ជំងឺទឹកនោមផ្អែមត្រូវគេកំណត់លើការឡើងកម្រិតជាតិស្ករក្នុងឈាម ដូច្នេះទើបមនុស្សជាច្រើនឆ្ងល់ថា តើការញ៉ាំស្ករធ្វើឲ្យកើតជំងឺទឹកនោមផ្អែមមែនឬ?
ការញ៉ាំស្ករគ្រាន់ជាផ្នែកមួយនៃការកើតមានជំងឺនេះប៉ុណ្ណោះ លើកលែងតែអ្នកញ៉ាំវាក្នុងបរិមាណច្រើន។ ជំងឺទឹកនោមផ្អែម ក៏កើតមានរួមផ្សំនឹងកត្តាជាច្រើនទៀតផងដែរ ដូចជា របបអាហារ របៀបរស់នៅ និងហ្សែន ជាដើម។
ការផឹកភេសជ្ជៈផ្អែមជាទៀងទាត់អាចមានឱកាសកើតជំងឺទឹកនោមផ្អែមប្រភេទ២ ដល់ទៅ២៥ភាគរយ ហើយការផឹកភេសជ្ជៈផ្អែមមួយកំប៉ុងរាល់ថ្ងៃមានហានិភ័យកើតជំងឺទឹកនោមផ្អែម១៣ភាគរយ។
ទោះជាការទទួលទានស្ករកែច្នៃច្រើនមានទំនាក់ទំនងទៅនឹងជំងឺទឹកនោមផ្អែមក៏ដោយ ការទទួលទានស្ករធម្មជាតិ គឺមិនដូចគ្នាទេ។ តើស្ករធម្មជាតិជាអ្វី? ស្ករធម្មជាតិ សម្ដៅលើស្ករ ដែលមាននៅក្នុងផ្លែឈើ និងបន្លែ ដោយមិនបានឆ្លងកាត់ការចម្រាញ់។
ស្ករធម្មជាតិនៅក្នុងបន្លែ និងផ្លែឈើ ផ្ទុកទៅដោយជាតិសរសៃ ទឹក សារធាតុប្រឆាំងអុកស៊ីតកម្ម និងសារធាតុចិញ្ចឹមផ្សេងៗទៀត។ អ្វីទាំងអស់នេះ នឹងត្រូវរំលាយ និងស្រួបយឺតៗ និងមិនងាយធ្វើឲ្យឡើងកម្រិតជាតិស្ករក្នុងឈាមនោះទេ។
ផ្ទុយទៅវិញ ការទទួលទាំនទឹកផ្លែឈើស្រស់ គឺមានហានិភ័យកើតជំងឺទឹកនោមផ្អែម ដោយសារថា ទម្រាំអ្នកកៀបទឹកផ្លែឈើបាន១កែវ អ្នកអាចនឹងចម្រាញ់វាចេញពីផ្លែឈើយ៉ាងហោចណាស់៤ទៅ៥ផ្លែ ដូចនេះក្នុងទឹកផ្លែឈើមានជាតិស្ករខ្ពស់ និងមានជាតិសរសៃទាប៕