សាច់ដុះលើស្បែកអាចជាបញ្ហាគួរឱ្យរំខាន និងអាម៉ាសមួយ ជាពិសេសប្រសិនបើវាលេចឡើងត្រង់កន្លែងងាយនឹងមើលឃើញ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ទោះជាយ៉ាងណាកុំបារម្ភ! មានវិធីច្រើនណាស់ក្នុងការកម្ចាត់សាច់ដុះលើស្បែក ហើយរូបមន្តបែបធម្មជាតិ គឺប្រសើរបំផុត ដោយអ្នកមិនចាំបាច់ចំណាយថវិការអស់ច្រើន។ ថ្ងៃនេះវេបសាយសុខភាព Health.com.kh នឹងបង្ហាញអោយដឹងពីរូបមន្តបែបធម្មជាតិងាយៗ ប៉ុន្តែមានប្រសិទ្ធភាពខ្ពស់ព្យាបាលកម្ចាត់សាច់ដុះលើស្បែកបានយ៉ាងឆាប់រហ័ស ៖
១. ទឹកខ្មេះផ្លែប៉ោម
អ្វីដែលអ្នកត្រូវធ្វើ គឺជាដំបូងត្រូវត្រាំបន្ទះសំឡី ឬដុំសំឡីក្នុងទឹកខ្មេះផ្លែប៉ោម បន្ទាប់មកច្របាច់ទឹកចេញខ្លះសិន មុននឹងបិតលើដុំសាច់តូចៗដែលដុះលើស្បែក។ ប្រើប្រាស់ស្បៃរុំឱ្យជាប់ ហើយទុកចោលសម្រាប់រយៈពេល ១យប់សឹមបកចេញ។ អនុវត្តសារឡើងវិញជាប្រចាំរហូតដល់សាច់ដុះជ្រុះបាត់។ អ្នកក៏អាចលាយទឹកខ្មេះផ្លែប៉ោម ២ ស្លាបព្រាបាយជាមួយទឹកធម្មតា ១ ស្លាបព្រា។ កូរអោយសព្វសឹមយកសំឡីស្អាតមួយដុំជ្រលក់ទឹកល្បាយលាបលើឬសស្បែក រួចប្រើប្រាស់ស្បៃរុំពីលើសម្រាប់រយៈពេលពី ៥ ទៅ ១០ នាទី និងអនុវត្តសារឡើងវិញអោយបានពី ២ ទៅ ៣ ដងក្នុងមួយថ្ងៃការស្រេច។
២. ប្រេងដើមតែ
ជាដំបូងត្រូវសម្អាតត្រង់ផ្នែកដែលទទួលរងផលប៉ះពាល់សិន។ បន្ទាប់មកបន្តក់ប្រេងដើមតែ ៣ដំណក់លើបន្ទះសំឡី រួចប្រើប្រាស់វាលាបដុសថ្នមៗលើសាច់ដុះ។ អនុវត្តសារឡើងវិញឱ្យបានពី ៣ ទៅ ៤ដងក្នុងមួយថ្ងៃដើម្បីទទួលបានលទ្ធផលកាន់តែប្រសើរ។
៣. ទឹកក្រូចឆ្មារស្រស់
ជាដំបូងត្រូវសម្អាតត្រង់ផ្នែកដែលទទួលរងផលប៉ះពាល់សិន។ បន្ទាប់មកសឹមច្របាច់ទឹកក្រូចឆ្មារស្រស់លើបន្ទះសំឡី រួចលាបលើស្បែកដែលមានសាច់ដុះឱ្យបានពី ២ ទៅ ៣ដងក្នុងមួយថ្ងៃ។
៤. ប្រទាលកន្ទុយក្រពើ
ជាដំបូងត្រូវសម្អាតត្រង់ផ្នែកដែលទទួលរងផលប៉ះពាល់សិន។ បន្ទាប់មកសឹមប្រើប្រាស់ទឹកប្រទាលកន្ទុយក្រពើស្រស់ ឬជែលប្រទាលកន្ទុយក្រពើស្រស់លាបម៉ាស្សាចូលស្បែកដែលមានសាច់ដុះសម្រាប់រយៈពេល ២នាទី។ អនុវត្តសារឡើងវិញឱ្យបានពី ២ ទៅ ៣ដងក្នុងមួយថ្ងៃ។
៥. ខ្ទឹមស
បុកខ្ទឹមសស្រស់ពី ២ ទៅ ៣កំពឹសឱ្យក្លាយជាខាប់ៗ។ បន្ទាប់មកសឹមលាបបិតលើស្បែកដែលមានសាច់ដុះដោយប្រើបន្ទះសំឡី។ ប្រើប្រាស់ស្បៃរុំពីលើនិងរងចាំសម្រាប់រយៈពេល ១យប់។ អនុវត្តសារឡើងវិញសម្រាប់រយៈពេលពី ២ ទៅ ៣យប់។
៦. សំបកចេក
ជាដំបូងត្រូវសម្អាតត្រង់ផ្នែកដែលទទួលរងផលប៉ះពាល់សិន។ បន្ទាប់មកសឹមកាត់សំបកចេកមួយដុំតូច ហើយបិតផ្នែកពណ៌សខាងក្នុងនៃសំបកចេកផ្ទាល់លើសាច់ដុះនិងប្រើប្រាស់ស្បៃរុំ។ ទុកចោលសម្រាប់រយៈពេលពេញ ១យប់។ អនុវត្តសារឡើងវិញរាល់យប់រហូតដល់សាច់ដុះជ្រុះអស់៕