអ្នកប្រហែលជាគិតដល់សំបកនៃគ្រាប់ធញ្ញជាតិ ដែលវាមិនមែនជាប្រភេទ អាហារដែលធ្វើអោយអ្នកឃ្លានចង់ញុំានោះទេ។ ប៉ុន្តែតាមការស្រាវជ្រាវបានអោយដឹងថាការទទួលទានអាហារមានជាតិសរសៃច្រើនស្មើនឹងការកើនអាយុ ១ឆ្នាំ។
ក្រោយពីការស្រាវជ្រាវអស់រយៈពេល ៩ ឆ្នាំ ទៅលើមនុស្សប្រហែល ៤០០០០០ នាក់ ក្នុងចន្លោះអាយុពី ៥០ឆ្នាំ ដល់ ៧១ឆ្នាំ លទ្ធផលបានបង្ហាញថា ក្នុងចំណោមអ្នកដែល ទទួលទានជាតិសរសៃច្រើនជាងគេ អត្រានៃការស្លាប់បានថយចុះរហូតដល់ ២២%។ ដោយផ្អែកទៅលើការរកឃើញពីការសិក្សាស្តីពីសុខភាពនិងរបបអាហាររបស់វិទ្យាស្ថានជាតិសុខភាពអាមេរិក បានអោយដឹងថាអត្រានៃការស្លាប់ដោយសារជំងឺបេះដូង, ជំងឺឆ្លង និង ជំងឺផ្លូវដង្ហើម បានថយចុះ ២៤%ក្នុងចំណោមបុរសចំនួន និង ៣៩% ក្នុងចំណោមស្ត្រីចំនួន៥៩% ។
ហេតុអ្វីបានជាការបកស្រាយថា ជាតិសរសៃជួយកាត់បន្ថយអត្រាការស្លាប់ នៅមានភាពមិនច្បាស់លាស់? លោក Yikyung Park ប្រធានផ្នែកនិពន្ធនិងជាបុគ្គលិកនៃវិទ្យាស្ថានជាតិប្រឆាំងជំងឺមហារីកបានអោយដឹងថានេះប្រហែល មកពីជាតិសរសៃបានចូលទៅជួយកាត់បន្ថយសារធាតុខ្លាញ់ដែលមិនល្អ, ធ្វើអោយជាតិស្ករដែលមាននៅក្នុងឈាមមានភាពប្រសើរឡើង, កាត់បន្ថយការរលាក និង បានតភ្ជាប់ទៅនឹងកោសិកាដែលជួយការពារជំងឺមហារីក ។វាបានចូលទៅលាងសំអាតសារធាតុទាំងនោះចេញពីរាងកាយ។
អ្វីដែលច្បាស់លាស់នោះគឺថាជាតិសរសៃដែលផ្តល់គុណប្រយោជន៍មានដូចជា អាហារដែលធ្វើពីស្រូវសាលីអូត, ពោត និងអង្ករសំរួប។ ចំណែកជាតិសរសៃដែលបានមកពីបន្លែ ផ្លែឈើ ឬសណ្តែកមិនអាចមានផលជួយកាត់បន្ថយអត្រាគ្រោះថ្នាក់នៃការស្លាប់បានឡើយ។ គ្រាប់ធញ្ញជាតិដែលមិនទាន់បានចំរាញ់គឺជាប្រភពដែលសំបូរជាតិសរសៃច្រើនជាងគេ ហើយថែមទាំងជាប្រភពដែលសំបូរទៅដោយវីតាមីន, ជាតិខនិជ និងសារធាតុសំខាន់ៗផ្សេងៗទៀត ដែលផ្តល់គុណប្រយោជន៍ដល់សុខភាព។ ហើយគ្រាប់ធញ្ញជាតិទាំនោះផ្ទុកទៅដោយសារធាតុការពារអុកស៊ីដកម្មដ៏ប្រសើរ និងសារធាតុការពារការរលាកដែលមានប្រយោជន៍។ ការស្រាវជ្រាវផ្សេងៗទៀតក៏បានបង្ហាញដែរថា ជាតិសរសៃនៅក្នុងគ្រាប់ធញ្ញជាតិមានគុណប្រយោជន៍ដល់សុខភាព។
