ភាគច្រើននៃពួកយើងសុទ្ធតែស្គាល់និងឧស្សាហ៍ទទួលទានប្រេងអូលីវ ប៉ុន្តែប្រហែលជាមិនធ្លាប់ដឹងទេថាប្រេងសុខភាពល្អនេះអាចជួយឱ្យស្បែកមុខសជាងមុនបែបធម្មជាតិ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ថាតើត្រូវធ្វើដូចម្ដេចដើម្បីប្រើប្រាស់ប្រេងអូលីវជួយឱ្យស្បែកមុខសជាងមុន? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីគន្លឹះងាយៗប្រើប្រាស់ប្រេងអូលីវដើម្បីជួយឱ្យស្បែកមុខសជាងមុនបែបធម្មជាតិ ៖
១. ប្រេងអូលីវនិងទឹកឃ្មុំ
អ្វីដែលអ្នកត្រូវធ្វើ គឺគ្រាន់តែលាយទឹកឃ្មុំឆៅ ១ស្លាបព្រាបាយជាមួយប្រេងអូលីវសុទ្ធ ១ស្លាបព្រាបាយនិងផ្នែកពណ៌លឿងនៃស៊ុតមួយគ្រាប់ឱ្យសព្វចូលគ្នា។ ជាដំបូងត្រូវលាងសម្អាតមុខឱ្យស្អាតជាមួយទឹកជាមុនសិន បន្ទាប់មកប្រើប្រាស់កន្សែងស្អាតជូតផ្ដិតមុខថ្នមៗឱ្យស្ងួត រួចសឹមប្រើប្រាស់ល្បាយដែលបានលាយលាបម៉ាស្សាលើស្បែកមុខ។ រងចាំសម្រាប់រយៈពេលពី ១៥ ទៅ ២០នាទី ឬរហូតដល់ស្ងួត សឹមលាងសម្អាតចេញជាមួយទឹកក្ដៅឧណ្ហៗជាការស្រេច។ អនុវត្តឱ្យបាន ២ដងក្នុងមួយសប្តាហ៍។
២. ប្រេងអូលីវនិងរមៀត
លាយប្រេងអូលីវ ១ស្លាបព្រាបាយជាមួយយ៉ាអួរសុទ្ធ ២ស្លាបព្រាបាយ និងរមៀតម៉ដ្ឋ ឬម្សៅរមៀតកន្លះស្លាបព្រាបាយចូលគ្នាឱ្យសព្វ។ បន្ទាប់មកសឹមលាបម៉ាស្សាលើស្បែកមុខជាប្រចាំ និងរងចាំសម្រាប់រយៈពេលពី ១០ ទៅ ១៥នាទី សឹមលាងសម្អាតចេញជាមួយទឹកធម្មតា។ អ្នកអាចប្រើប្រាស់ហ្វូមលាងមុខកម្រិតស្រាលដើម្បីកម្ចាត់ស្នាមប្រឡាក់នៃរមៀតចេញពីស្បែកមុខភ្លាមៗ។ អនុវត្តរូបមន្តនេះឱ្យបាន ២ដងក្នុងមួយសប្តាហ៍។
៣. ប្រេងអូលីវនិងត្រសក់
អ្វីដែលអ្នកត្រូវធ្វើ គឺគ្រាន់តែកិនលាយត្រសក់ស្រស់ ១ផ្លែជាមួយប្រេងអូលីវ ១ស្លាបព្រាកាហ្វេ និងទឹកដោះគោស្រស់ ១ស្លាបព្រាកាហ្វេឱ្យសព្វម៉ដ្ឋចូលគ្នា។ រងចាំសម្រាប់រយៈពេលពី ១០ ទៅ ១៥នាទី សឹមលាងសម្អាតចេញជាមួយទឹកធម្មតា។
៤. ប្រេងអូលីវនិងម្សៅ baking soda
លាយម្សៅ Baking spda ១ស្លាបព្រាបាយជាមួយប្រេងអូលីវ ១ស្លាបព្រាកាហ្វេ និងទឹកឃ្មុំឆៅ ១ស្លាបព្រាកាហ្វេឱ្យសព្វចូលគ្នា។ បន្ទាប់មកលាបម៉ាស្សាល្បាយលើស្បែកមុខក្នុងចលនាបែបរង្វង់។ លាងសម្អាតចេញជាមួយទឹកក្ដៅឧណ្ហៗ។
៥. ប្រេងអូលីវនិងទឹកក្រូចឆ្មារស្រស់
អ្វីដែលអ្នកត្រូវធ្វើ គឺគ្រាន់តែលាយប្រេងអូលីវ ១ស្លាបព្រាបាយជាមួយទឹកក្រូចឆ្មារស្រស់ ១ស្លាបព្រាបាយឱ្យសព្វចូលគ្នា។ បន្ទាប់មកសឹមលាបម៉ាស្សាល្បាយលើស្បែកមុខសម្រាប់រយៈពេល ២នាទី។ រងចាំសម្រាប់រយៈពេល ៣០នាទី សឹមលាងសម្អាតចេញជាមួយទឹកក្ដៅឧណ្ហៗ និងប្រើប្រាស់ទឹកត្រជាក់លាងសម្អាតលើកចុងក្រោយ។ អនុវត្តឱ្យបានពី ២ ទៅ ៣ដងក្នុងមួយសប្តាហ៍៕