កាហ្វេនិងតែ គឺជាភេសជ្ជៈដ៏ពេញនិយមបំផុតទូទាំងពិភពលោក។ ទោះជាយ៉ាងណាជាធម្មតាមួយភាគធំនៃពួកយើងជ្រើសរើសទទួលទានកាហ្វេនៅពេលព្រឹកច្រើនជាងតែ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ហើយការជ្រើសរើសបែបនេះអាចផ្ដល់អត្ថប្រយោជន៍ស្មានមិនដល់ជាច្រើន។ ថាតើហេតុអ្វីអ្នកគួរជ្រើសរើសទទួលទានកាហ្វេនៅព្រឹករំលងតែ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីមូលហេតុដែលអ្នកគួរជ្រើសរើសទទួលទានកាហ្វេនៅពេលព្រឹករំលងតែ ៖
១. កាហ្វេនឹងជួយឱ្យអ្នកធ្វើលំហាត់ប្រាណបានកាន់តែប្រសើរ
ប្រសិនបើអ្នកមានទម្លាប់ធ្វើលំហាត់ប្រាណជារៀងរាល់ព្រឹក នោះការជ្រើសរើសទទួលទានកាហ្វេ គឺជាជម្រើសដ៏ប្រសើរបំផុតសម្រាប់អ្នក។ នេះក៏ព្រោះតែកាហ្វេមានផ្ទុកបរិមាណនៃជាតិកាហ្វេអ៊ីនច្រើនជាងតែដែលបង្កើនសមត្ថភាពរាងកាយនិងកាត់បន្ថយភាពអស់កម្លាំងពីការធ្វើលំហាត់ប្រាណ។
២. កាហ្វេនឹងជួយឱ្យការប្រមូលផ្ដុំអារម្មណ៍របស់អ្នកមានភាពប្រសើរឡើង
តើអ្នកកំពុងត្រូវការផ្ដោតអារម្មណ៍ឱ្យបានល្អខណៈពេលសិក្សាសម្រាប់ការប្រឡង ឬចូលរួមសកម្មភាពណាមួយដែលតម្រូវឱ្យមានការប្រមូលផ្ដុំអារម្មណ៍បានម៉ដ្ឋចត់មែនទេ? ក្នុងករណីនេះកុំរំលងកាហ្វេ! នេះក៏ព្រោះតែកាហ្វេមានផ្ទុកកាហ្វេអ៊ីនដែលនឹងជួយដាស់អារម្មណ៍ឱ្យអ្នកស្វាងមានភាពសកម្ម។
៣. កាហ្វេនឹងផ្ដល់ឱ្យអ្នកនឹងថាមពលបន្ថែមភ្លាមៗ
តែ គឺជាភេសជ្ជៈដែលមានផ្ទុកកាហ្វេអ៊ីននិងសារធាតុ L-theanine។ ហើយ L-theanine នឹងផ្ដល់ឱ្យអ្នកនូវអារម្មណ៍ធូរស្រាល ខណៈដែលកាហ្វេអ៊ីនជួយរំញោចដល់ខួរក្បាលជួយបន្ថយអារម្មណ៍អស់កម្លាំង។ នេះហើយជាមូលហេតុដែលការទទួលទានភេសជ្ជៈមានជាតិកាហ្វេអ៊ីនខ្ពស់ដូចជាកាហ្វេអាចផ្ដល់ឱ្យអ្នកនូវថាមពលបន្ថែមភ្លាមៗលឿនជាងតែ។
៤. កាហ្វេជួយឱ្យស្រកទម្ងន់
មានការសិក្សាស្រាវជ្រាវជាច្រើនបានឱ្យដឹងថា ការទទួលទានកាហ្វេត្រូវបានផ្សារភ្ជាប់នឹងការថយចុះនៃកម្រិតជាតិខ្លាញ់ ជាពិសេសចំពោះបុរស។ អាស៊ីត chlorogenic acid ក្នុងកាហ្វេអាចជួយបន្ថយទម្ងន់រាងកាយល្អសម្រាប់អ្នកដែលចង់ស្រកទម្ងន់។ បន្ថែមពីនេះកាហ្វេអ៊ីនដើរតួនាទីជម្រុញការដុតរំលាយអាហារក្នុងរាងកាយដែលមានន័យថារាងកាយដុតបំផ្លាញកាឡូរីកាន់តែមានប្រសិទ្ធភាព។
៥. កាហ្វេអាចកាត់បន្ថយហានិភ័យនៃជំងឺទឹកនោមផ្អែម
ការសិក្សាស្រាវជ្រាវមួយបានបង្ហាញថា កាហ្វេអ៊ីនក្នុងកាហ្វេនឹងជួយកាត់បន្ថយហានិភ័យនៃជំងឺទឹកនោមផ្អែម។ ត្រឹមតែ ៣ពែងនៃកាហ្វេក្នុងមួយថ្ងៃនឹងអាចកាត់បន្ថយហានិភ័យបានដល់ទៅ ៤២ភាគរយឯណោះ។
ប្រយ័ត្ន! ទោះជាយ៉ាងណាការទទួលទានកាហ្វេភ្លាមៗបន្ទាប់ពីក្រោកពីគេង ឬមិនទាន់ទទួលទានអ្វីសោះអាចបង្កផលអាក្រក់ច្រើនជាងល្អ។ វេជ្ជបណ្ឌិតជាច្រើនបានឱ្យដឹងថា ពេលវេលាល្អបំផុតដើម្បីទទួលទានកាហ្វេ គឺចន្លោះម៉ោង ៩ៈ៣០ នាទីព្រឹក និងម៉ោង ១១ៈ៣០ នាទីព្រឹក៕