ជាការពិតណាស់ជាតិសរសៃទាំងអស់មិនត្រូវបានបង្កើតដោយបរិមាណស្មើគ្នានោះទេ, នេះជាការដាស់តឿនរបស់លោក James Anderson, អ្នកឯកទេសខាងក្រពេញអង់ដូគ្រីន(endocrinologist) ។ “សារធាតុសរសៃខុសគ្នាផ្តល់នូវគុណសម្បត្តិផ្សេងៗគ្នា” ។ការសិក្សានាពេលបច្ចុប្បន្នបានបង្ហាញពីសារៈសំខាន់នៃជាតិសរសៃដែលមាននៅក្នុងគ្រាប់ធញ្ញជាតិ។ ជាមួយគ្នានេះការសិក្សាពីជំនាន់មុនបានបង្ហាញថាជាតិសរសៃដែលមាននៅក្នុងបន្លែផ្លែឈើ ផ្តល់អត្ថប្រយោជន៍ដល់សុខភាពបេះដូង។
ជាតិសរសៃដែលងាយរលាយ គឺជាអាហារដែលមានជាតិសរសៃងាយរលាយខ្ពស់ ដោយសារវាមានសមត្ថភាពក្នុងការធ្វើអោយរលាយយ៉ាងងាយស្រួលនៅក្នុងទឹក ដូចជាៈ ស្រូវសាលីអូត រឺអាហារដែលធ្វើពីស្រូវសាលីអូត, គ្រាប់សណ្តែក, ផ្លែសណ្តែក, កន្ទក់, ស្រូវបាលី, ផ្លែក្រូច ផ្លែស្ត្របឺរី និងសាច់ផ្លែប៉ម។ ទាំងនេះគឺជាការអះអាងរបស់ សមាគមបេះដូងអាមេរិក(American Heart Association)។ សារជាតិសរសៃដែលងាយរលាយគឺមានទំនាក់ទំនងនឹងការកាត់បន្ថយជាតិខ្លាញ់ដែលមិនល្អ។ សាស្ត្រាចារ្យ Joanne Slavin និយាយថា ជាតិសរសៃដែលស្អិតអន្ធិលដែលមានក្នុងកន្ទក់និងសណ្តែក អាចនឹងមានផលល្អព្រោះពួកវានឹងបង្កើតជាតិអន្ធិលនៅក្នុងពោះវៀនដែលធ្វើឱ្យការបង្ករឡើងនៃខ្លាញ់មានការថយចុះ។
ជាតិសរសៃដែលពិបាករំលាយ អាហារដែលមានជាតិសរសៃពិបាករំលាយ ដែលមានទាក់ទងនឹងការបន្ថយគ្រោះថ្នាក់នៃជំងឺបេះដូង។ ដូច្នេះហើយ ក្នុងខណៈដែលកំពុងតែមានការវែកញែកលើប្រភេទជាតិសរសៃណាដែលមានប្រយោជន៍ក្នុងការការពារបេះដូង អ្នកមិនត្រូវមានទំនុកចិត្តលើជាតិសរសៃដែលងាយរំលាយតែមួយមុខដើម្បីទទួលបានផលប្រយោជន៍ចំពោះសុខភាពខ្ពស់បំផុតនោះទេ។សមាគមជំងឺបេះដូងអាមេរិក បានកំណត់ថា នំប៉័ងស្រូវសាលី, គ្រាប់ស្រូវសាលី, កន្ទក់ស្រូវសាលី, ស្ពៃក្តោប, ការ៉ុត, ផ្កាខាត់ណានិងសំបកផ្លែប៉ម គឺជាអាហារដែលសម្បូរជាតិសរសៃប្រភេទនេះ។ វាខុសពីជាតិសរសៃដែលងាយរំលាយ។ វាមិនរលាយក្នុងទឹក ឬបង្ករជាតិអន្ធិលទេ ប៉ុន្តែវានឹងធ្វើដំណើរឆ្លងកាត់បំពង់រំលាយអាហារដោយមិនផ្លាស់ប្តូររូបរាង។ វាគឺជាប្រភពដ៏ល្អមួយប្រសិនបើអ្នកទល់លាមក ព្រោះសរសៃដែលពិបាករំលាយច្រានរបស់ផ្សេងៗដែលនៅក្នុងបំពង់អាហារចេញមកក្រៅ។ ម្យ៉ាងវិញទៀត ជាតិសរសៃដែលពិបាករំលាយ (និងក្នុងករណីខ្លះ ជាតិសរសៃដែលងាយរំលាយ) អាចជួយអ្នកឱ្យមានអារម្មណ៍ថាឆ្អែតនិងអាចជួយគ្រប់គ្រងទម្ងន់។
ជាតិអាមីដុង វាជាផលិតផលម្សៅមិនរំលាយក្នុងពោះវៀនតូចនោះទេ។ ពួកវាត្រូវបានគេរកឃើញក្នុងបន្លែអន្លក់និងអាហារដូចជាដំឡូងបារាំង ប៉ាស្តា និងបាយដែលត្រជាក់ និងចេកទុំ។ ទឹកដោះគោជូរដែលមានលាយជាតិសរសៃមានផ្ទុក inulin ដែលជាក្រុមនៃជាតិស្ករធម្មតាដែលមិនរំលាយ។ សាស្ត្រាចារ្យ Slavin និយាយថា inulin កើតឡើងដោយឯកឯងក្នុងឫសឈើនិងរុក្ខជាតិផ្សេងទៀតនិងធញ្ញជាតិ ហើយវាជាប្រភេទនៃជាតិសរសៃ ប៉ុន្តែវាដូចនឹងជាតិម្សៅដែរ។ វាមិនមានប្រសិទ្ធភាពប្រឆាំងនឹងជាតិខ្លាញ់ទេ។
ដូច្នេះតើអ្វីជាចំណុចសំខាន់? ការណែនាំរបបអាហារសម្រាប់ប្រជាជនអាមេរិករបស់សហព័ន្ធរដ្ឋាភិបាលដែលទើបនឹងចេញថា ការទទួលទានជាតិសរសៃប្រហែល ២៥ ក្រាម ក្នុងមួយថ្ងៃសម្រាប់ស្ត្រី និង ៣៨ ក្រាម សម្រាប់បុរស ហើយការស្រាវជ្រាវបង្ហាញថាពួកគេទទួលបានប្រហែល ១៥ ក្រាមតែប៉ុណ្ណោះ។ ប៉ុន្តែដោយសារផលប្រយោជន៍នៃជាតិសរសៃសម្រាប់សុខភាពមានភាពខុសគ្នាទៅតាមប្រភេទ ហើយក្នុងករណីជាច្រើនមិនទាន់ច្បាស់លាស់ឬប្រាកដនោះ ការណែនាំដែលល្អបំផុតគឺទទួលទានអាហារដែលដាំឱ្យបានច្រើន ដូចជាផ្លែឈើ, បន្លែ, បន្លែអន្លក់ (legumes), និងធញ្ញជាតិទាំងមូល។ វាខុសពីការរកឃើញថ្មីដែលថាមានតែជាតិសរសៃពីធញ្ញជាតិប៉ុណ្ណោះដែលអាចមានទំនាក់ទំនងនឹងការបន្ថយគ្រោះថ្នាក់នៃការស្លាប់មុនវ័យ។ អ្នកមិនត្រូវបារម្ភខ្លាំងចំពោះការផ្តោតលើប្រភេទអាហារជាតិសរសៃនោះទេ ហើយលោក Slavin បានណែនាំថា “ទទួលទានជាតិនេះពីអាហារខុសៗគ្នាកាន់តែច្រើនកាន់តែល្អ”។ ប្រសិនបើអ្នកជ្រើសរើសអាហារកញ្ចប់ទៅតាមប្រភេទនៃការផ្ទុកជាតិសរសៃរបស់វានោះ អ្នកត្រូវប្រាកដថាវាមានគុណភាពល្អ។
